Сирия ар агенерал-майор, ажвлара йгьи аполитика уысхагIв ду Маршан Уалид Согъвым апны чвахъабага син йзыгIахъыртIтI.
Барганджиа Саид
Апсыуа-абаза уагIа йгIарылцIыз агIвычIвгIвыс ду, Сирия ар агенерал Маршан Уалид Апсны Республика ахъыхчара министерства апшцIа апны апщаша, январь а 24 атшын син йзыгIахъыртIтI. Асин зчпаз апсыуа скульптор Джения Виталий йакIвпI.
Асин агIахътIра знархараз айззара далан Апсны Республика апрезидент Хаджимба Рауль.
Айззара йалаз асасчва рпахь дгIачважвауата ауи йшгIаликIгIазла, агенерал Маршан йыхьыз ауагIа зынгьи йырхъмаштылуашта йаъапI йгьи асин агIахътIра Апсны атурых ахъазла магIны ду зму гIаншарапI.
«ХIуагIа Маршан Уалид зпсадгьыл Апсны апхыцIа анцIралагьи йахъгвыргIвуз, ауи ахъахвитра йазабакIуаз, патриот дута, ацIабырг йазгылаз фырта ргвы дтазлуштI», – йхIватI апрезидент йгIачважвара апны.
Хаджимба Рауль йшихIвазла, йбзазара йцIыхъвахауа асквшква Маршан Уалид Сирия къральыгIва алазрыхъвашарныс змурадыз адуней терроризм дапшIагылата йгатI. Сирия ГIарып Республика шварагIвара аъаща йанташвуз агенерал кьангьаш гIаймырбауата акIыгIвчва рабакIра амгIва дтагылуан. Апрезидент кIьыдата йгIаликIгIатI Сирия йгьи Апсны разазаъащаква рщаквгылра, Сирия ГIарып Республика Апсны ахъахвитра йъацыркIыз ауысла агенерал Маршан йхатI магIны ду шаму.
Сирия агенерал фыррати хъацIарати йгIайырбаз далачважватI репатриация ауысла Апсны аминистр Дбар Беслангьи.
«Апатриот цIабыргы, Сирия ар агенерал-майор йгьи гIатгара ду зму апсыуа уагIа рпа адуней терроризм дабакIуата уыс ду йырхъйатI. Маршан Уалид Сирия йтабзазауа апсыуа-черкес диаспора йрыуата хIара хIхъахвитра ацкIра джьгарта йацхърагIуз агIвычIвгIвыс дуква дрыуазаджвын», – йхIватI аминистр.
Сирия ГIарып Республика ар агенерал-майор Маршан Уалид асквш 1948 агIан Аль-Кунейтра къала апны дйытI. Сирия апсыуа диаспора рпны джьгарта йынхуз ари агIвычIвгIвыс апсыуа уагIи Сирия ауагIи раргванчIвра ауыс къару ду алайцIатI.
Маршан йызнымкIва Апсны даъан. Сирия ГIарып Республика апны йынцIра аурала ауи йапшым аъанатIа хIагIаква нкъвигатI. Асквш 2005 ахъа арра апны къвырльыкъвхара нижьхтI, ауаса асквш 2011 агIан Сирия апны айсра ангIалага йара йгIаджвыквцIарала агъа уыжвгIандзарагьи йпшIагылу зтахъырала тшадызкIылыз айсыгIвчва гвып гIанйыршатI. Асквш 2013 агIан Маршан Уалид Башар Асад йпартия – Аль-Кунейтра къала агIарып социалист щаквыргылхра знархару апартия – дахъадахатI. ЙащтагIайуаз атлахан йпахIба Халид ауи ари аъанатIа апны дипсахтI. Асквш 2017 октябрь а 14 атшын гIамта ауыра йчмазагIвыз Маршан Уалид сквшы 69 йхъицIуата йдуней йхIваджьтI.
швталра йа тшаншвцIара атахъыпI.