Москва Пушкин йыхьыз нкъвызгауа алитература музей апны Аскьындар Фазиль йюбилей йазынархаз аршIыйара хъвлапны акIвшатI.
Москва Пушкин йыхьыз нкъвызгауа алитература музей апны ахаша мартI а 6 атшын йакIвшатI Аскьындар Фазиль йысквш 90 йадахIвуата йадыргалыз аюбилей хъвлапны. Ауи шакIвшаз АААК ахабарргарта портал йгIаралхIвтI Аскьындар Фазиль йыхьызла йынхауа акультура адуней фонд «АгIвычIвгIвыс йгыларта» аунашвачпагIв Агрба Щазина.
«Аюбилей йара Аскьындар Фазиль йхъатала даламкIва йапхъахауата йакIвшатI, ауаса агIвгIвы йбзазара йкнигаква йрылата йгIамгIвайситI. Ауи ауысла Фазиль йыхьыз злагIалукIгIуш щардапI. Йкнигаква уашIамсуата урыпхьаргьи угвы гьрызчIвум, ауи змагIны цIолу, йгвапу, йгвыбзыгъу алитература йагвыргъьахъв дута йузалитI. Дгьзаджвым, йгьгIвыджьым, щардагIвыпI арат акнигаква ръазагIва пшка ашвырра йачвырхчауата зпсы йахъваз», – лхIватI ауи.
Агрба йшгIалылкIгIазла, йацацхърагIауата ахъвлапын адыргалтI Пушкин йыхьыз нкъвызгауа Москва акъральыгIва музей йгьи Аскьындар Фазиль йыхьызла йынхауа акультура адуней фонд «АгIвычIвгIвыс йгыларта». Ауат йрыцIагылтI Москва апсыуа диаспорагьи.
Афонд аунашвачпагIв йшылхIвазла, аюбилей хъвлапны ъакIвдыршушыз ахъаз ргвы йгIаташвата йгьгIалрымхтI, йшпакIву ухIварыквын йара араъа, Пушкин ймузей апны акIвпI асквш 2011 мартI мыз агIан Аскьындар Фазильи йхъапщыла Хлебникова Антонини «рхьапщ хъвмарра» ъадыртлапIаз.
«Амузей атриум апны, аконцерт зал апахь, Аскьындар Фазиль йкнигаква ргIарбарта аныргIалын. Ауи апш гIарбарта гьнымшасызтI – араъа йаъан йапшым адуней абызшваквала йгIацIырщтыз книга 80 райхIа», – йгIалылкIгIатI ауи.
АршIыйара хъвлапны йалан агIвгIвы йтгIачвагьи – йхъапщыла Антонина, йгIариква Марина йгьи Александр. Фазиль Абдул йпа йгIвыраква дгIарыпхьун Россияла йбергьльу актёр Смехов Вениамин.
Ахъвлапын йгIадгылтI Москва апсыуа диаспора ахъада, АААК ЙхIаракIу асовет йалу Агрба Беслан, Россия апны йазалху хъвдаквцIара нкъвызгауа Апсны агIащтийыгIв Ахба Игорь, Москва акъала дума аунашвачпачпагIв Шапошников Алексей, Россия акультура аминистерства апны амузейква рдепартамент аунашвачпагIв Скворцов Константин, Россияла гIатгара зму азъазара анхагIвы Коковкин Сергей, ашвалацIагIв йгьи ашвахIвагIв Новосельцева Лариса, акинорежиссёр Досталь Николай, датшагьи Аскьындар Фазиль йыхьыз збазара йахъв тлапIахаз уагIа щардагIв.
Аюбиляр йчвахъабагата араъа йгIайззаз зымгIвагьи ашва рзылхIвун Аскьындар Фазиль швабыж бзи йбуз, щардала йыртшхъвуз аопера ашвахIвагIв ду Герзмава Хибла.
АршIыйара хъвлапны далан Апсны акультура йгьи атурых-культура тынха агIахчара рминистр Арсалиа Эльвира. Ауи йгIалылкIгIатI айззара бзита, зымгIвалагьи йнардзата йшадыргалыз.
«Ахъвлапын швабыж йбзийын. Анчва дырзыразхатI ауи адгалагIвчва – Пушкин йыхьыз нкъвызгауа Москва амузей йгьи Аскьындар Фазиль йыхьызла йынхауа акультура адуней фонд. Пхарала, гвапарала йырчвыз айззара йалан ауи дыздыруаз, йыцынхуз, йыршIыйара бзи йызбауа зымгIвагьи», – араса лгвгIанаграква хIыцагIвылшатI аминистр.
Арсалия Эльвира йшылхIвазла, Аскьындар Фазиль дыздыруаз, ауи йгIвыраква рфырква аэкран йгьи асцена апны йгIазырбуз йбергьльу акино йгьи атеатр режиссёрква агIвгIвы йбзазара йауаз агIаншара джьащахъваква гIаргвалашвахуата йрыквчважватI.
«Асасчва хIабашталагIвчва тшырзынадырхауата зыршIыйара шIырпшыра амамкIва йджьащахъвадзата аурышв литература апны йгIаншаз Аскьындар Фазиль дгIадзынзыргылыз Апсны ауагIа йшырзыразу рхIватI. Аскьындар Фазиль культура щарда апызщылуа ацхIа дагIвызапI. Ауи апсыуа дуней пшдза хIагIата йщтIихуа йажва гвапала дазхIвахIвтI», – йгIалылкIгIатI аминистр.
Аскьындар Фазиль сквшы 88 йныбыжьта асквш 2016 июль а 31 атшын абзазара далцIтI. Ртшхъвага щарда йрынкъвгагIвыз агIвгIвы ду йпсра йузыгIащаквмыргылхуаш лдзгIара дута йырзалтI адуней литература жвлара шабгу. Ауи йгIвыраква бызшва щардала йатаркIхьатI йгьи адуней литература тынха азкIкIра хьапщ йалалтI.
швталра йа тшаншвцIара атахъыпI.