Апсуа абакIыгIвчва хвитра абакIрала йбергьльу атурнир апны асогIаква гIатыргатI Россия алагъь къала хъада апны.
Барганджиа Саид
Согъвым, Ткъварчал, Очамчыра йрыуу абакIыгIвчва, хвитра абакIра аклуб «Абаза» апны йгIадзынгылуа ашIаква Санкт-Петербург апны СССР ачемпион Родионов Владимир йчвахъабагата йакIвшаз хвитра абакIрала VI атурнир апны асогIаква гIатыргатI.
Хвитра йгьи аурым-рум абакIра а-Федерация авице-президент, Согъвым аспорт гвып рбжьагIвы Берайа Игорь йакIвшаз анкъвакъвраква дрыквчважвауата йгIаликIгIатI апсуа абакIыгIвчва ръазара хIагIата тшшгIадырбаз. Ауи йшгIахIгвынйыргIвызла, Апсны абакIыгIвчва апшIагылраква рпны йайгIайтI ага йгIарпшIагылыз аспортсменква бзидздзата тшдрыхIазырызтынгьи.
«Йапхъахауа агыларта гIатыргатI Харчилава Сандрои Джинджуа Самуили, йгIвбахауа агыларта – Акаба Вахтанги Цулукиа Нестори, йхпахауа агыларта – Абшилава Алан. Ауат зымгIвагьи дара рхIатлара йгIацIанакIуа агвыпква рквтала йайгIайтI. Аспортсмен шIаква йрыдынхалитI абжьагIвчва Харчилава Мурман йгьи Гадлиа Хаджарат, йхIвара атахъыпI ауат зымгIвагьи хвитра абакIра аклуб «Абаза» апны йшгIадзынгылуа. АчкIвынчва абакIра апны ахъа уалагата ацIыхъвадза амайчри чхIари гIадырбатI», – йхIватI абжьагIвы.
Берайа йшихIвазла, атурнир йалан спортсмен 200-гIв райхIа адунейла йапшым акъральква йрыуата – США, Греция, Беларусь, Эстония, датшагьи. Ауи йшипхьадзауала атурнир анадзара хIагIата йадгалан. АбжьагIвы йрытамамтI апсуа спортсменква ахчала йгIарцхърагIаз Адуней апсуа-абаза конгресс ЙхIаракIу асовет аунашвачпагIв, хвитра абакIра аклуб «Абаза» апрезидент Эгьзакь Мусса шйакIву.
Йара Эгьзакь Мусса хвитра абакIрала аспорт дамастерпI, ауи хвду рыквицIатI атурнир йалаз апсуа спортсменква ргIатгараква. ЙшгIаликIгIазла, абакIыгIвчва шIаква ргIатгараквала йубитI ауат йрыдынхалуа абжьагIвчва рынхара йнардзата, йхIагIата йшадгалу.
«ХIапхьарта апны (хвитра абакIра аклуб «Абаза» - аредакция ррытаразга) аспортсменква швабыж йнардзата йрыдынхалитI. АпхъагылагIвчва срайхIвахIвуата йсхIварныс йстахъыпI йрылшахьу агIатгараква рпны йгIашIамсуата апхъала багъьата йымгIвайсырныс, абакIыгIв шан гIадырбауамцара. Олимпия ртшхъвагаква ргIатгара хIазычIвырхъара атахъыпI, йшспхьадзауала, хIара йхIаракIдзу Олимпия пьедестал йхвынгылхьу абакIыгIвчва, «апельуан» дуква хIщардапI», – йхIватI Эгьзакь Мусса.
Ауи йшипхьадзауала, апсуа абакIыгIвчва апхъала йымгIвайсырныс ахъазла алшара бзидздзаква рымапI, ауаса агIатгара дуква уырзынадзара ахъазла щардата уынхара атахъыпI.
«Угвы багъьазара, ухъа унапIыцIазара атахъыпI, уыздынхалуа ауыс хвду азубара атахъыпI. Зынгьи йухъураштылра гьатахъым йамгIан баракъу уыззгылу, угвы йтазара атахъыпI йуайцIбу ачкIвынчва шгIаупшуа, ауат уара швапха гIаухъырхырныс йшащту. Абари агвышхвара ауралагьи йгIарбара атахъыпI, айгIайракI гIатугапхьадза ауи рыцIа-рыцIа йымчхитI», – йхIватI АААК ЙхIаракIу асовет ахъада.
Апсуа хвитра абакIра атшауацIнарыхра даквгIашIасуата, аспортсмен шIаква рыдынхалра апны ауи йгватра датшагьи закIы йазынайырхатI: Апсны йтыцIта ан-абачви абжьагIвчви йырчвыхъарахауа ашIаква йазалхта урыдынхалра атахъыпI «акъала дуква райлахIараква» йшхъырымхуаш апшта.
«Ауат абакIра кIадрышвхитI. Ауи хIадынхалра атахъыпI. Ажва аламкIва йбзихушын йара Апсны апны йхIаракIдзу агIарбараква рымазларныс ахъазла аспорт йатахъу зымгIвала йхIзадгалзарквын», – йхIватI Эгьзакь Мусса.
СССР ачемпион Родионов Владимир йчвахъабагаз хвитра абакIрала VI атурнир Санкт-Петербург апны декабрь а 13 йгIашIарышвта декабрь а 15-дза йакIвшатI. Ауи айгIайыгIчвагьи асогIагIатгагIвчвагьи адипломкви амедалькви гIарырттI.
швталра йа тшаншвцIара атахъыпI.