А-Конгресс йаланакIуа ЧкIвыныргIа рсоветква рунашвачпагIв АААК а-Дискуссия клуб апны йхыгIвхауа дсасын.
Барганджиа Саид
ЧкIвыныргIа йырзынарху аполитика йаквчважватI Адуней апсуа-абаза конгресс а-Дискуссия клуб йаднагалыз йхпахуз анйара апны. Ари азын ауаъа дгIачважвун АААК йаланакIуа ЧкIвыныргIа рсоветква рунашвачпагIв Торчуа Леван.
Ауи анйара йгIадгылкваз АААК йаланакIуа ЧкIвыныргIа рсоветква шынхауа райхIвтI, ауат ргIапсратайрымазлушгьи даквчважватI.
«Апсны аштипхьадза апны ашIыпIа хъвшара асовет гIандыршуштI. ХIара мзигIадзапхьадза хIанйалуштIта ашIыпIа унашвачпагIвчва хIрыцта йапшым ауысква хIрыквчважвалуштI», – йхIватI Торчуа.
Ауи йгIацицIахтI ЧкIвыныргIа рсоветква арайонква рпны йапшым апроектквала хъвыцрата йаъу ддырдыруамцара рыцIа магIны змата йырбауа гIалырхта рырхъйара йшадынхалуаш.
АААК йаланакIуа ЧкIвыныргIа рсоветква рунашвачпагIв йара йхъатала АААК ЙхIаракIу асоветаунашвачпагIв Эгьзакь Мусса данйабадыр амщтахь а-Конгресс дшалалызгьи даквгIашIастI.
«Сара уатыкв айчажваракI сызшIырттI. Ауаъа Эгьзакь Муссагьи дгIачважвун – йапхъахауата дызбатI. Ауи абаза уагIа рцIаскви рхабзакви, апхъала йшгIабзазази апхъахьыла руыс шцуши, а-Конгресс мурадта йынкъвнагауа дрыквчважвун. ЙгIачважвара ауи аъара йымчын, лахIварала йырчвынта – зынла йхIвуз йшацскIуа тшазыздыртI, йаргьи йатахъызтын йараужвы «абель насахвта хIуачIвымш ауыхвара джвыквсцIарныс сшхIазыру» ауи зынла йасхIвтI», – йгIайгвалашвахуан Торчуа Леван.
Ауи анйара йалакваз АААК амурадкви ахачIвкви йрыхайыргIвазатI, йара унашва зхъицIауа а-Конгресс йаланакIуа ЧкIвыныргIа рсовет уыста апахь йгылугьи йхIватI.
Анйара йалан Согъвым аунашвахъцIарта чкIвыныргIи аспорти руысквала акомитет аунашвачпагIвчва, Апсны апныйгIаныршу чкIвыныргIа йапшым радкIылараква руысхагIвчва (АМЧ, ДЮНА, Авангард, АГУ астудентква радкIылара, АИФ астудентква радкIылара – аредакция ррытаразга), Гвдауыта апны йгIаныршу АААК ашIыпIа хъвшара йаланакIуа ЧкIвыныргIа рсовет аунашвачпагIв ЛакIойа Амра датшагьи асасчва, ауат джьгарта айчважвара йгIалалуан.
Торчуа йшипхьадзауала, анйара дахIвра аман, ауи йагIарбагапI анйара йалакваз айчважвара йшгIалалуази «йашIамсуа азцIгIараква шгIадыргылуази».
«АзцIгIарата йгIадыргылуаз гьапшымызтI, айхIара сынхара йазынархан. Уыжвласыла хIкъраль апны АААК ашIыпIа хъвшараква рсоветква ъагIандыршуш рымагIальаматын, ауат тшрыдкIыл йшауаш гIаддырдыруан. АкъральыгIва уысхартаква, ажвапIта – Согъвым аунашвахъцIарта чкIвыныргIи аспорти руысквала акомитет, урыцынхара шатахъу гIащтIырхуан. ЧкIвыныргIа йырзынарху анхара анархара хъадаква йрыквчважвун. Ажвлара чкIвыныргIа йырзынарху ауысква ауатыкв йангIаталра дукI чва шырхъарымбауа йгьи йшрыцрымкIуа рхIвун», – йхIватI Торчуа Леван.
Анйара аламгаскIва ауаъа йгIадгылкваз Skype-ла ужвы нхара уысла Европа йаъу АААК архъйагIв секретарь Гицба Инари АААК ахабарргарта портал аунашвачпагIв Лазба Амини йрачважварныс рылшатI.
«Ауат йъанкваз рпны йзынйаз шырбаз, уыста йлырхыз гIахIархIвтI», – йгIалылкIгIатI АААК а-Дискуссия клуб аунашвачпагIв Турава Ирина.
Турава йшылхIвауала, аклуб апны йакIвшаз йхпахуз анйара апны асас йынхари чкIвыныргIа йырзынарху АААК апроекткви йрыквчважвара йахъазымкIва «ажвлара уысква джьгарта йрылу ашIаква, тшадызкIылта йырзацалу, Апсны ашIара рапхъаламгIвайсра йахъвуш проекткI лызхта йадынхалырныс йхIазыру чкIвыныргIа радкIылараква йрылу ачкIвынчви ахIвсси азддарагьи рылшатI».
