АуагIа акоронавирус шIкIгIара рачвхъыхчара йазалху а-Оперштаб брифинг акIвнаршатI, араъа йгIархIватI ачымазагIвква руыс зкву йгьи аштаб апхъахьыла йнанауахвуаш амальква.
COVID-19 гIазахвта ужвы йгIадрыбергьльыз Апсны акъральгIвчва зымгIвагьи – Россия апны йхIаракIу арра апхьартакI йакурсантпI. Ауат йагIвсыз амчбыжь Москва йгIатыцIын ареспублика йгIайхтI, тшдыркIьыдан йазалху архъвыхырта апны йаъан. Ари ахабар гIайхIватI Апсны Республика азгIвадарахчара аминистр Цахнакиа Тамаз асабша май а 9 атшын акоронавирус ауысла а-Оперштаб йакIвнаршуз абрифинг апны.
Ауи йширытамамызла, ачымазагIвква Гвдауыта район аквта чымазагIвтара апны йщтIарцIатI, ауаъа йнардзата йрайъазитI. Раъаща уарыразуата йырпхьадзитI.
«Апхъала апшта йгIалхIкIгIарныс хIтахъыпI а-Президент йунашвала йщаквгылу ашIакIра амальква, акъральыгIва гIахъысырта йазынархугьи гIапхьадзахауата, уахьчIвалагьи магIны шрыму. ХIара йанакIвызлакIгьи йгIалхIкIгIун акоронавирус шIкIгIара агвла къральквала «йгIахъысуазтын» акIвымкIва датша швхIаусыгIвала йшгIанымшуш, ауи ахIатырла швабыж магIны амапI акъральгIвына хъысыртаква рпны архъвыхраква йшаъу йгIаныжьра йа рыцIагьи йрыбагъьара», - йгIаликIгIатI аминистр.
Ауи йшипхьадзауала, азгIва здырбалуашта йаъу ауагIа ареспублика ргIаталра йъадзауа аъара йалырдзгIара атахъыпI.
«ХIкъральыгIвчва ареспублика йгIатагIымжьырныс хIгьахвитым. Араъа дзачIвкъральгIвызлакIгьи йынкъвигауа аджьауапкIра дупI. ГвынгIвырапI уахьчIвала эпидемия ъану ашта йгIатыцIта йгIайхуа агIвычIвгIвыс йаргванквагьи анахьанат абзазагIвчвагьи дрымзарархарныс ахъазла кьангьашткъвым аламкIва йхъа йыркIьыдара шатахъу. АкъральгIвына йгIахъысуа дзачIвызлакIгьи асанитар-эпидемиология къвырльыкъвхарта рырхъвыхра дацIазара атахъыпI. Архъвыхра амальква рыцIа-рыцIа йдыргъвгъвуштI, ауат амальква рмагIны швабыж йдупI, заджвгьи ймыгIвхъйымгауата йгватшныта йынкъвыргара атахъыпI», - йхIватI багъьата Цахнакиа.
Ауи йатайхIвахтI йдрыбагъьаз ашIакIра амальква май а 15 агIандза йшщаквгылазлуш. УадыргIвана а-Координация штаб йызкьазуу алачIвара апны йащтагIайуа амалькви ащаквыргылракви нарахвуаштI: ауат амальква йшаъу апшта йгIанырыжьуаштI йа йгIадырльальуштI.
«Йнахву закIыпI – акъральгIвына хъысыртаква йшхъгIву йгIанхитI», - йгIаликIгIатI азгIвадарахчара аминистр.
Ауи акъральгIвчва тшатарзынайырхахтI асакъра амальква йшатахъу апшта йынкъвыргарныс, йаквгIазшIиттI щардагIвы ъайззауа йрыламлырныс, йъадзарылшауа рунагIваква йгIарджвылымцIырныс, йангIаджвылцIуа амаскаква нкъвыргарныс, рнапIква антисептикква гIадрысабапуамцара йырхьпшырныс.
«Россия Федерация йгIатыцIхта Апсны йгIайхуа рхъа дыркIьыдата 14 мшкIла карантин йаъазара атахъыпI. ХIара уахьчIвала багъьата йгьхIзыхIвум ачымазагIвква рпхьадзара йаламхIушта. Ауат апхъахьылагьи йаъазлуштI. Ужвыгьи адзын, агъны хIпырапI, ауат агIвычIвгIвыс йпынцIа, йтамакъ, йрапхIаква ршIкIгIара згIваква йанрылахIауа гIамтапI. АъачIвагIагIвчва йшырпхьадзауала, адзын агIан акоронавирус шIкIгIара йгIванхауата йа йхынхауата йауацIыхта йгIацIсырныс закIы гьазхIвам. ХIара ауи хIазыхIазырзара атахъыпI. Ауи йгIалцIла апхъала йнахIахвыз амальква апхъахьылагьи рмагIны гьыдзуашым», - йхIватI Цахнакиа Тамаз йажва далгауата.
Абрифинг апны дгIачважватI Согъвым асанитар айъазагIв хъада Беляева Аллагьи. Ауи йшгIалылкIгIазла, ачымазагIв шIыцква Россия-Апсны къральгIвына йангIахъыс амщтахь датша заджвгьи йгьинымйатI.
«АпщыгIв чымазагIвчвагьи йхIаракIу йара апхьартакI апны йапхьитI. АкъральгIвына йангIахъыс амщтахь ауат заджвгьи йнымйаскIва зынла йазалху архъвыхырта йгIаргтI. Ауаса ауат дара-дара абабун апхьарта апынгьи мгIва йаныквызгьи. Ауи йгIалцIла ужвы акарантин йаъапI. Анахьанат астудентква ачымазагIвква йшрыдымсылуаш апшта кIьыдата йаныргIалпI йгьи уахьчIвала йызгIвадапI», - лхIватI Беляева.
Май а 8 атшын ауагIа акоронавирус шIкIгIара рачвхъыхчара йазалху а-Оперштаб ахабар шаргазла, акъраль ауацIа COVID-19 згIва гIазахвыз ужвыгьи пщгIвы гIадрыбергьыльтI.
МартI ацIыхъва йгIашIарышвта апрель а 20-дза Апсны апны къральыгIва унашвала ГвжважвагIва аъаща щаквгылан. Ужвы ауи аъаща нырххтI. Ауаса акъраль аунашвачпагIвчва абзазагIвчва аквгIазшIыртитI ахъаркIьыдара амальква йапымшвтуата йынкъвыргарныс. Апсны акъалаква зымгIва рпынгьи аквта базарква рынхара джвыквырцIахтI, ауат мчбжьыкI апны хымшкI йтIызлуштI. Апхъала апшта йаркIыркIвапI апхьартаква, асабигIзартаква, ауниверситет.
швталра йа тшаншвцIара атахъыпI.