Абаза-апсуа уагIахъа ртшауацIыхра ацхърагIара знархару «Алашара» Дуней жвлара адкIылара йаднагалыз VII Абаза хъвмарраква акIвшатI Къарча-Черкес Республика апны.
Амичба Амра
Ансисквша йадыргаллауа «Абаза» культура-спорт фестиваль акIвшатI июль а 23-24 агIан Къарча-Черкес Республика, Абаза район йаланакIуа Къвбина кыт апны. Афестиваль «Алашара» жвлара адкIылара йаднагаллитI.
СынчIва ауи аспорт гвыргъьахъв йалан КъЧР йауу 9 абаза кыткI (АлбыргIан, Къарапагва, Къазма, ЙынджьыгьчкIвын, Гвым, Къвбина, Къвайдан, Дарыкъвакт, Хъвыжвду), Ставропольшта йгьи Апсны Республика ргвыпква.
«Йыжвбума, ачуанква хъвыпI?»
Пандемия йгIалцIла афестиваль гIвысквша йгьакIвымшатI. Абаза хъвмарраква хъзымрыпауа апшыгIвчва йрыуазаджву Къвбина кыт абзазагIв ПIаз Марина араъа агвыргъьахъв йырзымчхIахуа йшазпшуаз гIахIалхIвтI.
«Швабыж хIазпшуан! ЙцIыхъвахауата ахъвмарраква АлбыргIан апны йакIвшатI, ауаъагьи хIаъан. Ансимшы ауагIа араса йгьайззум, йалкIгIата – ауагIахъа рпхьадзарала ймачIызтын. Сара саща йпачваква Къвбина рыхъаз йхъвмаритI. Са зымгIвагьи рыхъаз сгвы сыхьитI. Апсны сцарныс швабыж йстахъыпI, ауаъа ашIыпIаква пшдзапI, ауагIагьи пшдзапI», – лхIватI апхIвыс.
Йара ауи акIвпI йнашхква шаъу ауи лкытлагIв, Къвбина ахIбачва йрыуу Бала Рамазангьи. Ауи VII Абаза хъвмарраква ауи аъара уагIа ъазырддаз зджьара йгIанымхауата дайгвыргъьун.
«АуагIа заъара рыцIа йщардазлакIгьи рахIа йагъьпI. Йыжвбума, ачуанква хъвыпI? ЗымгIва гIахIрайгвуштI, зымгIвагьи йшаквнагауа апш йнагIдасуаштI! Анкъвакъвраква джьащахъвапI, акытква зымгIва йгIартыцIын аспортсменква гIайтI хIдыргвыргъьара, рылшараква хIдырбара ахIатырла. ЗымгIвагьи дахIвра рзыхIтахъпI, ауаса, ажва гьалам, хIа хIчIвква айгIайырныс хIтахъыпI! Апсны ргвыпгьи абзираква рзыхIтахъпI. ЙайгIайуаш йара йгIахIнарбахпI», – йхIватI ауи.
Абазакви апсуакви райщчвара гIаликIгIауата ахъацIа уахьчIва йапшымкIва йани йаби йанырзаманыз апсуаква рыцIа йшрыщтаныкъвуз гIаликIгIатI.
«ХIахIбачва Апсны йауу райщчва рыцIа йрыщтаныкъвалун, абызшваквагьи рыцIа йаргванын ужвы ацкIыс. Ауаса ащхъаква хIагIвыршитIта мачIкI хIычвыхъарахатI. Уамайгвыргъьушта йагьаъам ужвы йгIадзынгылуа абанпара ащтаныкъвара ацIасква ъатагIащтIырххуа. Ансисквша хIычкIвынчва Апсны агвыргъьахъвква анаъу йцалитI, ауылагьи йгIатыцIитIта ауагIа араъа йгIайлитI, йабабитI, йхъвмаритI. УахьчIва ари ауыс адызгалыз зымгIвагьи къайматпI, АлахI дырзыразхатI», – йажва далгатI Бала Рамазан, ари йапшу агвыргъьахъвква рыцIа йщардазларнысгьи дхIвахIватI.
