АААКи «Алашара» жвлара адкIылари апсуа-абаза уагIахъа ргвбайара йазынарху апроект шIыц "Амазара" джвыкврыжьтI.

Адуней апсуа-абаза конгресси "Алашара" дуней адкIылари апсуа-абаза уагIахъа ргвбайара йазынарху апроект шIыц "Амазара" (апсуа бызшвала "йазкIкIу байара, абайара ахчарта" гIаныцIитI – аредакция ррытаразга) джвыкврыжьтI. Ауи гIазхъвыцыз АААК ЙхIаракIу асовет аунашвачпагIв Эгьзакь Мусса йакIвпI.

"Амазара" проект йаланакIуата йапхъахауата уыздынхалра атахъу тынхата агIахIвра гIалырхтI. АААК ауысхагIвчва ауыс бзита йыздыруа аъачIвагIагIвчва рыцта апсуа уагIахъа гIахIвыщакI уыжвгIанчIви чпаща артын видеота йхъырхтI. Аролик АААК ахабарргарта порталгьи адунейла йбергьльу аинтернет тыпквагьи йгIартарцIуштI. Ауи акIвпIта, хIгIахIвыща дзачIвызлакIгьи дзапшуаштI.

Ари агIаджвыквцIара надырдзара ахъазла Апсны апны йбергьльу арежиссерква, авидеографква, агIахIвчва, амакъымршIыйагIвчва тшадыркIылтI.

Апсуа-абаза уагIа ргвбайара йазынарху Адуней апсуа-абаза конгресс "Алашара" дуней адкIылари рпроект "Амазара" апкъ йтата ауагIа рашваква, ауагIахъа литература, цри бызшва, анапIылачпаракви апхъанчIви цIаскви гIазырбауа ароликква ащтагIайуаштI. Авидеороликква Апсни Къарча-Черкеси рпны йхъырхуаштI.