АААК апны йгIаныршу АпхIвысква ркоординация совет аунашвахъцIагIв Бебиа Екатерина Апсуара тшауацIнарыхра йазынарху апроектквала анйара акIвлыршатI.
Апсуара агIащаквыжьра йазынарху апроектква йрылапштI Адуней апсуа-абаза конгресс апны йгIаныршу АпхIвысква ркоординация совет ауи аунашвахъцIагIв Бебиа Екатерина ахаша, мартI а 15 атшын а-Конгресс апресс-квта апны йакIвлыршаз алачIвара апны.
Анйара йащтагIайуа ахвысквша а-Конгресс агвып рынхара апны «Апсуара-Абазара йагIамтата» йшаквыргылра ауысла АААК ЙхIаракIу асовет аунашвачпагIв Эгьзакь Мусса адуней шабгу апны йбзазауа абашталагIвчва йрызцауа йтшазынархара йапщылан.
Атшазынархара йгIанахIвитI: «Апсуара-Абазара апсуа-абаза уагIахъа рбзазари ркъагIари йрыщатапI, идеология хъадата йхIзалитI. Ауи йгIалцIла сара хIгвып рынхара апны йащтагIайуа ахвысквша Апсуара-Абазара йагIамтата йхIчпарныс щаквсыргылтI. Ауи йгIаныцIитI къарута йхIыму шабгу хIуагIахъа рыщатаква йрыщату арыбагъьара йшазынархазлуш».
Анйара йалан Апсны Республика арыпхьарала аминистр йтарагылыгIв Кварчелиа Ада, Педагогика аинститут адиректор КIвакIваскьыр Ирина, АГУ апны политологии социологии ркафедра аунашвачпагIв Гамисониа Эмма, апсуа бызшвали литературали арыпхьагIв Аламиа Нонна йгьи Апсны акъральыгIва университет ажурналистика хъвшара астудентква.
АААК апхIвыс совет аунашвахъцIагIв Бебиа Екатерина йгIайззакваз АААК агвып нхарата йакIвдыршауа ралхIвтI йгьи йгIалылкIгIатI а-Конгресс анхара шабгу адуней йыкву апсуакви абазакви адкIылра йахъазымкIва ауат ръадаб-намыс хабзаква – Апсуара гIащаквыжьрагьи тшауацIнарыхрагьи йшырзынарху.
«АААК апны йгIаныршу АпхIвысква ркоординация совет ахачIвква йрылан хIидеология йазынымхакIва йамуаш апроектква – атгIачви асабикви, ахабзакви ацIаскви йырзынарху ауысква. Эгьзакь Мусса ауи апш ажва гIайгын – акоординация совет анхара йанархара хъадахаз Апсуара тшауацIнарыхра акIвпI. Ауаса швари хIари хIалата бзи-бзи хIазымхъвыцкIва ари ауыс апны адахIвра уазынадзарныс агалагьи йбаргвхуштI», – лхIватI ауи.
АлачIвара йалакваз Апсуара агIащаквыжьри тшауацIнарыхри ауыс йалакIыта, шIчIвара-шIчIвара йшата уадгылырныс магIын ду шаму йаквчважватI. Педагогика аинститут адиректор КIвакIваскьыр Ирина Апсны апхьартаква рпны Апсуара йарыпхьара ауысла ужвы йъагIадзазгьи щаквыргылра шаъам даквгIашIастI.
«Апсуара гIащаквыгIыжьра ахъазла цри бызшвали литературали апхьарасахIатквагьи нахъушта хIхъа гIагIжьахырныс йгьгвыбзыгъарам. ХIуагIахъара къазща глобализация агIаншараква йрыламдзра ахIатырла хIара ареспублика апхьартаква рпны Апсуара апхьарасахIатква ргIапсщакI йтагылата йшадыгIгалуаш хIыгIвнапIыкIлагьи уыста йхIкIра атахъыпI», – лхIватI КIвакIваскьыр.
АГУ апны политологии социологии ркафедра аунашвачпагIв Гамисониа Эмма Апсуара аквтанай апхьартаква рпрограмма йахъазымкIва Апсны йхIаракIу апхьартаква рпынгьи факультативта йалацIара атахъыта йылпхьадзитI.
«Са йыздыритI хIхабзакви хIцIаскви апхъала йшаъаз апшта йъанкъвыргаркIвауа Апсны акытквакI рапхьартаква рпны Апсуара апхьарасахIат кIьыдата йшадрыпхьауа. ХIара зымгIвагьи йгIахIгвынгIвитI Апсуара гьаласта йазалуа хIкытква шракIву. Акыт апхьартаква рпны ауи аналарыжьуазара ауи рахIа йазыбжу акъала апхьартаква рпны йалаужьырныс рыцIагьи йатахъыпI», – йгIалылкIгIатI Гамсониа.
Арыпхьарала аминистр йтарагылыгIв Кварчелиа Ада Апсуара апхьарасахIатта апхьартаква рпрограмма йалауцIара ахIатырла «зныбыжьла йапшым апхьагIвчва зымгIва йрыквыргIапста апхьагаква адгалра, арыпхьагIвчва тамамта йрыхIазырра» щатахъу гIалхIватI.
СогIвым 4-зауа аквтанай апхьарта апсуа бызшвали литературали арыпхьагIв Аламиа Нонна зымгIва йырхIваз йацылкIтI.
«Сара цри бызшвали литературали йасрыпхьитIта – йалыргата йызбитI ужвы йщаквгылхьаз абызшвали литературали арыпхьаща апкъ йтата асабиква хIуагIахъа рцIаскви рхабзакви гIазлыцIыз цIолата йшузыгIаргвнымыргIвуаш. Апсуара апхьарасахIат кIьыдата йчпата, ауаъа агвацчпа литература ашвапхаквагьи гIахIрысабапуамцара, ауат хIуыжвгIанчIви бзазаща йанхIыргIалуамца йрахIхIвырквын – хIцIасква хIзыгIащаквыргылхуаштI», – йылпхьадзитI ауи.
Анйара алдыргауата ауи йалакваз АААК ЙхIаракIу асовет аунашвачпагIв Эгьзакь Мусса уыжвласыла йпахь йщтIарцIуш гвгIанаграквакIла йангIалтI.
швталра йа тшаншвцIара атахъыпI.