АшIыцраква 03.10.2023 17:15 3528

Очамчыра апхьагIвчва рквта футболла йапхъахуз ачемпионат ари амтшаша, сентябрь а 29, йалгатI

СквшбжакI ауацIа Очамчыра район йауу жвипщкомандакI АдзыгIвбжьа, Тамыщ, КвтIол, Марквыла, Гвып кытква йгьи Очамчыра къала ртопасыртаква рпны ахъвмарраква акIвдыршун. Йшалу йгIауахвырквын анкъвакъвраква 9-10 сквшы йырту цIайчвата 130-гIв рылан.

Ачемпирнат акIвыршара згIаджвыквцIару Очамчыра район аунашвахъцIарта чкIвыныргIи спорти руысквала ахъвшара акIвпI. Анкъваквъраква радгалра ахчала йацхърагIаз Адуней апсуа-абаза конгрессгьи рылапI.

Ачемпионат Очамчыра атопасырта апны гвыргъьахъвыта йхъыргIвахтI. Ауи Апсны АйгIайри Ахъахвитри рысквш 30 артлапIара йаквдыршватI. Очамчыра район аунашвахъцIарта чкIвыныргIи спорти руысквала ахъвшара аунашвачпагIв Пачулиа Тимур айззара йалаз, йгIадгылыз сальам райхуата тшырзынайырхатI. Ауи анкъвакъвра адгалра йацхърагIаз зымгIва дшырзыразу йхIватI.

«УагIа щардагIв гIацхърагIата йакIвшаз ачемпионат арайон ахъазла магIны змаз, сабапра злаз уыста йалтI. Анкъваквъра ъадзакIвшуз агIамта ауацIа хIара йыгIбун ацIайква йхъвмарпхьадза рыцIа-рыцIа йшрызхIуз, йшбагъьахуз, рылаква шгъьазгъьазуаз. ХIгвыгъитI хIапхъахьыла акомандаква рыцIагьи йщардахушта, йалкIгIата – акытква рчIвква. Ауаса йалуазтын – ачемпионат рыцIагьи йауырахуштI», – йгIаликIгIатI Пачулиа.

ЧкIвыныргIи физкультури тшауацIдрыхрала АААК ахъвшара аъачIвагIагIв Квициниа Есма ари йапшу апректква апхъахьылагьи йрыцыркIырныс йшхIазыру лрыбагъьатI.

«АААК ЙхIаракIу асовет аунашвачпагIв Эгьзакь Муссагьи агвып шабгугьи рахьызла ареспублика ахъаз магIын ду зму ари апш уыс ъадыжвгалыз ахъаз хIшразу швасхIвитI. ХIара йанакIвызлакIгьи хIхIазырпI чкIвыныргIа рызхIара йазынарху апроектква йрыцхIкIныс, хIгвыгъитI арат анкъвакъвраква ужвы ансисквшагьи йакIвшалушта», – лхIватI Квициниа.

Атурнир ацIыхъвагIарбараквала апхъагылара Очамчыра 2-хауа апхьарта йтнагатI, йгIвбахауа агыларта Тхьына кыт, йхпахауа – Беслахв кыт йыркIытI. Анкъвакъвра йалаз зымгIва Швача йыргата ауаъа «Фишт» стадион апны октябрь а 7 йакIвшуш «Зенит» йгьи «Швача» футбол командаква ранйара йадырпшуаштI.