СынчIва Йхвбахауа Акультура-спорт фестиваль «Абаза» адгалра уысква ацдырхъйатI Абаза-апсыуа уагIахъа ртшауацIыхра ацхърагIара знархару Адуней адкIылара «Алашара» йгьи Адуней апсыуа-абаза конгресс. Ауи абзирала ахъвмарраква йгIарылалыз агвыпква ъауу ахаквква рыцIа йауацIыхын. Аконгресс аунашвачпагIв Эгьзакь Мусса йгIаликIгIатI афестиваль йшалаз Трыквшта, Йордания, Апсны Республика йгьи Россия йгIацIанакIуа шта щарда ргIащтийыгIвчва.

«Абаза хъвмарраква хъвыцра щатата йрыму гвынгIвырапI: аспорт, арат ахъвмарра амальквала хIнашх щтIыцIитI, гвы ахIымтдзакIва рыцIа-рыцIа хIаргванхитI, тгIачва дукIта хIщаквгылитI. ХIацIагылата йазакIу уыс дукI хIырхъйауа тшыгIбжьитI. ХIпны цIаста йщаквгылитI азгIвадари амчхъари рхъгалра», – йхIватI Эгьзакь Мусса.

Афестиваль йгIалалыз ауагIа швыгIвпхьадзара йнадзун. Ауат йрылшатI аспорт анкъвакъвраква рпны йапшым аспорт квпшыраквала рылшараква дырхъвыхырныс, абаза фачIвква ршIадыршварныс, абаза культури ацIаскви тшрыхадыргIвазарныс, агIвзачва шIыцква йрабадырныс, рапхъанчIвиква рхъмаштылра квырмыш азырчпарныс, йызкьазуу ахъвмарраква рпIатла гIадзандзыкIьара нашх щтIыхли лахIвара лашарали тшдырчвырныс.

Абаза уагIа хъвмарраква Къарча-Черкес республика апны йхвынхауата йакIвшатI.

Ансисквша Россия йгьи агIвымакъраль шIыпIа шIыцква гIарыцIаркIуамцара анкъвакъвраква йгIарылалуа аспортсменква ъауу ахакв гIвынаква рыцIа-рыцIа тшауацIырхитI.