АААК Трыкв Республика акъалакви арайонкви рпны а-Конгресс ашIыпIа хъвшараква рсоветква гIахънатIуаштI.
Барганджиа Саид
Адуней апсуа-абаза конгресс ашIыпIа хъвшараква рсоветква Трыкв Республика апны йгIахъыртIуаштI – ари апш хабар гIайыргатI нхара уысла октябрь а 5 Трыквшта йцаз а-Конгресс архъйагIв секретарь Гицба Инар.
АААК архъйагIв секретарь йхIватI зтшын ауаъа дцаз Трыквшта апны йгIаныршу апсуа культура квтаква р-Федерация (Апсуафед) аунашвачпагIвчва дшрынйаз, Астомбыль апны АААК ашIыпIа хъвшара асовет гIандыршарныс щаквыргылрагьи шнарахвыз. Ауи ахъазла йатахъу ашвъаква зымгIва уыжвласыла йагвындыргIвуаштI, йрытамамтI Гицба.
Ауи акIвымкIвагьи ауи йхIватI анйара йалакваз АААК уагIа шIыц нахвра йапщылу ауысквагьи йшрылапшыз. Анйара йалакваз йара ауаъа а-Конгресс йалалтI.
«ЗымгIва драпхъата а-Конгресс днарахвырныс дахIвауата швъа йгIвытI Трыквшта апны йгIаныршу апсуа культура квтаква р-Федерация аунашвачпагIв Акусба Атанур. Йара ауи йапшта ахIвара швъаква ргIвытI апсуа культура квтаква р-Федерация аунашвахъцIарта йалу зымгIва, Астомбыль апны йгIаныршу апсуа культура квта аунашвачпагIвчвагьи рылата», – йхIватI Гицба Инар.
Трыквшта апны АААК ашIыпIа хъвшараква рсоветква гIахътIра ауыс даквчважвауата Апсуафед ахъада Акусба Атанур йгIаликIгIатI апсуа-абаза уагIахъа йрыланакIуа рыхъазла а-Конгресс адуней шабгу йыкву апсуакви абазакви «зыкв ацIахь йазызкIкIыз йштыдз дуу».
«Ауи акIвпIта, араъа йаъу акультура квтаква зымгIва хIара (Апсуафед – аредакция ррытаразга) йшхIчIву апшта Адуней апсуа-абаза конгрессгьи йачIвыпI, – йпхьадзитI Акусба. – Йаргьи хIаларпата хIынхузтын хIуагIа радкIылра, адиаспори хIыжвла ъану хIпсадгьыли ращтаныкъвара рыбагъьара ауысква рпны адахIвра дуква хIымазлуштI. Апсуа культура квтаква р-Федерация рыцIа йымчхузтын, рыцIа йабаркIызлузтын а-Конгресс рыцIа щарда алшуштI, агIвадкIыларакI абарыбагъьуштI, рынхара рыцIа йдрымайруштI».
Апсуафед аунашвачпагIв йайззакваз йгIаргвалайыршвахтI апсуа культура квтаква р-Федерация АААК ауысхагIвчва йрыцта Трыквшта апны нхара ду шакIвдыршауа.
«ХIабашталагIвчва ъабзазауа ашIыпIаква зымгIва хIырзынадзара, хIайщчва адхIкIылра, ауат а-Федерациягьи а-Конгрессгьи ршвъаква йрынхIцIара атахъыпI. ХIара [ужвыгьи] зымгIва рпны хIгьнамдзастI. Уыс щарда хIпырапI, хIара хIанйалитI, ауат хIрылачважвитI», – йхIватI Акусба.
Ауи дацIачIвагъватI уахьчIвала хачIв хъадата хIпахь йгылу адуней йхъылапсу хIабашталагIвчва «зымгIва рыхъазла йазакIу мурадкI лыхра» шакIву.
«УахьчIвала ауыс шаъу араса акIвпI: Египет апны мурадкI рымапI, Иордания апны – датша закIы, Трыквшта апны – йхпахауа. ХIмурад йаразакIызара атахъыпI, ауи зымгIвагьи хIалата хIазынхара хIборчпI. «Мурад» – ансхIвауа йгIанысщтуа арат ракIвпI: йапхъахауата – хIуагIахъа гIахчара, йгIвбахауата – хIуагIахъа тшдырра рыбагъьара, йхпахауата – хIпсадгьыл хIцахра ахъазла лшара гIаныршара. Ауи амщтахь ахIаракьатчпагIвчва, аспортсменква, датшагьи агвыпква дара разыгIальаматраква йгIарыквхта штшадыркIылуашгьи уацхърагIа йауаштI. Абарауи акIвпI хачIв хъадата йхIпыру», – йпхьадзитI Акусба Атанур.
Ауи дшхъвыцуала щардагIвы йнадзауа апсуа-абаза диаспора руацIа ауысква шаъу бзи-бзи йууырдырта йалыргара атахъыпI, ауи «хIабашталагIвчва рдунейпшыщи ртшдырри рыцIа йгIахIгвынгIвырныс йгIахIцхърагIуштI».
Адуней апсуа-абаза уагIахъа рконгресс архъйагIв секретарь Трыкв Республика апны нхара уысла октябрь а 13-дза даъазлуштI. Ауаъа дъадзану апсуа-абаза уагIахъа йрыуата Трыквшта Анатолия шта (Трыквшта аквта йаныргIалу ашта – аредакция ррытаразга) апны йбзазауа дрынйарныс хачIвыта йыргылтI.
швталра йа тшаншвцIара атахъыпI.