АААК ахабарргарта портал аунашвачпагIв, аредактор хъада йагIвсыз асквш агIан ауи анхара шакIвшаз даквчважватI.
Барганджиа Саид
Адуней апсуа-абаза конгресс ахабарргарта портал аунашвачпагIв, аредактор хъада Лазба Амина асквш 2019 агIан ауи анхара шакIвшаз, апхъахьыла хачIвыта йлырхыз дрыквчважватI.
Апхъапхъадза ауи йшгIалылкIгIазла, АААК ахабарргарта портал Апсны апынгьи агIвыма къральква рнархаралагьи шIырпшыра змам проектпI.
Аредактор хъада йшылхIвазла, ахабарргарта портал йгIаквшвауа агIвыраква адкIылара анхара, абаза уагIа ртурых, ркультура, ауат йгIарылцIыз йбергьльу агIвычIвгIвыс дуква йгIарыквчважвауа йахъазымкIва апортал апны тшанызцIаз агIарысабапыгIвчва абазырдыруа, йабазырбауа уатыквта йщаквгылтI. Ауи шабгу «адунейла къраль 50 йыртабзазауа апсуа-абаза диаспора злачважвауа цбызшвакIла йакIвшитI».
«Анхара агIарбараква гIахIахвырквын асквш 2019 йазынархата йлыхIхыз ахачIвква абгата йхIырхъйарныс хIылшатI. Ажва ахъазла, йтыцIхуа асквш апны хачIв хъадата йгылан ймайрамыз ауыс – гIарып бызшвала асайт анхара джвыквцIара. Ари ауыс дахIврала йхъйатI сентябрь мыз агIан. ЙгIалкIгIара атахъыпI апортал агIвыраква джьгарта йшрыпхьауа ангьльыз, трыкв йгьи гIарып бызшваквала, датшата йухIвушызтын арат абызшваквала интернет апны хIкъраль, хIуагIахъа йгIарыквчважвауа, йапымшвтуата йгIаршIыцхуз ахабарква гьтамызтI. Ауи йатаркIвах йгIаныцIитI хIсайт шIырпшыра шамам, алшараква уахьчIвала йшхIаракIу, апхъахьыла амч рахIагьи штшзауацIнахуаш», – лхIватI ахабарргарта портал аунашвачпагIв.
Таниа Кан АААК ауысхарта анхара, ауи ахъахIараква йгьи акврыдзраква дрыквчважватI
Ауи йшгIацылцIахызла, асквш 2019 агIан Апсны, Россия, Трыквшта абзазагIвчва амаль раутI апортал апны онлайн амальла алазара ашвачIвы ршварныс (АААК а-Устав йшгIанахIвауала, сквшыкI апны алазара ашвачIвы 2 долларкI йа сом 100 йнадзитI – аредакция ррытаразга). Асквш 2020 агIан йара ауи апш лшара рымазлуштI асквш 2019 агIан а-Конгресс ашта хъвшара шIыцква ъагIахъыртIыз анахьанат акъральква рбзазагIвчвагьи.
Лазба Амина йшылхIвазла, асайт анхара джвыквлищтара абызшваква зымгIвалагьи йаныргIалта хабар гIвынзыкь райхIа гIаквшвахьатI. Асквш 2019 аурала ауи йталын йапшытI гIарысабапыгIвчва зыкь 70-гIв раъара. Арат апхьадзараква йапымшвтуата йрылахIитI. АгIарысабапыгIвчва ъабзазауа акъральква йрыуата йапхъахауа ажваба йрыуапI Апсны, Россия, Трыквшта, Грузия, Ирландия, США, Германия, Мсыр (Египет), Иордания йгьи Великобритания. Ахабарргарта портал агIвыраква джьгарта йрыпхьитI Евросоюз акъральква йгьи ЙадкIылу ГIарып Эмиратква, Израиль, ГIвадахь Корея, Китай, Япония рбзазагIвчва. Ари ашIыпхьадзара йаланакIитI Канада йгьи Австралия, Латин Америка акъральква йрыуата – Бразилия.
«Сара щардала йгIасцIгIитI йзапш бызшвайа йащтагIайуата апортал зланхушхIва. Уыжвласыла ауи апш гвыгъара гьхIымам, йауа ухIварыквын бызшва щардала асайт анырхара швабыж йъатлапIу йахъазымкIва йгьи аджвыквцIара баргвдзапI: бызшвакI йшатахъу апш йщаквгылра ахIатырла сквшыкI аъара уадынхалра атахъыпI. Ауаса сара заджвыла йстахъын хIгIвыраква китай бызшвали испан бызшвали йгIаквшваларныс. Арат абызшваква йрылачважвауа ауагIа рпхьадзарала адуней апны йапхъахауа агылартаква ркIитI, ауи ахIатырла ауат абызшваквалагьи хIынхазарквын ауи сабап ду хIызгIанагуашын. Асквш 2020 апны апортал йгIаджвыквнацIаз анхара нанардзахуата апхьагIвчва йджьащахъву агIвыра шIыцквали апроект шIыцквали аргвыргъьуштI», – лхIватI Лазба бзигвыгъа шлыму гIалырбауата.
Адуней апсуа-абаза конгресс (АААК) – зтурыхи зтынхи байу адкIыларапI. Ужвы азаман АААК анхара арат анархара хъадаквала йадгалапI: адиаспора гвып-гвып йъабзазауа адуней акъральква рнархарала, ашта нхара анархарала, апсуа-абаза уагIа йрыуу апхIвыскви чкIвынргIи рыдынхалра, бызшва щардала йынхауа ахабарргарта портал атшауацIнарыхра, датшагьи. А-Конгресс йахачIв хъадапI адуней акъральква рпны йбзазауа апсуа-абаза уагIа зымгIва радкIылра. АдкIылара далалырныс йылшитI абаза уагIахъа йрыуу дзачIвызлакIгьи, адунейла дъабзазалакIгьи. Ауи ахъазла Адуней апсуа-абаза конгресс ахабарргарта портал апны аонлайн ахIвара швъа атагIвра акIвпI йчпачIву.
швталра йа тшаншвцIара атахъыпI.