«ХIара хIшабайауаш апшта абадыргаква амыгIдатI, хIшацынхушлагьи хIангIалтI. Сара анйара шакIвшаз швабыжта сазыразпI, йара ауаса акIвын са а-Дискуссия клуб ангIанхIыршагIвацузгьи ауи анхара сыла йшгIацIазыжьуаз: йгIадгылуа зымгIва ауи анхара йалата, айчважвараквагьи закIы уаздырцауата. УахьчIва йгIалыгIгаз – чкIвыныргIа радкIылараква, АААК, чкIвыныргIи аспорти руысквала акомитет рацынхарала йалыргата йлыхIхыз йапхъахауа ачIвырхъаква ракIвпI, ауи акIвымкIвагьи цхърагIагIвчва шIыцгьи гIахIылахIатI», – лхIватI Турава Ирина.
«АМЧ» жвлара адкIылара аунашвачпагIв Пачалиа Алиса магIны зму ауысква гIащтIух йъауаш ауатыкв айчважварта Апсны апны бзита йынхауазшва йылбитI. Ауи гвы шалтызла, зымгIва рацкIыс йапхъу – айззара йалу рыуа заджвгьи гIвымата тшыйымбауа, тшимырбцIуа, тынчта ргвы йту шырзыхIвуш апшта аъащаква гIаныршара акIвпI.
«Сара йшызбауала АААК ауысхагIвчва ргвып ауи гIарыдахIвтI: а-Дискуссия клуб апны асасчва гIальаматква, йгIауайгвыгIвуа адгалагIвчва, ауыс азыгIальаматра аззыму ауагIа урынйитI», – лхIватI Пачалиа.
Ауи дацIачIвагъватI уахьчIва магIын ду шаму «закIгьи йашIысым уыс йъаламчважвуш уатыкв гIануыршарныс».
«ЙалкIгIата йсгвапхатI ачкIвынчви ахIвсси ауатыкв йгIатаргаз ауыс йзалачважвуш ауагIа шгIалырхыз. Швынхара программакI шаму, ргIапсракI йштагылу уылаухIвитI. АмакIыра рыцIа йазалху нархаракI аут йауашшвагьи йызбатI, йауа ухIварыквын, чкIвыныргIа йырзынарху аполитика уашIамсуа уахъгьи тшынгьи уаквчважва йауаштI. Апхъахьыла арат йрапшу аклубква апхьарта йыцIу апхьагIвчва рыхъазлагьи йгIанырша йауаштI. Ауат мачIта йрачважвауазшва, мачIта нархара рыртуазшва йызбитI», – лажвагьи гIалгтI ажвлара адкIылара аунашвачпагIв.
Анйара асасчва йрыуазаджвыз Согъвым аунашвахъцIарта чкIвыныргIи аспорти руысквала акомитет аъачIвагIагIв хъада Пачулиа Оксана йшылпхьадзауала, а-Дискуссия клуб «йазалху ауысква уъарыквчважвуш уызгIвымсхыз уатыквпI».
«ПроблемакI йадынхалуа йа йзымагIальамату ауагIа йара заманкI йара зджьара йазудда йауитI. Арат йрапшу анйараква рбзирала ауагIа йызланахIвата йымцкIу дунейкI йтазгаз асоциал сетква йгIартыцIитIта йызлу абзазара апны айчважвара райши ацынхари йрызгIайхитI. Араъа ахъвыцракви апшыщакви зчIву рлактаква убитI, зхъвыцщала йаквшвауа тшадыркIылта йгIащтIырхуа ахачIвква рырхъйара йазынха йауаштI. Арат йрапшу анйараква рфайда зынла йгьуылаухIвум, ауаса гIамтакI царыквын ажваква уысхуштI, анйараквагьи – мурадкI йазцара зтахъу ауагIа йрайззарахуштI», – лхIватI Пачулиа Оксана.
Аклуб алачIвара шабгу АААК YouTube канал апны швапшы йауаштI>>
А-Дискуссия клуб уалалра ахъаз йазалху анкета аджьауапква тагIвыта, рыцIа йуымагIальамату анархара гIалхта ахIвара швъа электрон адресла (discussclub@abaza.org) йущтира атахъыпI. Нархарипхьадзала тыпта йаъу пхьадзапI: ауи гIазлыцIуа аклуб алачIвараква ъакIвшалуш апещ (Лакоба йурам апны йгылу Апсны анаукаква р-Академия атдзы йапхъахауа аэтаж апны йаъу «Алашара» ауысхарта) уагIата 25-30-гIв райхIа ъагIвнамшвауа акIвпI. Ауаса уыскI аквчважвара йалазларныс зтахъкву рыцIа йщардагIвызлузтын адгалагIвчва ауи ужвыгьи зны йшаквчважвахуаш апшта лшара йазыпшгIуштI. РыцIа магIны зму анйараква ахъырхлата YouTube апны АААК аканал йгIатарцIалуштI. Аклуб алачIвара кIьыдаква рейша асоциал сетква рпны йгIадырбалуштI.
швталра йа тшаншвцIара атахъыпI.