КъЧР а-Парламент аунашвачпагIв дитарагылыгIвта йалырхыз Адуней апсуа-абаза конгресс ЙхIаракIу асовет аунашвачпагIв Эгьзакь Мусса ауи аъанатIа апны уыста йхарныс йгвыгъу АААК ахабарргарта портал йгIарайхIвтI.
Сентябрь а 25 агIан йакIвшаз Къарча-Черкес АуагIа Райззара асессия апны Адуней апсуа-абаза конгресс ЙхIаракIу асовет аунашвачпагIв Эгьзакь Мусса а-Парламент аунашвачпагIв дитарагылыгIвта далырхтI. АААК ахабарргарта портал дгIарачважвауата ауи ари аъанатIа апны уыста йхарныс йгвыгъу гIайхIватI.
Эгьзакь Мусса шIыцра гIаныршари адахIвракви ртурых йгIвуа дъалагаз запш аъам атшауацIыхра шта «Гранд Каньон» ъагIанйыршаз Санкт-Петербург апны акIвпI. Ауи ашта Россия апны змагIныла йгIвбахауата йгIайуа акъала абзазагIвчви асасчви ахьъахъуа квтата йалтI. АунашвахъцIара швабыжта дъазычпу, ауагIа йырмагIну ъайзыдыруа, йбзазара швапха, йадикIылыз анхагIвчва гвып – аратква зымгIва алата адахIвра амгIва лыркъьатI, йаргьи асквш 2016 агIан йжвабахуз адуней инвестиция форум Proestate-2016 апны «Гранд Каньон» «ХвгIахвтра нархара зму йатдымрыпауа ахъатачIвыра» номинацияла ажвасквша руацIа йагъьыз уыхварата ахьыз гIархIватI.
«ХIара ауи ашIыпIа йахъадзгылаз аура хIпсахтI, атгIачви асабикви ртшауацIыхра ахъазла йатахъу зымгIва ауаъа йадхIкIылтI. ХъахIара гIазгра атахъу апроект анлыхIхуаз хIара зымгIва йрапхъата хIыззхъвыцуаз агIвычIвгIвыс араъа йгвы нагьуа, йгвы йазгIайуата дшыгIвназлуш, Россия апны йгIадзынгылуа абанпараква багъьата, йымчыта йшгIацIасуаш акIвын, – йхIватI Мусса ХIабальа йпа. – Ауи апшта, «Гранд Каньон» апны йгIаныршу аспорт клуб «Лидер спорт» апны «Асаби спорт академия» нхитI, ауи асекцияква рпны цIайта зкьыгIвпхьадзара тшырбжьитI. ХIара Россия йахъазымкIва Европагьи адунейгьи рчемпионква гIадзынхIыргылхьатI».
АхIаракьатра апны зуысква ащтацауа Эгьзакь Мусса «Алашара» жвлара адкIылара йалу йцIагылагIвчва йыцта жвасквша райхIа цIитIта Лагъь КIавкIази Апсни рпны абаза уагIахъа рыбызшва, рцIасква, ргвбайара гIащаквыжьри тшауацIдрыхри йырзынарху агуманитар проектква йырхъйитI.
«Зуыс здыруа анхагIвчва гвып ануыцу, уыста йучпара атахъу анудыруа, КIавкIаз ауагIаква рцIаскви ркультури щатата йануыму – аратква зымгIва закIы йапшым къару мчы гIандыршитI, – йгIаликIгIатI Эгьзакь Мусса. – ХIара хIынхара бзиракI зчпарныс зтахъу ауагIа гIаланахIыркIитI, ауагIа рдунейпшыща хIпсахитI, ркъаруква йрызхъарцIауата йхIчпитI. Сара йхъасцIитI йбагъьу, зуагIахъа бзи йызбауа ажвлара гIаныршарала йлыхIхыз аджыпха швапхата йнахвта хIреспублика арайонипхьадзагьи Россия аштаква зымгIва рпынгьи йгIарысабап йшауаш».
Эгьзакь Мусса йхIватI арат асквш къомкI руацIа ауи акытква, акъалаква, ареспублика рунашвахъцIартаква дрыцынхауа дшащцаз. ЙырхIаз ашвапха даргвышхван «аполитика ахьыла тшынайырхарныс» гвы йчпатI.
ШIыцта йалырхыз КъЧР а-Парламент аунашвачпагIв йтарагылыгIв йгIаликIгIатI ашта апны ахабзалыхра ауагIагьи ахIаракьатчпагIвчвагьи рбзазари рынхари шагъьхуш йазынйырхарныс дшащтазлуш.
«ХIара (абазаква – аредакция ррытаразга) кIьыдата датша заджвгьи дъаным дзыгIвбжьакI апны хIгьбзазум, ауаса йанаъазара уагIахъа щардала йалу хIреспублика апны йхIчпалакIгьи – ауысква рырхъйащала мгIва тамам лыхIхуазтын – ауат амальква йхIыгвлу анахьанат ауагIахъаквагьи ласыта йнарахвитI», – йхIватI ауи йгьи йгIацицIахтI Къарча-Черкес акъральыгIва власть йхIаракIу ауысхарта апны хабзалыхрала анхара «зымгIва йрапхъата йшхъвдаквцIара дуу».
АААК ЙхIаракIу асовет аунашвачпагIв йъанатIа шIыц апны уыста дыздынхалуаш йхIватI.
«Йбаху аюрист хIваща уакъвыцIырквын уахьчIвала зымгIва йрапхъата йспхьадзауа асабиква бжьара, ауагIахъаква рыбызшваква гIахчара, арыпхьаща анадзара агъьчIвра ракIвпI. ЙалкIгIу гватра рзыбачIвпI апхьартакви асабигIзартакви, йауа ухIварыквын хIкъраль ауачIвымш зпщылу сабипхьадза йылахIцIауа акIвп», – йхIватI Эгьзакь Мусса.
Ауи йгIаликIгIатI «абызшва агIащаквыжьра» «ауагIахъа гIазхчуш уыста» йшалуа.
«ХIара йхIтахъыпI а-Парламент ауатыкв гIахIрысабапта рыцIа йалыргата, йхътIыта, гвыцкьала йгьи ауыс йахъвауата абызшваква ргIащаквыжьра хIаквчважваныс. ЗапшуагIахъазлакIгьи, рыцIа йауацIыхта йгIауахвырквын – акъральыгIва шабгугьи щатата йырзалуа абызшва гIазхчуш къральыгIва программа лыхымкIва амаль гьамам», – йхIватI Эгьзакь Мусса.
Йажва цIхъва айтуата КъЧР а-Парламент аунашвачпагIв йтарагылыгIв КъЧР а-Парламент анхара дахIвра шамазлушла йгвыгъараква хIыцагIвишатI.
«Багъьата йхъасцIитI АуагIа Райззара адепутатква йацIагылта алхыгIвчвагьи йрыцыркIуата йынхарыквын адахIвра бзиква хIшырзынадзуш. ХIара рахIа йбаргву ауысквагьи хIырхъйарныс хIхIазырпI», – дацIачIвагъватI ауи.
АуагIа Райззара аунашвачпагIв йгIвтарагылагIвчва ръанатIаква КъЧР а-Парламент атурых апны йапхъахауата асквш 2019 агIан йгIандыршатI. Ауат ркIытI Эгьзакь Мусси Асланыкъва Альбини. Ауи анхара ахъазла ауат нхаша гьгIаргуашым.
швталра йа тшаншвцIара атахъыпI.