Санкт-Петербург йаъу антропологии этнографии рмузей (Кунсткамера) апны ноябрь а 23 атшын МАЭ РАН КIавкIазла ахъвшара йаднагалыз «КIавкIаз: акультураква ралысырта» семинар акIвшатI.
Асеминар апны дгIачважватI МАЭ РАН антропологияла ахъвшара анаука нхагIв ахIба, абиология наукаква ркандидат Схальахва Роза. Ауи лгIачважвара «Апсуа-адыгьаква ргенофондква: архъвыхраква ртурыхи апхъахьыла ахачIвкви» йырзынархан.
Роза Арамби йпхIа апсуа-адыгьаква йрыуата штакI йбзазауа агвыпква йапшым агенетика амальквала йшдырхъвыхуаз атурых аздзыргIвчва ахалыргIвазатI. Ауи ари ауыс йазынарху анхара хъадаква дрыквгIашIастI, Россия (МГНЦ, УФЦ) йгьи агIвыма къральква йрыуу архъвыхыгIвчва зызгIайыз алкIгIараквагьи гIалхIватI.
Ауат архъвыхраква зымгIва хъадата йгIарылыркIгIаз аквшвитI: апсуа-адыгьа бызшваквала йчважвауа ауагIахъаква зымгIва ргенетикала йаргваныпI. Ауи дрыбагъьитI ауат рыщайдзаквагьи рыбызшваква разарагванрагьи. Ауат апхъанчIви заман агIан Йаргвану Азия йшапщылаз КIавкIаз ауагIахъаква шгIаталуаз атурыхгьи йгIанарбитI. Адоклад апны архъвыхыгIв апхъанчIви ДНК-ла агIвымакъраль лабораторияква аргамта йырчпаз агIарбараквагьи дгIарыквчважватI. Ауи акIвымкIвагьи Роза Арамби йпхIа КIавкIаз ауагIахъаква йырзынарху архъвыхраква апхъахьыла хачIвыта йдырхъйушта йаъу гIалхIватI.
швталра йа тшаншвцIара атахъыпI.