ЦIаста йщаквгылыз атшыгIвра ацIагахра агвыргъьахъв акIвшатI турых зпщылу Лыхнашта атшшара апны. Ауи йалан Гвдауыта район акыткви Афон ШIыц къали.
СынчIва йапхъахауата араъа рыпшцIа адыргалтI Къарча-Черкес Республика агIащтийыгIвчва. Агвыргъьахъв йалакваз йапшым акытмлыкврхIара пкъыгIваква, аунагIва мачваква, анапIылачпараква ргIарбараква адыргалтI, йызтахъыз зымгIва ауагIахъа фачIвква ршIашватI.
«Абаза пшцIа» апны анапIылачпараква, ахIваспаква, асуратква, абаза фачIвква гIадырбатI.
КъЧР йауаз агвып йрылан Абаза-апсуа уагIахъа ртшауацIыхра ацхърагIара знархару «Алашара» Дуней адкIылара, ауи йаланакIуа апхIвысква р-Координация совет руысхагIвчва, «Амра» саби гIахIвчва гвып, анапIылачпараква йрызъазу анхагIвчва.
«Абазаква ари апш гвыпта Лыхнашта йапхъахауата хIгIайтI. ХIара хIгвыгъитI ансисквшагьи ари агIарбара хIызгIалаллушта. Араъа хIгIайра ахъазла хIара йгIахIцхърагIатI Адуней апсуа-абаза конгресс, «Алашара» адкIылара, «Абаза» жвлара адкIылара. Йара ауи апшта хIырзыразпI Абаза муниципал район аунашвахъцIарта ахъада КIвыждза Руслани «Акультури атшпсщари р-Квта» аунашвачпагIв Шай Сусанни», – йхIватI «Алашара» адкIылара ахъвшара аунашвахъцIагIв Гьадыгв Руслан.
АуагIа рхъвмарраква ракIвымкIва араъа йакIвшатI ашвахIвагIвчва йгьи агIахIвчва гвыпква рконцерт. Агвыргъьахъв йахъвыкIта йалтI тшыла аспорт анкъвакъвраква, ауагIахъа спорт хъвмарраква, хрихыцаущтрала анкъвакъвраква.
АтшыгIвра агвыргъьахъв йалапшныс йгIайтI Апсны авице-президент Гвымба Бадра, апремьер-министр АмкIваб Александр, Апарламент аунашвачпагIв Ашуба Лаша, адепутатква. Лыхнашта апны амш шабгу агвыргъьара уылаухIвун. АхIбачва йрыуата щардагIвы ркIвымжвква рышвата йгIайтI. АуагIа рхъвмарра ашIыпIа бзазагIвчва йырхъазымкIва ареспублика асасчва щардагIвгьи гватрадъа йгьгIанырмыжьтI.
Амш алгамта асалют зигIвала йдрыпшдзатI.
швталра йа тшаншвцIара атахъыпI.