АААК ЙхIаракIу асовет аунашвачпагIв Эгьзакь Мусса Айкибудзюцу Гендай Кан айсыщала йапхъахауа адан гIатигатI.
Угвы мгIвадзакIва алакшаракI уаналашвара ари айсыща азъазара рахIа йгIауысабапхушта йаъапI. Ауаса ауи рыцIа йыззалху йгьгвыквсрам – хъахчарапI. Ауи атехника йапшым акшащаква, аквкъьащаква, амцIасщаквала йалапI. Йапхъахауа адан – ауи амастерра зладжвыквырцIауа надзарапI, ауи гIауквнадыргара ахъазла сквшпхьадзара тшубжьара, уъазара урымчра атахъыпI. Дан шгIауыртуала ащаквыргылра архъвыхра уангIакIылсра амщтахь зъазара хIаракIу амастерква ркомиссия йнарахвитI.
Эгьзакь Мусса йшихIвауала, архъвыхраква гьмайрамызтI, рахIа йызрыбаргвуазгьи – амш бампIагIван, ахIауа абагIдзара процент 100 йнадзун. Анормативква аникIы амщтахь Мусса ХIабальа йпа зныбыжь зхъаштылра зтахъу зымгIва азал йцата Айкибудзюцу тшадыркIылырныс тшырзынайырхатI.
«Ари айсыща зымгIвалагьи йуызнархIитI: ужьышвква зымгIва аланаршитI, умахъа-щахъарыхъвартаква ннархитI, уацIнахвитI, уымкIахIауата тшузыкIуа уабжьитI. Ауи акIвымкIвагьи, махъа-щахъала тIакIв уанхIвынчIара – амш шабгу йуызхъауа къару гIаунатитI. Айкибудзюцу йалу акIахIащаква, атшахърышвтраква зныбыжьла йнаскIьахьу йрыквыргIапсымызшва йубарныс ауаштI… Момо! Айкибудзюцу гIвба-хпа сквшы ахIа уаныртам уалагата уажвыхындзкIьа, сквшышвкI йанахъуцарагьи рыцIа-рыцIа уазычпахауамцара тшадукIыл йауаш айсыща азъазарапI. Сквшыта уызтазлакIгьи дырралагьи, гвылагьи, къарулагьи йуызуырхIалара атахъыпI», – йгIаликIгIатI Эгьзакь Мусса.
Ауи йшихIвазла, зныкIдза академия айкидо тшадикIылуан, 5-6 сквшы руацIа мшигIван атшыбжьараква дцун. УацIыхъван апрофессионалква йрыдынхалуа абжьагIвы Никитин Сергей йпны йызлайсуа самбо тшазибжьун. Пщысквша цIуата йцбахауа адан зму амастер, ашихан Ульянов Александр данйабадыр рыцIа йгIайыхъвуш Айкибудзюцу шакIву гIайгвынгIвытI.
АбжьагIвы Эгьзакь Мусса йъазара хIаракIыта даквчважватI.
«Архъвыхраква рапхъала сгвы бжан, арылагьи бампIагIванта – ухIвынчIарныс гьмайрамызтI. Акомиссия руыс ткIьита йадгылуан. ХачIвыта йдыргылуаз ахъахь теориялагьи азцIгIараквакI рыртуанта – азджьакI саргьи сдрыъанквынуан. Ауат ахачIвква зымгIва Мусса ХIабальа йпа бзидздзата йырхъйатI, рыцIа йшIата ауаъа йаъазгьи ауи надзарати ласырати йгIайырбуз йайхIвапсарныс акIвын йырзыгIанхахуаз. Схъа ду йсйырбахтI. Ауи апш заман айшысла амастерра апны унадзарныс – ауи щарда гIаныцIитI! Ауатква зымгIва збзиру – Мусса ХIабальа йпа нцIрата йыму спорт дапщылапIта – ари ауыс дазыхIазырын, йаргьи атшыбжьараква йгвабыздзата, тшдырра ду гIайырбауата дрыдгылитI, тшацIнаргара, хъайгьдзара гьйылам!» – йхIватI амастер.
Архъвыхра комиссия йалан Айкибудзюцу Гендайкан (Айкидо ауыжвгIанчIви апхьарта) аунашвачпагIв Ульянов Александр (Renshi Aikijujutsu, Shihan Aikijujutsu, 6 Dan Aikijujutsu, 6 Dan Real Aikido, 4 Dan Jeet Kune-Do, 3 Dan Aikido Aikikai, 2 Dan Spochan), Бойцов Дмитрий (1 Dan Aikibujitsu, 1 Dan Real Aikido), Куликов Юрий (4 Dan Aikibujitsu, 3 Dan Real Aikido, 1 Dan Spochan), Круглов Андрей (2 Dan Aikibujitsu, 1 Dan Real Aikido), Сергеев Эльдар (3 Dan Aikibujitsu, 1 Dan Real Aikido).
Ауат йырцхърагIун: Ульянова Софьи (4 Dan Aikibujitsu, 3 Dan Real Aikido, 1 Dan Spochan) Морозов Егори (1 Dan Aikibujitsu).
Адуней апсуа-абаза конгресс агвып Мусса ХIабальа йпа архъвыхраква дахIврала дъагIаркIылсыз, йапхъахауа амастер разряд ъайквнадыргаз йайхIвахIвитI! ЗгIвадара багъьа, апхъахьылагьи анхара апынгьи аспорт апынгьи айгIайраква йзыхIтахъпI!
швталра йа тшаншвцIара атахъыпI.