АйгIайри анбжьагIври
Июль а 23 волейболли футболли анкъвакъвраква йрылаз ахIвссакви ачкIвынчви агвып хъвмарраква рпны йастI. Ргвыпква рпны Апсни Къвбини айгIайтI. Ауат ранйара акIвпI VII Абаза хъвмарраква йгIвбахуз рымш злагIалагазгьи.
Ставрополь кытмлыкврхIара университет 5 акурс йапхьауа ТIапIанта абзазагIв ХъагIва Альберт Къазма рыхъаз дгIахъвмаруан.
«ХIара араъа хIайгIайта йащтагIайуа Абаза хъвмарраква хIпны йакIвхIыршара хIтахъыпI. Акыт йауу щардагIвы апхьара акъалаква йцатI, ауаса апхынла тшпсщара хIпынква хIгIайхитI, ауи агIамта ахъвмарраквагьи акIвшитI. ХIара ауат йазалхта тшрызхIрыхIазыритI. Дасу дызлазлуш анкъвакъвраква алыхIхитIта ауи анархарала тширыхIазыритI – рыцIа бзита штшгIайырбуш апшта. Йацы футбол хIасуан, Апсны йауу ачкIынчва хIрабадыртI. Са Апсны сцарныс йсгвалапI», – йтахъыраква хIыцагIвишатI ачкIвын.
Ахъвмарраква рпны акомандаква йырзалхыз аспорт анкъвакъвраква ракIвымкIва (футбол, волейбол, метр 100 гIагIвра, нахъгIахъ, пара, хIахъваущтра, хрихыцаущтра, швокьла хысра датшагьи) апшыгIвчва рыхъазла ахъвмарраквагьи адыргалтI (шашкIа, дартс, хъчыла айсра, ауасамцара), ауат йызтахъу дрылал йауашын. АчкIвынчви ахIвсси йрыуата йапшым анкъвакъвраква йрылазлузгьи аъан. Апсуа волейболасчва рыуа азджьакI йгьи йпун, швокьли сагIындакъли йхысуан.
Гвдауыта йауу аволейболасыгIв Хагба София Къарча-Черкес апны йакIвшалауа Абаза хъвмарраква йапхъахауата дрылан. Ауи Лагъь КIавкIаз ашIыпIаква шпшдзадзу гIалылкIгIатI.
«ХIпны уылапш абыхъв йапшIахитI йа амшын агьагьарала йджвыквлитI, араъа акIадзакви апсыхIвакви хIгIакIвдыршитI. Апсабара уыла гьазхъум! Къвбина кыт ъачIву швабыж йпшдзапI», – ллахIвараква хIзыгIахъылтIтI апхIвыспа.
Апсны агвып ркапитан, АААК апны ашIыпIа хъвшараква рынхари чкIвыныргIа рджьгарри агвынзыргIвуа Берзениа Валерий апсуаква айгIайрамкIва ргвы датша штам йхIватI.
«Ага аспорт квпшыраквакI йрылазлуш ачкIвынчви ахIвсси йапхъахауата ахъвмарраква йгIарылалызтынгьи, зымгIвагьи рнашхква щтIыхпI, абакIра йазыхIазырпI. РыцIа йымчу йакIвпI йайгIайуаш, хIаргьи «тшагIвыгIжвуштI» – хIшымчызлуш апш. ХIара айгвара хIазгылапI, ауаса айгварала гирь гьузыщтIыхуашым. Щымта асахIат абыжьба аъарагIвшара хIгIагылын хIчатI – ащажьгIагылра хIчвхIатлан, ауаса уымгылкIва йгьамуашызтI. ХIайчважватI, хIшхъвмаруаш хIаквчважватI, хIгвква абащтIыхтI. ЩардагIвы КВН анакIвхIыршуз хIабадырхьан. КъЧР хIгIайищтарагьи бзидздзагIв шIыцта хIрабадыртI. Йацы, Абаза уагIа ркультура амш анакIвшуз, апсуа баракъ хIымата йанырба йгIахIыдгылын тшхIдырдыртI, швабыж гвапата йгIахIпылитI араъа абзазагIвчва. Футбол хIанасуазгьи щардагIвы йгIахIылалуата хIдыргвышхвун. Ауыгьи швабыж йхIгвапан!» – йнашхква хIыцагIвишатI Берзениа.
