Хвду ззызбауа сайщчва, сахщчва, пIатIу зкву сабашталагIвчва!

Апсуа-абаза (абаза), аубых йгьи КIавкIаз йту айщчва уагIахъаква джьабагIа ду рызгIазгыз, хIапхъанчIвиква амхIаджьырра йацIазыргылыз амш йахъыцIуа асквш 156 ахьызла сгвы йгIатыцIуата тшнашвзынасырхитI. Ауат атурых гIаншараква йырцIыхъватшарата тынчта зцришта йтабзазуз ауагIахъа агIвшахатI, Лагъь КIавкIаз ащхъа уагIахъаква радгьылквагьи Апсны аквта аштагьи мцырахатI.

ХIара хIгьахвитым ауат арыцхIагIа гIаншараква хIхъхIраштылырныс, йгьи уахьчIва хIбзазаща тамамта хIадгылта хIуачIвбзазара лашарахара ахъазла йгIахIцхърагIуш ауи ахъмаштылра акIвпI.

Хвду ззызбауа сабашталагIвчва!

ХIара хIуагIахъа рпхыцIа хIахъгвыргIвитI, хIтурых Псадгьыл сабап шазгIагIгуаш хIащтапI. Абарат ауысква ракIвпI зымгIвагьи хIадызкIылуа. ЙахьчIва хIара йазакIу хIуачIвбзазара шаъазлуш, йгIадзынгылуа абанпараква тынхата йрызгIаныгIажьуаш ахъазла джьауапкIра ду шхIыхъвдакву гIахIгвынгIвуата хIбзазитI. МагIны ду амапI хIуагIахъа ртурых рхъмаштылуата, ацзакIыра акъару гIаргвынгIвуата апхъала йчIвырхъарныс. Йаргьи Адуней апсуа-абаза конгресс анхара йалкIгIата йыззынарху апсуа-абаза (абаза) йгьи аубых уагIахъаква рэтнокультура ацзакIыра шбагъьахуш, ауат рыжвлара-экономика йшазхIуш, ркультура штшауацIнахуаш, апсуа-абаза диаспори ауат ртурых Псадгьыли ращтаныкъвара шгIащаквгылхуаш йгьи йшбагъьахуш, айщчвара азазаъащаква рыцIагьи йшцIолахуш акIвпI.

Зтурых Псадгьыл йтам абашталагIвчва джьгарта ауи абзазара йалапI, акультура уысква ртшауацIыхра йацхърагIитI, цри бызшви апхъанчIви цIасква рбайари шгIархчуш йащтапI.

Адуней апсуа-абаза конгресс джьгарта йрыдынхалитI Россия, Трыквшта, Сирия, Иордания, Египет, Европа йгьи анахьанат акъральква йыртабзазауа апсуа-абаза диаспораква. ХIтурых Псадгьыл абзазара анархараква зымгIва ртшауацIыхра ауысла амагIны швабыж йдупI хIара хIдиаспора ркъару.

Хвду ззызбауа сайщчви сахщчви,

КIавкIаз апынгьи адунейла анахьанат аштаква рпынгьи Адуней апсуа-абаза конгресс апхъахьылагьи джьгарта йацхърагIуштI адгьаква йгьи анахьанат айщчва уагIахъаква райгвара арыбагъьара. ХIара хIацIагылта йацыхIчIву акультура байари атурых тынхи йшрызхIуш апшта хIацынхара атахъыпI.

ГвыхътIыла йшвзыстахъпI азгIвадара багъьи абзиракви.

Адуней апсуа-абаза конгресс ЙхIаракIу асовет аунашвачпагIв Эгьзакь М.ХI.