АААК ащтийыгIвчва Египет апны рынхара анйараква йрылата Египет акультура йгьи азъазара ртшауацIыхра афонд аунашвачпагIвчва йрайкьангьаштI.
Барганджиа Саид
АААК ауысхагIвчва Египет апны рынхара анйараква йрылата Египет акультура йгьи азъазара ртшауацIыхра афонд аунашвачпагIв, адоктор ЙахIйа Эсмат Али йынйатI йгьи апхъахьыла рацынхара ауысла йангIалтI. Анйара Гиза къала апны апщаша апрель а 25 атшын йакIвшатI.
АААК архъйагIв секретарь Гицба Инар йшгIаликIгIазла, а-Конгресси а-Фонди рацынхара йапшым анархартаквала йакIвшуштI, ауаса йхъадазлуш акультура анархарта акIвпI.
«Акультура ауысла ацынхара йауацIыхта хIалачважватI. ХIапсыуа ршIыйагIвчва гвыпква Египет апны йакIвшалауа адуней фестивальква йшрылалуашла хIацацхърагIарныс хIангIалтI. Египет йауу ршIыйагIвчва гвыпкIгьи Апсны йгIахIрайгварнысла амальква хIрылачважватI», – йхIватI Гицба Инар.
ЙахIйа Эсмат Али а-Фонд йахъазымкIва Египет апны балет апхьартагьи гIанйыршатI. Культура ауысла Россия йгьи Египет рацынхара атшауацIнарыхра дъацхърагIауа ахъазла ауи йквнадыргахьатI аорден «Айгвара ауыс йалацIара ахъазла».
«ЙахIйа Эсмат Али Египет апынгьи агIвыма къральква рпынгьи йбергьльу дгIвычIвгIвыспI. Ауи ахIатырла йалкIгIата йхIгвапапI Египет апны Апсны ркультура акIвгашара ауыс амальта йымула дацхърагIарныс багъьата хIъайыргвыгъаз», – йхIватI Гицба Инар.
Ауи апхъала, апрель а 22 атшын, Гиза апны йауацIыхта йакIвшатI а-Конгресс ауысхагIвчви Египет апсыуа-абаза диаспора АбазаргIа рткъвыми ранйара. АгIаджвыквцIараква тшауацIырхырныс, апхъахьыла ацынхара зламгIвайсуаш анархараква йрылачважварныс ахъазла АААК ауысхагIвчва йыргвыгъапI Египет апны адиаспора йрыуата джьгарта йынхауа агIвычIвгIвысква кIьыдата йрынйарныс – акультура анхагIвчва, АбазаргIа рткъвым атурых анархарала йынхауа аъачIвагIагIвчва, датшагьи.
швталра йа тшаншвцIара атахъыпI.