«Алашара» жвлара адкIылара Черкесск апны йгIаныршу ахъвшара аунашвачпагIв йтарагылыгIв, хвитта абакIрала абжьагIвы Чква Расул спортла Россия Федерация а-Министерства йщаквнаргылыз АуагIахъа спорт согIа гIатигатI.
Барганджиа Саид
«Алашара» жвлара адкIылара Черкесск апны йгIаныршу ахъвшара аунашвачпагIв йтарагылыгIв, спорт тшауацIнарыхрала ахъвшара аунашвачпагIв Чква Расул акытква рпны физкультура-спорт нхара зымгIва рацкIыс бзита йъадигалуа ахъазла спортла Россия а-Министерства йщаквнаргылыз АуагIахъа спорт согIа «Спорт зымгIва рыхъазла» номинация апны йгIатигатI.
Чква Расул сквш 25 айхIа цIуата аспорт дапщылапI. Жвасквша ауи дабакIуан, уацIыхъван ашIаква абакIра йазибжьауа далагатI, йцIыхъвахауа ацысквша Къарча-Черкес абаза кытква рпны спорт тшауацIнайрыхитI.
Расул асогIа азабакIра йапхъахауата далалын зынла айгIайра гIатигатI. Ауи збзирата йара йхIвауа апсуа-абаза диаспора мчыта йъайыцIагылыз акIвпI.
«Сара сыхъаз напI щтIырхуан. ЙсзыгIаргIвуан. ЙсыцыркIуан. Ауи швабыжта йсгвапан», – йхIватI ауи.
РФ АуагIахъа спорт согIа айгIайыгIвчва ргIалхра ххъвыкIта йшапI. Апхъапхъа анкъвакъврала номинациипхьадза апны йагъьу хгIвы гIалырхитI, аноминацияква зымгIва 11 йнадзитI. УацIыхъван Россия апны йбергьльу аспортсменква, аполитикква, культура анхагIвчва злу аэксперт совет нхауа йалагитI йгьи АуагIахъа спорт согIа асайт апны ауагIа рнапIщтIыхра акIвшитI. ЙцIыхъвахауата спортла РФ а-Министерства агIарбараква йрылапшхитI.
ЙайгIайри ауи дшазцузи дрыквчважвауата асогIа алауреат йпсадгьыл, абаза кытква рпны ауагIа спорт бзи йшырбауа йхIватI.
«ЙалкIгIата бзи йырбауа ахъатачIв апшIагылраква ракIвпI. ТшауацIыхра ду рауитI абакIра, бокс, самбо, дзюдо». ЗныкI ауи йаба йаща цри Чква Валентин аспорт даланайырхIван бжьагIвыта дизалтI. Аспортсмен йшихIвауала, йаба йаща йакIвпI ауи спорт бзи йзырбаз, йаргьи ауи йанакIвызлакIгьи швапхата дйыман.
«Аспорт, атшыбжьараква рпны ауи зыргIвара гьйымамызтI, йаргьи ауи акIвпI саргьи адахIвраква сгIасызшаз. ДбжьагIв бзийу йахъазымкIва ауи аспорт уыс адгалрагьи дазычпан, сара ауи ужвы йъагIадзазгьи тшазызбжьитI», – йхIватI Расул.
Ауи йгIацицIахтI уахьчIвала уызшIпшуаш гIвычIвгIвыста йбауа Адуней апсуа-абаза конгресс ЙхIаракIу асовет аунашвачпагIв, «Алашара» адкIылара апрезидент Эгьзакь Мусса шйакIву.
«Ауи са дсунашвачпагIвпI-хIва гьакIвым – цIабыргдзата ауагIахъа шабгу рыхъазла дшвапхапIта акIвпI», – йгIаликIгIатI Чква Расул.
Ауи йшихIвауала АуагIахъа согIа йапшу ахьызхIвага йара йыхъазла ргвышхвага дупI, ауи йынхара рыцIагьи йрымчырныс, ахIагIара шIыцква тшырзайцIарныс дазаднацалитI.
«Сара сыхъазла ари айгIайра щарда гIанацIгIитI. Ауи хIгвып шабгу хIызламгIвайсуа анархара штамаму йаквшахIатхитI», – йалйыргатI йажва Чква Расул.
Спортла Россия Федерация а-Министрества йщаквнаргылыз ауагIахъа спорт согIа – Россия апны спортла рыцIа хвы зму ахьызхIвагаква йрыуапI. Ауи асквш 2010 йгIашIарышвта йаъапI. Ауищтара ауи аноминацияква шIыцгьи гIарылахIатI, ауаса ахъадаква йшаъаз йгIанхатI. Ауи спорт йапщылу анхара йапшым анархараква гIацIанакIитI: спорт адкIылазара, йзгIваду абзазаща, физкультура, спорт тшауацIдрыхра, аспорт уыхвараква, аныкъвадыкъваква йырзалху аспорт датшагьи. АсогIа ршауищтара ауи Россия апны спорт йадынхалуата зыхьыз дута йгаз щардагIвы йрырттI.
швталра йа тшаншвцIара атахъыпI.