Астомбыль йангIакIвшауа йъагIашIасуа ачарта, КIавкIаз адиаспора йрыуу ауагIа ранйарта, апсабара фачIвквала йадгалу амацIауырта гвапа… Трыквшта акъала хъада апны апсыуа ресторан датшагьи йызладжьащахъву шваханаргIвазуштI АААК арепортаж.
Ардзынба Аста
Апсыуа айшва апны йхъаду рызкъыпI амамырса. Апсны апны ауи асасчва ртамщакьква кIьыда-кIьыда йаквдырчIвауамцара йгIартарцIитI. Трыквшта апны ауи айшва шабагу йазхъушта тамщакь дукI йтата йгIахвындыргылитI. Ауи амщтахь тшыт-тшыт йагIвыршитI. Араса акIвпI йшаъу «Сылашара» ресторан апны.
«Тамамта апсыуа мамырса умацIаура ахъазла йгIашуа адзы уашIамсуа йугIватIуамцара анартыхв шыла псейспа йтаупсара атахъыпI», – араса ймацIауыща амадзаква хIыцагIвишитI Садзба Хальук. Ауи йщала дапсыуапI, Астомбыль дтабзазитI, мильуанпхьадзара уагIата йызтабзазауа амегаполис апны апсыуа рызкъква ъармацIауа аресторан заджвыкI дапшвымапI.
Трыквшта апны апсыуаква анартыхв гIважь ашыла гIадрысабапитI. Хальук йхъагвы аквыта йхIвитI араса амамырса амацIауыща апхъанчIвиква йшырчпуз рыцIа йшашIырпшу. АрыхIазырща Апсны апны йшацIасу апшта акIвпI йшаъу, ауаса Хальук джьыкIа мачIкI алайпситI, Апсны апны ауи гьцIасым.
ХIчIвква рыхьазлагьи анахьанат зымгIва-зымгIва рыхъазлагьи
Садзба Хальуки йхъапщыла Храча Гьулайи ресторан нархара зму ахIаракьатчпара йалищтара хысквша цIитI. Хальук адгалра уысква йырхъйитI, Гьулай дмацIауыгIв хъадапI. АтгIачва руыс тшауацIнахитI, агIарбараквагьи бзипI: абзазагIвчва аресторан ргвапхитI – Хальук йабашталагIвчва ракIвызтынгьи атачIв трыквква ракIвызтынгьи. ЙгIалкIгIара атахъыпI «Сылашара» (ахьыз урышв бызшвала «мой свет» гIаныцIитI – аредакция ррытаразга) атрыкв блогерквагьи Астомбыль агидквагьи йшыргвапхаз. Анатгьи аратгьи араъа щардала йсаситI. Апсыуа рызкъква: мамырса, къвыддзырдза, квтIужь расадзырдза агьиква – акъала афачIвква чIащыгIвара рыларцIатI, ауи йаларпшырта шIыцхатI.
Ага ауаса йаъазтынгьи аресторан апшвымаква зымгIва рацкIыс йыргвапапI «Сылашара» Астомбыль, аргван шIыпIаква йыртабзазауа апсыуаква, абазаква, адгьаква йъарынйартахаз. Араъа ауагIа анйитI, агвыргъьахъвква акIвдыршитI. Апсны абзазагIвчва атрыкв къала хъада йангIайра аресторан апны йсасырныс, ауи апшвымаква йрабадырныс гIартахъхитI. Апсыуа фачIвква йгIадрыбергьыльтI уыжвгIандзара апсыуа квтаква рфедерация анхара йачвыхъараз абашталагIвчвагьи. Ауат рыуа щардагIвы аресторан аунашва анырдырра уыста йырчпитIта рсабихъа злагIаргвалашвахауа арызкъ хъгIаква ршIадыршварныс Хальук йызгIайитI, араъа рыбызшвалагIвчва йрабадыритI.
