АуагIа акоронавирус йачвхъыхчара зхъвдаквцIару акъральыгIва штаб Апсны а-Минфин ахъада йтшазынархара гIаквырцIатI. Ауи йшихIвазла, акъраль апны апандемия ашвхIаусыгIвала ГвжважвагIва аъаща щаквгылазтынгьи абзазагIвчва анхашаквагьи ацхърагIага ахчаквагьи йтарымщахIауата йрыртуаштI.
Апсны апны акоронавирус ашIашIкIгIара згIва атшауацIыхра йапшIагылуа амальква нарахвызтынгьи акъральгIвчва анхашаквагьи ацхърагIага ахчаквагьи абгата йаназаману йрыртуаштI. Абари апш хабар йыргатI Апсны Республика афинансква рминистр Нанба Джансыхв.
Нанба йшгIаликIгIазла, акъраль апны ГвжважвагIва аъаща анщаквдыргыл амщтахь абюджет ахъахIараква зынла йрылдзгIатI. Ага ауаса йаъазтынгьи, Апсны аправительства, апремьер-министр, апрезидент йхъвдаквцIараква зырхъйауа Бганба Валерий ауыс апымшвтуата, лшара амата йахъвдаквырщтныс йащтата амальква нарахвитI.
«АкъральгIвчва анхашаквагьи ацхърагIага ахчаквагьи абгата йаназаману йрыртуаштI. Ажва гьалам, ауи ахъазла хIара абюджет апны акврыдзраква гIазырбауа анархараква хIпсахра атахъхатI. Апрезидент йхъвдаквцIараква зырхъйауа аъанатIанкъвгагIв абюджет нхартаква тшырзынайырхан йалыргата унашва йчпатI анхаши акоронавирус абакIри йырзалху акврыдзраква йырпщыламкIва апхъала рсмета йаларцIаз анахьанат ахачIвборчква рырхъйара ауысла лшара шаъам. Ари адгылща амальынтшапI, ауаса ауи уахьчIвала йхIыму афинанс гIалцIыртаква йхъаду ахачIвква рырхъйара йазынахIырхарныс лшара гIахIнатитI», – йхIватI афинансква рминистр.
Апсны а-Минфин йшырпхьадзауала, агIаншараква гIвхъатакIла йацапушта акIвпI уахьчIвала ауыс зкву: йа гвырбзига алата, йа гврыдзга алата.
«ХIызту аъаща мызкI-гIвымызкI руацIа цIыхъва ачпузтын йхIылшуштI гIамта айшысла аэкономика ащаквысра нахIрыскIьата рахIа ймачIу алдзгIараква хIылсуа абаргвыраква хIгIарыцIсырныс. Ауаса апандемия рыцIагьи йауырахузтын хабза щата амата абюджет шIыц-шIыц хIалапшхра атахъхуштI, датшата йухIвушызтын, абюджет апны йгIарбу акврыдзраква ахъахIрысра атахъхуштI», – йхIватI Нанба.
Ауи йхIваз йацицIахтI Апсны ахчала Россия Федерация «абгата йгьи йщаквдыргылыз апIатла йахъымсуата» йшгIацхърагIауа.
Апсны апны акоронавирус ашIашIкIгIара згIва COVID-19 атшауацIыхра абакIра йацхърагIарныс зтахъу зымгIвагьи амаль рымапI ахча аларцIарныс Апсны Республика апынгьи Россия Федерация апынгьи Москва апсуа диаспора абанк реквизитквала йа«ХIара хIадгылтI» мгIвайсраареквизитквала йгьи Трыкв Республика ахьыла Адуней апсуа-абаза конгресс ареквизитквала, йа а-Конгресс асайт апны онлайн амальла ахча аларцIарныс. Ахчата йгIаталуа зымгIва Апсны абзазагIвчва рынцIри рызгIвадари ргIахчара йазалхта акоронавирус ашIашIкIгIара згIва COVID-19 абакIра йазынадырхуштI.
швталра йа тшаншвцIара атахъыпI.