АшIыцраква 21.05.2019 14:15 18000

Акция «Ашьамаҟа» Апсны акъалаква рпны йгьи Трыквшта апсуа диаспора рквтала йакIвшуштI.

КIавкIаз айсра йаладзкваз зджьабауа ауагIа зымгIва адыркIылырныс ахъазла Апсны акъалаква рпны йгьи Трыквшта йтабзазауа хIабашталагIвчва рквтала акция «Ашьамаҟа» анджвыквылра ахъмаштылра лентаква зкьпхьадзара йнадзауата йыршуштI.

Ахъмаштылра лента асквш 2016 агIан йгIархъвыцтI. Алента амакет дадынхалтI Апсны йгьи Россия асуратгIвгIвчва радкIылараква йрылу, Адыгейшта апны гIатгара зму асуратгIвгIвы, Гулиа Дмитрий йыхьыз зхъу асогIат алауреат, Леон йорден анкъвгагIвы Джьапуа Батал.

Алента атхыпха накIылсгIакIылста йчпапI – ромб квпшыра зму ашаныза харта йаларпапI – ауи апсуа джьабара цIасла йадыркIуа ачвамза Ашьамаҟа алаща йадамыгъапI. Амцабыз асурат йгьи йаквгIву асквш 1864 йыргIарбагапI асквшква 1864-1887 рагIан «АмхIаджьырра» ззырхIвауа КIавкIаз ащхъа уагIахъаква мчыла ртгара йаладзкваз рхъамаштылра йазынархата йаркIу ашьамаҟа. Алента ахьапщ-гIважь чва аджьабара чвамза ачваба йахцIарапI, агIважьткъыткъра – ачвамза амцабыз, аквайчIвара – аджьабара, ахъвасатхIва, алгIва, мчыла йтыргаз КIавкIаз ащхъа уагIахъаква йрыуата йаладзыз рыхъазла йаркIу ачвамза къом ркIьагIваса йагIарбагапI.

Алента учгIвыча арма тланыкъвала йкIыдыркIыл йа умахъвшIа йакIвуырша йауаштI.

АААК апхIвысква рсовет аунашвачпагIв Ардзынба Гета йшылхIвазла, акция «Ашьамаҟа» апхъахьыла ансисквша цIаста йакIвдыршалуштI.

«Ахъмаштылра лента ажвлара адызкIылуа хцIарата йщаквгылуаштI, ауи Апсны абзазагIвчви агIвымакъраль абашталагIвчви рацIагылра йазынархапI. Акция йауацIыхта йшакIвшуш хIащтапI, уагIа мгIвайсра аджыпха йтахIыргылныс хIтахъыпI, йауа ухIварыквын уахьчIва ауи тшгIадыркIылуа йалагахьатI Трыквшта йбзазауа хIайщчва. ЙащтагIайуата агеография ауацIыхIхырныс хIмурадпI Иордания, Египет, Лагъь КIавкIаз ареспубликаква, зымгIва рапхъа Къарча-Черкес, хIдиаспора йадкIылата йъату анахьанат акъральква рбзазагIвчва гIацIанакIуата», – лхIватI Ардзынба Гета.

Аджьабара мшы май а 21 йъаквшвауа швхIаусыгIва амапI. Асквш 1864 ари атшын Кбаада ахва (ужвы Россия йаланакIуа Атшшарта Къапщы) апны сквшышвбжакI раъара йакIвшаз КIавкIаз айсра ъалгаз йазынархата айсыгIвчва рпарад акIвшатI. Аурышв ры райгIайра швынзыкьыгIвпхьадзара йнадзуз абзазагIвчва рылахь пнатшытI. Ауат рпсадгьыл кIадрышвта мчыла Осман паштахIыгIвала йайтыпахра атахъхатI, ауыла йтыцIхта анахьанат акъральыква йрылалхуамцара.