Анкъвакъвраква йырзынархаз айззара
VII Абаза хъвмарраква йгIайыз асасчва гвыпква рызкъыла йырпыралуан: мамырсали бахсымали йырчIархIуан.
Абаза хъвмарраква йцIыхъвахауата йъакIвшаз АлбыргIан кыт йауу ачкIвынчва тшчва гвыпта тшазыркIкIытI, йамдахауа акубок рыцгIаргын акъвбинаква йрырттI – ужвы йайгIайуаш акыт йырнапIыцIарцIахырныс.
Ахъвмарраква ргIахътIра йазынархаз айззара акIвзыршуз Абаза театр актриса Къвныжв Ратхи аблогер, ажвлара уысхагIв ДзыгIва Амирани ажва КъЧР АуагIа Райззара аунашвачпагIв йтарагылыгIв, Адуней апсуа-абаза конгресс ЙхIаракIу асовет аунашвачпагIв, «Алашара» Дуней адкIылара апрезидент Эгьзакь Мусса йыйттI. Ахъвмарраква гIахъитIуата Эгьзакь Мусса сынчIва ауат КъЧР сквшы 100 ъахъыцIуа йшазынадырхауа йхIватI.
«Аспорти азгIвадари ргвыргъьахъв хIара бзидздза йыгIбауа хI-Къарча-Черкес асквшы 100 йазынахIырхитI, ареспублика шкъагIушгьи хIазхIвахIвитI. Аспорт хIара хIаднакIылитI, агIвычIвгIвыс йхIаль арыбагъьитI, хIпахь йхIыргылуа ахачIв баргвква шхIзырхъйуш апш къару гIахIыланацIитI. ЗхIаль аспорт пещ апны йызсайуа, абаргвыраква йырчвымшвауа, анбжьагIвра тшазызбжьауа агIвычIвгIвыс дымчхитI, йхъагвы аквыта дцитI йаргьи йашым анархараквала йдырракви йылшаракви йшрылайырхIуш дащтазлитI. Ауи йапшу уагIала йалу ажвлара – жвлара згIвадапI, ауат ракIвпI хIкъраль ду ауачIвымш ащата щтIазцуш. Сара йстахъыпI сквшигIадзагьи [айщчва] хIтгIачва ду рыцIа-рыцIа йазхIарныс, хIкытква йырхъазымкIва адуней шабгу йбзазауагьи тшгIахIыдыркIылларныс. СшвайхIвахIвитI ари аспорти азгIвадари ацзакIыри ргвыргъьахъвла!» – йхIватI Эгьзакь Мусса.
Ауи дацIачIвагъватI афестиваль муратдта йаму абаза уагIахъа адкIылра, йзгIваду абзазаща, физкультура, спорт тшауацIдрыхра шакIву. Ауыла йгIауахвырквын ари ауыс агIвычIвгIвыс кIьыдаквагьи, ажвларагьи, акъральыгIва шабгугьи рсабап алапI.
«Афестиваль айщчвара зыщату анкъвакъвракви йбайу хIкультури хIрыланагитIта дасузлакIгьи хIгвы апны рахIа йагъьу ахIальква гIанарыцIситI», – йгIаликIгIатI Эгьзакь Мусса.
Трыквшта йауу хIабашталагIвчва рыхьызла йгIайззакваз тшырзынайырхатI Адуней апсуа-абаза конгресс ЙхIаракIу асовет йалу, Трыквшта апны АААК ашта хъвшара унашва ахъызцIауа ХIапIатI АхIмад.
«Спот тшадызкIылуа агIвычIвгIвыс хъа йхъапI, гвы йымапI, йакъыль цIарапI. Ауи йапшу ауагIа рспорт гIарбара хIаракIква йырхъазымкIва рхIаль-шангьи хIаракIыпI. Спорт йапщылу зымгIва хвы рзызбитI. Зджьара йгIанымхауата уырзыразхуштагьи йаъапI ауат спорт тшадыркIылра ахъазла алшараква рзыгIанзыршауа агIвычIвгIвысква. Ауи ззысхIвауа АААК ЙхIаракIу асовет аунашвачпагIв Эгьзакь Мусса йакIвпI. АлахI дизыразхатI ауи ари ауыс ду ахъазла. РахIа йбаргвызлуш швымш аква йшвтахъымкIва йангIаквауа акIвхаргIатI, йагъьу швымшква ари уахьчIва хIымш гIальамат ацкIыс рыцIагьи йбзихаргIатI», – йалйыргатI йажва ХIапIатI АхIмад.
