Къарча-Черкес Республика йгьи Къабард-Балкъар Республика рабаза жвлара адкIылараква ацынхара ауысла ангIалра мачвы ацIарцIатI Черкесск апны йапхъахауата ргвыргъьахъв анйара анакIвша амщтахь.

Барганджиа Саид

Къарча-Черкес Республика йгьи Къабард-Балкъар Республика рабаза жвлара адкIылараква руысхагIвчва ранйара анакIвша амщтахь КIавкIаз ауагIахъаква ркультури ртурыхи рырхъвыхра аквта «Абаза» йгьи абаза жвлара адкIылараква рассоциация «Апсадгьыл» ацынхара ауысла ангIалра мачвы ацIарцIатI.

АААК Къарча-Черкес Республика ашIыпIа совет аунашвачпагIв йгьи Абаза-апсыуа уагIа ртшауацIыхра ацхърагIара знархару адуней адкIылара «Алашара» авице-президент Мыхц Рамазан АААК ахабарргарта портал йшгIарайхIвызла, абаза жвлара адкIылараква ари апш джыпха йтагылу ранйара йапхъахауата йакIвшатI йгьи ацынхара ауысла ангIалра мачвы ацIацIарала йалгатI.

«Мачвы зцIахIцIаз ангIалра мурадта йгIанарбитI абаза уагIа рапхъанчIви культура агIащаквыргылхра йгьи агIвреспубликакI рпынгьи анахьанат ашIыпIаква рпынгьи хIуагIахъа йырзынарху адырраква ракIвгашара», - йхIватI Рамазан анйара шакIвшаз даквчважвауата.

Адуней апсуа-абаза конгресс Къабард-Балкъар Республика ашIыпIа совет йгьи КIавкIаз ауагIахъаква ркультури ртурыхи рырхъвыхра аквта «Абаза» рунашвачпагIв Пшенокъва Владимир ари йапшу анйаракви апхъахьыла акультура знархару ацынхари магIны ду шрыму гIаликIгIатI.

«ЗымгIва йрапхъата хIацынхара щатата йамазлуш акультура акIвпI. Ауи йгIацIанакIуата Къабард-Балкъар апны абаза бызшви апсыуа бызшви ртшауацIыхра знархару ауысква ацхIырхъйарныс хIгвыгъапI», - йхIватI ауи.

Пшенокъва Владимир гватра азйымата датшагьи йшгIаликIгIазла, ари ацынхара «Апсадгьыл» ассоциация йалу абаза жвлара адкIылараква ршвапха тшахадыргIвазата рынхара апны йгIадрысабапырныс рылшуштI, ауи Къабард-Балкъар йту апсыуа-абаза диаспора ррыбагъьара йацхърагIуштI.

Ауи акIвымкIва ангIалра йгIацIанакIуата Къабард-Балкъар Республика апны абаза уагIа ркультура акIвыргашарныс ахъазла Къарча-Черкес йауу абаза ршIыйагIвчва гвыпква рконцертква адыргалырныс рмурадпI.

Ацынхара апкъ йтата Къарча-Черкес Республика йгьи Къабард-Балкъар Республика рабаза жвлара адкIылараква ари йапшу анйараква йапымшвтуата йакIвдыршаларныс йангIалтI. Анйараква рпны ацынхара йгIацIанакIуа ансимш уысква йрыквчважвалуштI.

Адуней апсуа-абаза конгресс Къарча-Черкес Республика йгьи Къабард-Балкъар Республика ршIыпIа хъвшара советква асквш 2018 агIан йгIандыршатI. Ауат йырхъадахатI АААК ЙхIаракIу асовет йалакву Мыхц Рамазан йгьи Пшенокъва Владимир