АфачIв пкъыгIваква зымгIвагьи акыт йгIатыргитI
«Сылашара» атдзы гьдууым, ауаса гвлахIарата йадгалапI, Астомбыль Азия тланыкъва апны йаныргIалпI. АуацIа аквпшыра апсыуа цIасквала йадгалапI, амацIаура апны йгIадрысабапуа ахIвраква аныла-арыла йкIныхIата йпшшитI, авитрина апны рхъатала йдрыхIазыруа аджьыкIьа хвынгылапI. Хальук йшихIвауала, аресторан апны йызламацIауа афачIв пкъыгIваква зымгIвагьи цкьапI, аргваныта йчIву апсыуа кытква рпны дцитIта йгIайгитI.
«ХIызламацIауа афачIвква акыт апны йгIадырхарджьитIта арызкъгьи ахъгIара уылаухIвитI. Сара сыхъазла ауи швабыж магIны амапI. ХIызламацIауа афачIвква зынгьи акъала ткванква рпны йгьсхвгIум, ага ауат араъа йщардазтынгьи, йаргванызтынгьи. Сара апсыуаква дара-дара ашвы ъахъырхуа, нартыхв ъагIадриуа, аквтIуква ъаркIуа акытква рпны сату счпарныс рыцIа йгIалсхитI», – йхIвитI Хальук.
Садзба Хальук апсыуа бызшвала цкьата дчважвитI, Апсны дцалитI, йапхъанчIви псадгьыл апныла йгIатыцIуа ахабарква дрыздзыргIвлитI. Ауи Трыквшта апсыуа диаспора рыжвлара нхара джьгарта далапI. Астомбыль Апсыуа культура квта апны ауи даламкIва, йджькIахбаста аламкIва айззаракIгьи гьакIвшум.
АпхIвыс аресторан «псы гIахъалцIитI»
Хальук «Сылашара» дакъыльпI хIхIвузтын ауи йхъапщыла, ажва аламкIва, аресторан псы гIахъалцIитI. Гьулай апсыуа рызкъква рмацIаура лан лпны тшазылбжьатI, ауахьауыгьи ла лан лпны. Ауи акIвпIта, амацIауыща абанпараква йгIамырдауа йгIамгIвайсуан. ЗымгIва рацкIыс йхъадугьи рмацIауыща апхъа йшаъаз апшта йгIанхатI. Гьулай йылмацIауа афачIвква рхъгIаралагьи ррыхIазырщалагьи Апсны апны апшвыма пхIвысква йырмацIауа йгьгIахьшвум. Ауаса айшва гIвычаща датшапI. Амамырса айшва трыкв цIасла йшгIаквдыргылуа хIалачважвахьатI. Арахьари апхъанчIви рызкъы – акъвыд – араъа хьшвшвата айшва йгIахвындыргылуа йгIамгIвайсуан, ауаса Апсны йауата «Сылашара» ресторан йгIайлауа асасчва апшвымаква ауи йшбылуа йгIахвындыргылуата йазырбжьатI: ауаса акIвпI рцришта апны йшырчпауа.
Уцри тшгIва реклама йгьазыбжам
Хальук йшихIвауала, ареклама ахча гьаквирыдзуам, йатахъытагьи йгьаъам. Асасчва ауралагьи йгIайуа уагIапI. Ауат аресторан ахъаз хъгIата йъамацIауа чартагIвацата гьакIвым йшырпхьадзауа, ауат рыхъазла аресторан мильуанпхьадзара ъатабзазауа Астомбыль апны «Апсны йадзыгIвбжьапI», рцри тшгIва, ркультура йахацпI.
Хальук апхъахьыла йуыхварныс йгвыгъьапI абацкъьагьи (бацашшыла йырчпуз апсыуаква рапхъанчIви тдзычкIвын – аредакция ррытаразга), тшгIвагьи йхътIу мца ацIхъыйыртагьи амата. Ауи йшипхьадзауала, абацкъьа закIы йапшымкIва апсыуа культурагьи апсыуа уагIахъа мацIаурагьи йыргIарбагапI, йырдамыгъапI. Хальук йгвалапI апсыуа рызкъ хъгIаква ъармацIауаш абацкъьа согIата йырзичпарныс Трыкв йтабзазауа апсыуа-абаза диаспора.
швталра йа тшаншвцIара атахъыпI.