Адуней апсуа-абаза конгресс йапхъахауата Апсны апны «Абаза» культура-спорт фестиваль акIвнаршуштI.
Барганджиа Саид
Адуней апсуа-абаза конгресс агIаджвыквцIарала Апсны апны йапхъахауата йакIвшуш «Абаза» культура-спорт фестиваль октябрь а 16 гIахъыртIуаштIта хымшкI йнайуаштI. Афестиваль зшIытрата йамапI: «Акультури аспорти хIадыркIылргIатI!»
АААК акIвымкIва афестиваль йадгалагIвта йалитI Абаза-апсуа уагIахъа ртшауацIыхра ацхърагIара знархару «Алашара» дуней адкIыларагьи. «Абаза» фестиваль акIвыршара йацыркIитI Апсны Республика культурали атурых-культура тынха хчарали а-Министерстви физкультурали спортли Апсны Республика АкъральыгIва комитети, Апсны акъральыгIва музейи.
АпхIвысква рсоветква рунашвахъцIагIв Ардзынба Гета йхIпыру агIаншара даквчважвауата акультура-спорт фестиваль акIвыршара ргвышхвагата йазалыз КъЧР апны «Алашара» ашвапха бзи шакIву лхIватI: цысквша руацIа адкIылара ауи апш фестиваль Черкесск апны йаднагаллитI йаргьи ауи апсуа-абаза уагIа швабыж йыргвапхитI.
«ХIгвы йгIанагтI Эгьзакь Мусса йгIаджвыквицIаз ауыс ду апсуаква йдырбазарквын шбзихушыз. Ауи ауыс абаза культура агIащаквыргылхра йазынхитI. Мусса ХIабальа йпа сквшщарда руацIа хIспортсменква, йалкIгIата абакIыгIвчва ахчала дырцхърагIитI. Аратква зымгIва Апсны апны «Абаза» фестиваль акIвхIыршарныс хIаквдыргвышхватI», – лхIватI Ардзынба.
Ардзынба Гета йгIалылкIгIатI культура-спорт нархара зму ари ауыс мурад хъадата йаму Абазашта атурых, ацIасква, ауыжвгIанчIви ршIыйагIвчва здырра зтахъу зымгIва ауат дырбара, йгIадзынгылуа ашIара руагIахъа тшдырра щтIыхра ракIвпI.
Ауи йгIацылцIатI уахьчIвала чкIвыныргIа тшызларбжьауа «Интернет йгIатырхуа, апсуакви абазакви йырцIасу агвбайара йанымгIалуа субкультура щарда йырзынарху ахабарква» шракIву.
«Ауи йгIалцIла апсуа жвлара апхъала йрылаз абазакви дари рацзакIыра йачвыхъарахатI. Швабыжта йхIтахъыпI чкIвыныргIа абаза уагIахъа алух йшамуаш рыларкIырныс, щарда цIуата йуымбас, ауаса усабихъа зцугаз уайщчва анубара уназахвуа алахIвара рдырныс. Апсуакви абазакви хIуагIахъа культура апны ари ауыс амагIны абгата йгIахъызтIуа ажвагьи рымапI – абабара. Абабара йгIауыланацIауа агвыргъьара ацагIвушитI. ХIара хIайщчва хIызгIайитI, гвыргъьахъв ду хIызгIаргитI – рашваква, ргIахIвраква, ршарабзараква. Ауи йапшу фестиваль хIуыжвгIанчIви культура йахъвыкIхара атахъыпI», – араса йылпхьадзитI Ардзынба.
Афестиваль Адыгея, Къарча-Черкес, Къабард-Балкъар, Лагъь Осетия, Йынгвыщшта, Чачаншта, Дагъстан, ауат ракIвымкIвагьи Калинингради Швачи къалаква йгIартыцIта сасчва гIадгылуашта хIазпшитI.
«Абаза» культура-спорт фестиваль октябрь а 16 атшын Гвдауыта апны Адуней апсуа-абаза конгресс ЙхIаракIу асовет аунашвачпагIв Эгьзакь Мусса йкубок ахъазла хвитта абакIрала анкъвакъврала йгIахъыртIуаштI. Анкъвакъвра гIвымшкI йакIвшуштI. Октябрь а 18 афестиваль Согъвымла йайтыпуштI – ауаъа АмхIаджьырква рдзытшпурам апны йгылу Апсны акъральыгIва драма театр апахь культура программа адгалазлуштI. Согъвым апны агвыргъьахъв асахIат а 13 йалагата джьасыдза йнайуаштI.
швталра йа тшаншвцIара атахъыпI.