Агвыргъьахъв апны Къвбина кыт йауу аспортсмен шIа, «АшIара» саби спорт апхьарти хвитта абакIрала «Абаза» клуби рбжьамата, Россия ауацIала чкIвыныргIа рквта хвитта абакIрала анкъвакъвраква рпны йхпахауа агыларта зкIыз Къвапсыргьан Расулгьи йайхIвахIвтI йгьи йчIархIтI.
Ахъвмарра арыхъвартакви агIарбаракви
Анкъвакъвраква зымгIва йалакIу ргIарбараквала ахъвмарраква рпны Къвбина кыт айгIайын Эгьзакь Мусса йамдахауа акубок ауат ркапитан йнапIыцIайцIатI. ЙгIвбахауа агыларта АлбыргIан йыркIытI, йхпахауа – ДарыкъвактI. АсогIа хъада сквшыкIла йайгIайыз акыт йырзыгIанхитI, ахъвмарраква ракIвыршара зкьазухуш апшвымаква йгIалырхитI. Акъвбинаква VIII Абаза хъвмарраква акIвдыршарныс Дарыкъвакт йрыквдырпшын ахIальыуахъылпа ауат йрырттI.
Ахъвмарра – хъвмаррапI, ауаъа уыззымпшдзауагьи уанйитI. Ари азынгьи ауатдъа йгьахъвдаквымцIтI. Ажва ахъазла, нахъгIахъ апны зымгIвагьи АлбыргIан айгIайуашта йхъвыцуан. Ауаса финал апны ауат рацкIыс рахIа йхвыцу абаза кытква йрыуу акъарапагваква мчыта тшгIадырбан апхъагылара тыргатI.
НахъгIахъ апны акIвпI апшыгIвчва рыуа рахIа щардагIвы апсуаква йъарылаз. Згвы пшку апшвымаква «ржьы рыхьуан».
«ШвычкIвынчва гьшвмырчума? Алаба йапшпIи йгIаталкваз. МандарингIвацала швалымцIуа жьы дшврыфла», – йхIватI апсуа гвып рахьыла йщтIаз йгвы цIикIгIауа хъацIакI.
Апсны акоманда йалакIу агIарбараквала ацIыхъвала йгIанхатI. Ауаса волейбол йасуаз ахIвссаква апхъагылара гьаурымщттI. ХIспортсменкаква ашахIатквагьи йгIалыркIгIатI.
«Апсны йанакIвызлакIгьи волейболла гвып мчы гIаргитI. Швабыж йбзипI йазалхта спорт йапщылу агвыпква арат хIанкъвакъвраква рхъа йачварымщауа тшъарымчпауа, йъагIарылалуа. ХIкытквагьи ауат йъарыцхъвмаруа тшыбжьарата йырзалитI, даргьи рыцIа-рыцIа тшгIащтIырхитI», – йхIват ахъвмарраква рсектретарь хъада ЧкIала Георгий.
Ауи йгIацицIахтI анкъвакъвраква спортсмен 315-гIв шрылаз, апшыгIвчва рпхьадзара 3000 йшайхIаз.
«Тамамдзата йшвтахъызтын – 3100-гIвы. Ауи аъарагIвы дырчатI», – амацIауыгIвчва йгIайыртыз апхьадзара хIзыгIахъитIтI ЧкIала Георгий.
«Абаза» культура-спорт фестиваль асквш 2014 йгIашIарышвта йакIвшалитI. Аспорт гвыргъьахъв абаза кытква, Апсны, Ставропольшта ркомандаква гIайлитI. Анкъвакъвраква йырпшырныс йанакIвызлакIгьи КъЧР акытква йгIартыцIитIта уагIа щардагIв гIайззитI – ркытква ргвыпква йрыцыркIра, йдыргвышхвара ртахъыта.
швталра йа тшаншвцIара атахъыпI.