АшIыцраква 09.12.2019 11:50 33934

Великобритания апны а-Конгресс ахъвшара шIыц гIандыршан АААК ашта хъвшараква рпхьадзара йаланархIатI.

Барганджиа Саид

Великобритания акъала хъада Лондон апны Адуней апсуа-абаза конгресс ашта хъвшара АААК ЙхIаракIу асовет аунашвачпагIв Эгьзакь Мусса йхъвдаквцIарала йгIахъыртIытI. Ауи ахабар гIахIайхIвтI АААК ЙхIаракIу асовет йалу Чирикба Вячеслав. Ауи асабша декабрь а 7 атшын нхара уысла Лондон даъата апсуа-абаза диаспора ауысхагIвчва дрынйатI. Чирикба йшихIвазла, анйара апсуа-абаза диаспора йрыуата уагIа 15-гIв раъара алан.

«Араъа йрылачважвун Лондон апны АААК ашта хъвшара анхара шадыргалуаш, чкIвынргIа рыжвла ъану апсадгьыли цри культури бзи йырбауата йгIадзныргылра шатахъу, адиаспори Апсны Республики акультура йгьи арыпхьара уысквала рыцIагьи джьгарта йацынхара шатахъу, АААК анхари йылнахуа ауыс шIыцкви», – йхIватI Чирикба Вячеслав.

АААК ЙхIаракIу асовет йалу йшихIвазла, анйара йалаз зымгIвагьи, йшцIасхаз апшта, анкетаква ргIвыта а-Конгресс йалалырныс йаквгIазшIырттI. Чирикба йгIайззаз зымгIвагьи йгIаргвынйыргIвытI анкетаква электрон амальла АААК ахабарргарта портал апынгьи йыртагIвы йшауаш.

Ауи йшгIаликIгIазла, анйара «пхарала, гвапарала йырчвыта» йакIвшатI.

«Айчважвара апсуа бызшвали ангьльыз бызшвали йакIвшун. ЙгIадыргылуаз азцIгIараква нархарата йрыман Апсны апны аполитика йгьи ажвлара-экономика аъаща, АААК йгьи адиаспораква рыцынхара зхъвдаквцIару ауи ауысхартаква шынхауа. Араъа йгIалыркIгIатI Апсны йгьи АААК рщтийыгIвчви адиаспора рыжвларакви йапымшвтауа анйараква акIвдыршаларныс магIны ду шаму», – йхIватI АААК ЙхIаракIу асовет йалу.

Чирикба Вячеслав Великобритания нхара уысла дцан даъапI. Уыжвласыла ауи Нидерланды йгьи Германия рпны апсуа-абаза диаспора ргIащтийыгIвчва дрынйарныс йгвыгъапI.

Лондон ахъвшара АААК йгIаннаршаз ашта хъвшараква рпны йагIбахитI. УахьчIвала а-Конгресс ашта хъвшараква гIандыршахьатI йгьи йынхитI Апсны, Къабард-Балкъар, Къарча-Черкес, Трыквшта, Ставропольшта, Москва, Санкт-Петербург рпны. Ужвы Иордании Мсыри (Египети) рпны ашта хъвшараква ргIаныршара йадынхалитI. ГIамта айшысла Германия, Бельгия, Голландия, Сирия йгьи апсуа-абаза диаспора ъабзазауа анахьанат акъральква рпны ашта хъвшараква гIандыршарныс ргвыгъапI.