АААК ашIыпIа хъвшара гIандыршатI Адуней апсуа-абаза конгресс ащтийыгIвчви Гал район абзазагIвчви ранйара апны январь а 25 атшын.
Барганджиа Саид
Адуней апсуа-абаза конгресс ащтийыгIвчва январь а 25 атшын Апсны Гал район апны абзазагIвчви дари ранйара адыргалтI йгьи йакIвдыршатI. Ауат айззара йалаз а-Конгрессгьи ауи анхарагьи йгIаргванхауа агIамта апны хачIвыта йдырхъйарныс рмурадугьи йрыхадыргIвазатI.
Анйара апны Гал къала апны а-Конгресс ашIыпIа хъвшара асовет гIандыршатI.
Ахъвшара дахъадахатI Инал-ипа Тенгиз. АААК ашIыпIа уысхарта йалалтI Берулава Элеонора, Латария Циала, Лабжания Дмитрий, Зыхвба Эдищер, Инал-ипа Диана, Кучуберия Инал.
АААК архъйагIв секретарь Гицба Инар анйара йалакваз йшрайхIвызла, а-Конгресс ашIыпIа хъвшараква ргIаныршара магIны ду азырбитI. Ауи швапхата йгIайгтI Апсны Ткъварчал район апны йакIвшаз анйара, ауаъагьи ашIыпIа хъвшара асовет гIандыршатI.
Айззара далан Гал район ахъада Надарая Темур. Ауи а-Конгресс ауысхагIвчва ргватра арайон йъазынадырхаз, абзазагIвчва а-Конгресс йалалырныс йъадрайгваз ахъазла дшырзыразу йхIватI.
«Арайон ахъада йъанатIа нкъвызгауата йшсылшауала ауыс йшацскIуашла швсыргвыгъитI. Анчва дшвзыразхатI швъахIызгIайыз. Ари ауыс бзи апны йшвыцхIкIырныс хIхIазырпI», – йхIватI Надарая.
А-Конгресс уалал йшауаш, АААК йалу дзачIвызлакIгьи йхатI магIныта йаму дрылачважватI АААК ЙхIаракIу асовет йалу Алшунба Инвер.
«Швара арайон абзазагIвчва рыцIа бзи йыжвдыритI баргвырата йаъуи ауат зрыдзуаш амалькви, ауи ахIатырла хIара хIыхъазла магIны амапI шваргьи анхара швалазларныс. ХIара зымгIвагьи хIацацхърагIара атахъыпI, тшадхIкIылырквын хIыуа дзачIвызлакIгьи къарута йыму хIзадкIылуаштI», – йхIватI ауи.
ЙащтагIайуата абзазагIвчва рпахь йгIачважватI АААК чкIвынргIи апхIвыскви рсоветква рунашвачпагIвчва.
«ХIара йацхIырхъйарныс хIмураду апроектква хIымапI. АшIаква йрылшауала йхIыцыркIуашта хIгвыгъитI», – йгIаликIгIатI чкIвынргIа рсовет аунашвачпагIв Торчуа Леван.
АпхIвысква рсовет аунашвачпагIв Ардзынба Гета йшылхIвазла, ауи хачIв хъадата йлпхьадзитI «абзазагIвчва дара-дара йрхъйачIву ажвлара уысква гIащтIырхларныс, йынкъвырцаларныс, рырхъйара ркъару аларцIарныс йаквыргвышхвара. Апхъахьыла Апсны арайонква зымгIва рпынгьи йаъазлуштI ажвлара уысква джьгарта йрыдынхалуаш агвыпква».
Анйара апны йгIадырбатI бызшва щардала йынхауа а-Конгресс ахабарргарта портал. Ахабарргарта портал апресс-секретарь Барганджия Саид асайтгьи ауи атштагIвра ахъгалраквагьи дрылачважватI.
«Йызтахъу зымгIвагьи тшанырцIата ауаъа йту адырраква зымгIва гIадрысабапырныс, апсыуа-абаза уагIа йрыуу адунейла йырзыпшгIарныс рылшуштI», – йгIаликIгIатI Барганджия.
ЙгIайззакваз Адуней апсуа-абаза конгресс йрыцынхауа «Алашара» адкIылара анхара йгIаквчважвауата ашвъаква йгIархъыху афильм ддырбатI. «Алашара» абазаква рбзазара
уысква рырхъйара, ауат джьгарта рыдынхалра апны хвысквша рурала йшвапха бзипI, йхIаракIу агIарбараква рымапI абаза кытква рпны аспорт йгьи акультура ртшауацIыхрала, йакIвдыршитI йалачпу анаука нхарагьи.
Адуней апсуа-абаза конгресс ауысхагIвчви Гал район абзазагIвчви ранйара гIвбахитI, ари йапшу анйараква акIвшуштI Апсны Республика анахьанат арайонква, акъалаква зымгIва рпынгьи. Анйараква рпны Апсны абзазагIвчва а-Конгресс анхара йахадыргIвазуштI, ауат АААК йалалырныс, ауи анхара тшадыркIылырныс йаквгIазшIыртуата, йаквдыргвышхвауата йрачважвуштI.
швталра йа тшаншвцIара атахъыпI.