Адуней
апсуа-абаза
конгресс

Адуней апсыуата, абазата йыкву адхIкIылитI

Rus Eng Tur Abk

Abq

Ara

24.07.2020 17:15

АуагIахъа гIахIвраква, ашваква йгьи ауагIа ргIамгIвайсра: Апсны апны Абаракъ амш дыртлапIатI

Абаракъ амш йазынархаз агвыргъьахъв уысква «МотоАбхазия» йгьи RidebikeApsny жвлараква йадыргалыз мотоциклли велосипедли гIамдарала йджвыквылтI.

АгIамдара йызтахъу далал йауан.

Агвыргъьахъв йазынархаз велосипедла агIамдара ахIбачвагьи алан.

Йащтагылаз авелосипедкви амотоциклкви апсуа нып рхъадзгыланта хъарачIвыла йгIаубун.

ДзачIвызлакIгьи йтахъызтын абайкерква дрыдзхъагылата кIартI йхъыйхуан. Ауи зтахъыз щардагIвын.

Агвыргъьахъв асасчва рыуа щардагIвы – дугьи хвыцгьи – уагIахъа фаша ршвырцIатI. АзджьакI рчгIвыча АкъральыгIва баракъ амш ахъазла йырдзахытI.

Агвыргъьахъв йгIадгылыз азджьакI фаша зышвата йгIайкваз йрыдзхъагылата сурат рхъырхныс ртахъхатI.

Асасчва зымгIва рыхъазла гIарбарта адыргалтI. Ауаъа йазкIкIын йапшым агIамтаква рагIан Апсны баракъта йрымаз зымгIва.

Амш йагIаншара хъадахатI Апсны Республика ауагIа рартист Тарба Арвелод акъральыгIвара агIарбага хъада йнапIыцIакIта запхъа дгылаз ауагIа ргIамгIвайсра.

АуагIа ргIамгIвайсра йалан фаша зшвыз афакелнкъвгагIвчва.

АгIамгIвайсра дзачIвызлакIгьи далал йауан.

ЙгIамгIвайсквуз йрылан агIахIвчва гвыпквагьи.

ЦIаста йщаквгылтI метр 20 зуру, 10 метркI ганыта йызму Апсны акъральыгIва баракъ АмхIаджьырква рдзытшпурамла йагIвгара.

Апсны акъральыгIва баракъ агьатан ду адуквагьи ахвыцквагьи йгIаргуан.

АгIамгIвайсра амщтахь ауагIахъа гIахIвраквали ашваквали йалаз гвыргъьахъв концерт акIвшатI.

Аконцерт йапшырныс йгьи йаздзыргIвныс щардагIвы гIайззатI.

Агвыргъьахъв адгалагIвчва йдрыхIазырыз апрограмма йаналгагьи ауагIа цIыхквтадза йгьамцIымцIхтI: ашва рхIвун, йгIахIвуан йа ргвы чIвандзыкIьа йайчважвун.