Лагъь КIавкIаз апны йаныргIалу МарагIайырташта АкъральыгIва музей афилиал апны Апсны акультура йгьи атурых-культура тынха рминистерства йгьи Адыгейшта акультура аминистерства мачвы зцIарцIаз культура ацынхарала амеморандум апкъ йтата акультура-гIарбарта проект «Апсны. Атурых, акультура, ауыжвгIанчIви бзазара» апрезентация акIвшатI.
Баранджиа Саид
Акультура-гIарбарта проект «Апсны. Атурых, акультура, ауыжвгIанчIви бзазара» анакIвшуз Адыгейшта акъала хъада Майкъвап апны йакIвшатI агIарбарта «Апсны асуратгIвгIвчва», асуратхъыхра гIарбарта «АпхъанчIви Согъвым архитектура» йгьи айшва гьажьы «УыжвгIанчIви дуней апны акультура тынха агIахчара. Азаман азшIытраква, абаргвыраква, апхъахьыла квгвыгъараква». Апроект апрезентация Лагъь КIавкIаз апны йаныргIалу МарагIайырташта АкъральыгIва музей афилиал апны ахваша февраль а 22 атшын йакIвшатI.
Апсны ащтийыгIвчва гвып дырхъадан Апсны акультура йгьи атурых-культура тынха рминистр Арсалиа Эльвира. Ауи АААК ахабарргарта портал йшгIаралхIвызла, апроект «Апсны. Атурых, акультура, ауыжвгIанчIви бзазара» архъйара Апсны акультура йгьи атурых-культура тынха рминистерства йгьи Адыгейшта акультура аминистерства рацынхара знархару амеморандум апны йгIарбан.
«Апроект хIырхъйауата хIара хIызлачважвауа Апсны атурых йгьахъазым, уахьчIвала магIны зму ауысквагьи гIащтIыхIхитI – атурых-культура тынха агIахчара, аршIыйара гIаджвыквцIараква рыргвышхвара. ХIара зкультурали згвбайарали йадкIылу хIуагIахъапI (араъа зунашва лхIвауа апсыуакви адыгьакви ракIвпI – аредакция ррытаразга), йгьи кьангьаш аламкIва йсхIвитI ари апш ацынхара хIащтаныкъвара рыцIагьи йшауацIнахуаш», – лхIватI Апсны акультура йгьи атурых-культура тынха рминистр.
Арсалиа Эльвира йшгIалылкIгIазла, ауат арат амшква руацIа магIны зму ауысква дырхъйатI. Ауат йрыуазакIыпI ареспублика асуратгIвгIвчва радкIылара йахъыцIуа асквш 80 йадахIвуата йадыргалыз агIарбарта «Апсны асуратгIвгIвчва». Ауи агIарбарта Майкъвап апны ужвыгьи мызкIы аъара йынхуштI, уадыргIвана Санкт-Петербург йгьи Москва йгIарыкIвшуштI.
АгIарбарта апны йаныргIалпI асуратгIвра, аскульптура, аграфика йгьи анапIлачпара-рыпшдзага азъазарала йбергьльу аршIыйагIвчва рынхараква. Датшагьи агIарбарта дрыпшдзауата араъа йаныргIалпI апсыуа уагIахъа фашаква. Афашаква зрыхIазырыз акультура аминистр Арсалиа Эльвира лакIвпI. Ауи Апсны асуратгIвгIвчва радкIылара йгьи Россия адизайнерква радкIылара дрылапI, Гулиа йыхьыз зхъхIвалгIу акъральыгIва согIат далауреатпI.
«ЙалкIгIата хIара хIыхъазла магIны амапI агIарбарта Адыгейшта апны йъагIахъыртIыз. ЙацадыгIгалуа ауысква зымгIвагьи хIакъыль аквшвауата, пхара хIызбжьата хIрыдгылитI», – абараса ллахIвараква хIыцагIвылшатI Арсалиа Эльвира.
АгIарбарта «Апсны асуратгIвгIвчва» апны даъан Адыгея Республика акультура аминистр Атулев Юрийгьи. Ауи йшгIаликIгIазла, абари йапшу агIарбартаква ракIвыршара рыцIа йауацIыхта йунардыритI Апсны ауагIа ркультура.
«ХIара хIащтаныкъвара ацынхара джьгарла йырчвыпI, йалкIгIата йцIыхъвахауа асквшква руацIа. Ари акция акIвыршара збзиру Апсны ауысхагIвчви хIари хIацынхара знархарата мачвы зцIахIцIаз ангIалра акIвпI. Швабыж амагIны дупI аршIыйагIвчва рабадырра, райгвара. АсуратгIвгIвчва рынхараква ухъатала уырпшырныс, уыла йабарныс ахъазла щарда атахъыпI. ХIара апхъахьылагьи хIацынхара рыцIагьи штшауацIнахуаш хIащтазлуштI», – йхIватI Атулев.
Датшагьи акультура-гIарбарта проект «Апсны. Атурых, акультура, ауыжвгIанчIви бзазара» йаланакIуата йакIвшатI асуратхъыхра гIарбарта «АпхъанчIви Согъвым архитектура». Апсны акультура йгьи атурых-культура тынха рминистерства апресс-къвырльыкъвхарта ахабар шдыргазла, агIарбарта апны йаныргIалпI АпхъанчIви Согъвым шIырпшыра зламам акъральгIв архитектура. ХIХ асквшышв ацIыхъва, ХХ асквшышв агIаталымта рагIан йхъырхыз асуратква абгата йгIадырбитI акъала архитектура тынха абайара. Ауат уыла йгIацIаржьитI сквшы 2500 зхъыцIуа Согъвым къала ауыхвара агIамтаква ращтацаща.
«Ари асуратхъыхра гIарбарта адгалагIвчва мурадта йрыман Апсны архитектура аквпшыра шаъу йадкIылата апшыгIвчва ахадыргIвазарныс. Асуратква йгIадырбауа ауыхвараква рщарда ареспублика атурых-культура тынха йазалху акъральыгIва ашIыпхьадзара швъа йаныпI йгьи Апсны Республика акультура аминистерства йаланакIуа атурых-культура тынха адепартамент ахъпшылра йахъвыпI», – араса йгIанахIвитI апресс-къвырльыкъвхарта рхабар.
Айшва гьажьы «УыжвгIанчIви дуней апны акультура тынха агIахчара. Азаман азшIытраква, абаргвыраква, апхъахьыла квгвыгъараква» анакIвшуз ауи йалакваз йгIащтIырхтI аглобализация аъаща йгIаквхта ацынхара йазынарху ауысква йгьи апхъахьыла йыздынхалуаш ахачIвква гIадрыбергьыльтI.
Акультура-гIарбарта проект «Апсны. Атурых, акультура, ауыжвгIанчIви бзазара» акIвшатI асквш 2010 июнь мыз агIан Апсны акультура йгьи атурых-культура тынха рминистерства йгьи Адыгейшта акультура аминистерства мачвы зцIарцIаз культура ацынхарала амеморандум апкъ йтата.
швталра йа тшаншвцIара атахъыпI.