Адуней апсуа-абаза конгресс ЙхIаракIу асовет аунашвачпагIв Эгьзакь Мусса апсуаква дрыуата суратгIвра йапхъахауата йызъачIвагIахаз, адуней йагъьу азъазагIвчва йрылапхьадзу Чачба-Шервашидзе Александр йгIвыз жвасураткI йхвгIатI.
АААК агвып апсуа гвбайара хвду зму атынхаква йрыуу анхараква рзыпшгIара йалалтI.
Шекспир йыргылчIв «Пшачвгьа» йгIахъихта Казанли Н.И. йалайцIаз аопера «Миранди» Вагнер йопера «Тристани Изольди» рыхъазла Чачба-Шервашидзе йгIвыз ачгIвычаква рсуратква гIазырбауа 10 нхаракI аукцион апны Эгьзакь Мусса йхвгIатI.
СогIвым апны АуагIахъа сурат гIарбарта анблы амщтахь адуней акъральква йырту йгвалымсым уагIа щардагIв апсуа азъазагIвчва йгIанхаз рыршIыйараква йырзыпшгIауа йалагатI. Амца азъазара нхарата пщынызкь раъара аладзтI йа зарар рнарадзатI. Ауат йрылата йблытI ахI Чачба-Шервашидзе йынхара 300 раъарагьи.
Амца йаладзыз гьузыгIащаквыргылхуам, ауаса хIгвып йхIылшауа гьгIаныгIыжьуашым йгIанхата йаъу гIахIхчата йхIыщтагIайуаш абанпараква йрызгIаныгIыжьра ахъаз. ХIуагIахъа гвбайарати бзазагати йхIызгIаныржьыз акультура тынха гIащаквыжьра – хIхачIв хъадаква йрыуазакIыпI.
Чачба-Шервашидзе Александр – дсуратчпагIвын, ддекораторын, дазъазарадырыгIвын йгьи дцIбацIбагIвын, апсуаква дрыуата суратгIвра йапхъахауата йызъачIвагIахаз ауи йакIвпI. Париж апны Ван Гог Винсентгьи Тулуз-Лотрек Анригьи збжьаз апрофессор Кормон Фернан йстудия апны дапхьатI. Франция асуратгIвгIвчва руагIахъа жвлара днарахвтI. Асквш 1906 агIан Санкт-Петербург дталхын аимператор театрква декорация рзичпун.
швталра йа тшаншвцIара атахъыпI.