Барганджиа Саид

Йалныс ауыпI адунейла йбергьльу аитальян суратгIвгIвы, Ренессанс гIамта ауысхагIв Леонардо да Винчи йан амарагIацIцIырташта йауаз дпхIвыс лыгхарныс. Ауи апш хъвыцща гIайырбитI афилология наукаква рдоктор, апрофессор, Адуней апсуа-абаза конгресс ЙхIаракIу асовет йалу Чирикба Вячеслав йнига шыц «Катерина лымадза. Леонардо да Винчи йан йылмагIныз» апны.

«Ари ахъвыцща багъьата сакIын самапI, йшпакIву ухIварыквын ауи азаман Апсны йгьи Черкесшта амшынтшп йтыргунта лыгта щардагIвы ргун Италия ахьыла, – йхIвитI Чирикба АААК апортал анхагIвчва дгIарачважвауата. – Ауи акIвпIта, йалныс ауыпI ари апхIвыс, амарагIацIцIырташта пхIвыс лыг Катерина, Апсны дауахарныс. Ари ацIабырг рыцIа йаргвану гвгIварапI».

Апрофессор йрытамамитI ари атемала щарда цIуата ашвъакви ахъвыцракви шадикIылуа. «Ауи шабгу ашвъабгъьы йансцIата ауагIа йрыцагIвсшарныс гвы счпатI. Араса йгIацIсытI акнига агIвра амурадгьи», – йхIватI ауи.

Автор йгIаликIгIатI сквшкъомкI руацIа ауи гIальаматра ду шазйымаз «а-Ренессанс аршIыйагIв дудздза» йбзазара.

«Ауи аршIыйагIв ду йбзазара апны сара гIальаматра ззызбауа «агIвычIвгIвыс хъата» акIвпI: йбзазаща шаъаз, йгвы ззыщтIаз, абзазара хъатаква, аполитика, азъазара, аршIыйара азазаъащата йрызйымаз, йбзазара зташваз азамани йари разазаъаща шщаквгылаз. Абарат ауысквагьи датшагьи уыс щарда гIальаматра рызсыман, уахьчIва йъадзазгьи йрызсымапI», – йгвгIанаграква хIыцагIвишитI Чирикба.

Акнига данадынхалуаз дзынйаз абаргвыраквагьи йхIватI апхьахьа.

«Баргвырата йаъу Леонардо йан лунашва мачIдзата ашвъаква рпны йъагIарбу акIвпI: гIван-хын дгIаргвалашвитI, закI-гIвба швъа айшыс, ауыла йшIчIвитI. Арахьарат зымгIва – датша шахIатлыкъ гIарысабапрапI – тшыт-тшыт йапшым ашвъаква йгIарылххатI, йашIырпшхатI, ауат йгIадрыбергьльыз, рыцIа йыззхъацIа йауаш асуратква гIащаквыргылхатI. Ауи швабыж ймайрам хачIвын. Сшгвыгъауала, ауи абгадзата йнардзамкIва йаъазтынгьи йсырхъйарныс сылшатI», – йгIацицIахтI Чирикба.

Автор йкнига «Катерина лымадза. Леонардо да Винчи йан йылмагIныз» асквш 2015 йгIашIарышвта дадынхалуан. Акнига сынчIва июнь мыз адуней йгIаквылтI, август мыз агIан Согъвым апны апрезентация акIвшатI. Акнига агIацIщтра дацхърагIатI Адуней апсуа-абаза конгресс ЙхIаракIу асовет аунашвачпагIв Эгьзакь Мусса.

Акнига атираж экземпляр 1500 йнадзитI, ауи пшцIырщтитI Россия, Белоруссия, Украина, Къазахстан аинтернет ткванква. 

Чирикба Вячеслав Андрей йпа – дапсыуа бызшвадырыгIвпI, дполитика уысхагIвпI, асквш 2011 октябрь а 11 йгIашIарышвта асквш 2016 сентябрь а 20 агIандза Апсны агIвымакъраль уысквала аминистр йхъвдаквцIараква нкъвигатI. Афилология наукаква дырдокторпI, дпрофессорпI, Апсны анаукаква ракадемия йалу дуысхагIвпI. Апсны Республика ахьызла йазалху хъвдаквцIара нкъвызгауа дщтийыгIвпI, КIавкIаз абызшваква, атурых, амифология знархару агIвыракви акнигакви дыравторпI.