Къарча-Черкес апны «Абаза» фестиваль хышвыгIв йнадзауата йапшым ахагIагвква йыртабзазауа абаза-апсыуа уагIа ргIащтийыгIвчва азнакIкIытI.
Барганджиа Саид
Апсыуа-абаза хъвмарраквала йгIахътIхатI Йхвбахау акультура-спорт фестиваль «Абаза». Ауи сынчIва йадыргалтI Абаза-апсыуа уагIа ртшауацIыхра ацхърагIара знархару Адуней адкIылара «Алашара» йгьи Адуней апсыуа-абаза конгресс (АААК).
АААК ЙхIаракIу асовет аунашвачпагIв, «Алашара» адкIылара апрезидент Эгьзакь Мусса йшгIаликIгIазла, аконгресс ацхърагIарала афестиваль сынчIва рыцIа йауацIыхта йадгалахатI, ауи йащтагIайуата ахъвмарраква йапхъахауата йгIарылалтI Трыкв, Сирия, Йордания йгьи Къабардпщ ргIащтийыгIвчва.
«Абаза хъвмарраква рнархарта гвынгIвырапI: аспорт акIвпI йгьи абари йапшу ахъвмарраква рбзирала хIнашх бзихитI, гвы ахIымтдзакIва хIаргванхитI, тгIачвакIта тшадхIкIылитI. ХIацIагылата уыс дукI ацхIырхъйарныс хIылшитI. ЦIаста хIхъа йазщаквхIыргылитI азгIвадари амчхъари рынкъвгара», – йхIватI Эгьзакь Мусса.
АААК аунашвачпагIв йшипхьадзауала, ахъвмарраква рмурадква йрыуазакIыпI чкIвынргIа азгIвадара бзазара цIаста йъарылархIвауа: «аспорт – бзазара цIаспI».
Ахъвмарраква ртшауацIыхра шымгIвайсуа гIайрахауата Мусса ХIабальа йпа йгIаликIгIатI анкъвакъвраква радгалра шагъьчIвхаз. Ауи йшихIвауала, апхъала йгIаншуз агIващагIараква рыдзхатI, анкъвакъвраква йгIарылалуа рпхьадзара йалахIатI, ауат ъауу ашIыпIаква ргIвынаква тшауацIырхтI.
УахьчIва абаза хъвмарраква йгIарылалтI адунейла апсыуа-абаза уагIа ъабзазауа акъральква йгIартыцIыз хышвыгIв райхIа.
Культурала Къарча-Черкес республика аминистр Барокъва Рамазан ахъвмарраква ргIахътIра знархараз айззара апны дгIачважвауата ареспублика ахъада Темрезов Рашид йыхьызла асальам ажваква йхIватI, ахIвахIвра ажваквала йгIайззаз тшырзынайырхатI.
«ХIара хIадызкIылуа агвыргъьарамш сазыразпI. Ари агвыргъьахъв агвлахIара йазынархапI, ауи йаквшахIатхитI ахъвмарраква йгIарылалыз ауагIа рцришта гIвынаква ртыбгIара», – йхIватI Барокъва Рамазан.
Йхвбахауа апсыуа-абаза хъвмарраква йапхъахауата йгIарылалтI Ставрополь шIыпIа абазаква руагIахъа-культура жвлара ргIащтийыгIвчва гвып.
«Ари агвыргъьарамш апны йхIылшитI хIабабарныс, анбжьагIвчва шIыцква хIрабадырныс. ЙхIгвапапI ахъвмарраква хIгIарылалырныс ъахIылшаз, апхъахьылагьи ари ацIас шхIзынардзушла хIгвыгъитI», – лхIватI Ставропополь шIыпIа агIащтийыгIвчва рунашвачпагIв, ашIыпIа жвлара апредседатель, АААК ЙхIаракIу асовет йалу Чагва Армида.
Агвыргъьарамш агIахътIра знархараз айззара далан Апсны агIащтийыгIвчва рхъада, АААК ЙхIаракIу асовет йалу Кварчия Нури. Ауи йгIачважвара апны акультура-спорт фестиваль адгалагIвчва разыра ажвала тшырзынайырхатI йгьи йгIаликIгIатI абари йапшу агвыргъьарамшква рыцIа щардата йакIвыршалара шатахъу, йшпакIву ухIварыквын ауат адунейла йхъылапсу апсыуа-абаза уагIа радкIылра йазынхитI.
«Сара апхъалагьи сыла йабатI ахъвмарраква шакIвшауа йгьи швабыж йсгвапапI. Араъа хIаквшахIатпI чкIвынргIа рабадырра шгIацIсуа, йалкIгIата ауи хIуагIахъара агIахчара ахъазла амагIны швабыж йхIаракIыпI», – йгIацицIахтI Нури Еремей йпа.
Анкъвакъвраква радгалагIвчва сынчIва йазалху асогIатгьи щаквдыргылтI: сквшы 80 ъайхъыцIуа йадахIвуата ауи йыхьыз ахъхIвалгIапI йбергьльу апхьахьа, ажвлара йгьи аполитика уысхагIв Шамба Тарас.
«ХIара швабыж йхIгвапата ауи акубок азабакIра гIаджвыквхIцIатI. Тарас Мирон йпа данчкIвыныз футбол йъачIвагIата дасуан, ауи ахIатырла чIахI ду йзыхIчпауата акубок зымгIва йрагъьу афутбол гвып йырнапIыцIахIцIарныс йщаквхIыргылтI», – йхIватI Эгьзакь Мусса.
Абаза хъвмарраква Къарча-Черкес апны йхвынхауата йакIвшитI. Ауи йгIалалуа аспортсменква рбзазарта гIвынаква ансисквша рыцIа-рыцIа йауацIыххитI, Россия ашта шIыцквагьи агIвыма къральквагьи гIащтIнахитI.
швталра йа тшаншвцIара атахъыпI.