Абаза гIвгIвчви атурыхдырыгIвчви ртурых-литература хъвлапны «Абазашта – сара спсадгьыл» Москва ауагIахъаква ртдзы апны йакIвшатI.
Барганджиа Саид
Москва акультура жвлара «Абаза» йадыргалыз атурых-литература хъвлапны «Абазашта – сара спсадгьыл» Москва ауагIахъаква ртдзы апны йакIвшатI йагIвсыз асабша атшын, - араса гIарайхIвтI АААК ахабарргага портал а-Конгресс ЙхIаракIу асовет йалу, Москва акультура жвлара «Абаза» аунашвачпагIв Уырчыкъва Мурадин.
Ауи йшгIаликIгIазла, анйара апны йбергьльу абаза литераторква йгьи атурыхдырыгIвчва Щбзыхва Лариса, Этлыхв Олег, Дзыба Валерий йгьи Огвыз МухIамад ркнига шIыцква гIадырбатI, апхьагIвчва йыргвапхауа агIвыраква йгIарыпхьатI.
«Ахъвлапын йалаквазгьи асасчвагьи йрылшатI алитература гIацIщтра шIыцква тшрыхадыргIвазарныс, агIвгIвчви ауысагIвчви рхъатала йрынйарныс, йрачважварныс, авторква ргIвыраква йгIарыпхьауата йрыздзыргIвырныс», - йхIватI Уырчыкъва Мурадин.
АААК ЙхIаракIу асовет йалу йшихIвазла, алитература хъвлапны йасасын Адуней апсуа-абаза конгресс ачIахIра президент, аюрист наукаква рдоктор Шамба Тарас, Москва адыгьа йгьи абаза-апсыуа диаспораква рахIбачва рсовет аунашвачпагIв, апрофессор Агырба Юрий, датшагьи абаза, апсыуа щардагIв.
«Ари атурых-литература хъвлапны – рыцIа йпхатшу айззарапI йцIыхъвахауа асквшква руацIа Москва абаза жвлара йадыргалкваз анйараква рквтала. АугIа рлахIвараква, ргвгIанаграква йгIадырбитI ауат аршIыйара, йалкIгIата цри литература бзи йшырбауа. Кьангьаш аламкIва ари йапшу анйараква йапымшвтуата йакIвыршарала атахъыпI», - араса йпхьадзитI АААК ЙхIаракIу асовет йалу Уырчыкъва Мурадин.
Уырчыкъва Мурадин йшихIвазла, анйара апны йуысаква дгIарыпхьатI зыршIыйара джвыквызцIагIвацауа апсыуа уысагIв Харчилава Ахрагьи. Ахъвлапын лыршIыйара ъазала йылрыпшдзатI адуней анкъвакъвраква рлауреат, Россия апианист-концертмейстерква ргильдия йалу Къванча Диана.
Алитература анйара адгалра йацхърагIатI Москва апны Къарча-Черкес Республика ркIьыкIвара йгьи Адуней апсуа-абаза конгресс. Атурых-литература хъвлапны «Абазашта – сара спсадгьыл», йа дара адгалагIвчва йшырхIвауала, «Асабша апхьараква», - Москва йтабзазауа апсыуа-абаза диаспора рыхъазла змагIны швабыж йдуу культура гIаншарапI. Ауи йапшу анйараква рбзирала ауагIа йрылшитI ауысагIвчва, агIвгIвчва рхъатала йрабадырныс йгьи дара рыршIыйара дахIвраква рыцагIвыршарныс.
швталра йа тшаншвцIара атахъыпI.