АААК ЙхIаракIу асовет аунашвачпагIв Эгьзакь Мусса Апсны Республика ажурналистква разцIгIараква джьауап риттI.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса агIваша, декабрь а 6 агIан йакIвшаз апресс-конференция апны Апсны Ажурналистква радкIылара йалакву драчважватI.
Апресс-конференция апны йгIащтIырхыз ауысква йрылан: цри бызшва гIащаквыжьра йгьи тшауацIнарыхра, ашIара йырзынарху аполитика йанархара хъадазара атахъу щаквыргылра, Апсны апны аинвестиция климат агъьчIвра, абашталагIвчва радкIылараква разазаъащаква, апсуа йгьи абаза жвлара хабарргагаква рацынхара.
Апресс-конференция ахIвахIвраквала йалагатI: ажурналистква Эгьзакь Мусса а-Конгресс сквш 30 ъахъыцIыз йайхIвахIвтI, агIвхъатакIгьи ари апш анйара, ари апш айчважвара джьащахъва ъалшарахаз йшазыразу рхIватI.
АААК ЙхIаракIу асовет аунашвачпагIв а-Конгрессгьи ажвлара хабарргагаквагьи рхачIвква щардала йшаквшвауа гIаликIгIатI.
«АААК ахъазгьи ажвлара хабарргагаква рыхъазгьи магIын ду амапI ажвлара йатахъу, ргвы зырбзиуаш хабар рзынадырдзарныс. УахьчIва магIын ду амапI адуней шабгу апны абаза уагIа йрыуу рыжвла ъану рпсадгьыл апны рабашталагIвчва шбзазауа ахабарква драдзара. Абарауаса, йаназаману йнауырдзауа, знадзара нархъу ахабаркваламцара километр зкьпхьадзарала йачвыхъару ауагIа хIзадкIылуаштI», – йашIырпшыра гIаргвынйыргIвытI йайззакваз Эгьзакь Мусса.
Ажурналистква разцIгIараква джьауап ритуата ауи Адуней апсуа-абаза конгресс ахъвшаракви ауи анхара алкIгIара хъади дрыквчважватI, ЙхIаракIу асовет ахъада йшихIвазла, АААК апроектипхьадза йащату хъара йпшуа хачIвлыхрапI.
«Алашара» адкIылара ангIанхIыршуз (Эгьзакь Мусса Абаза-апсуа уагIахъа ртшауацIыхра ацхърагIара знархару «Алашара» Дуней адкIыларагьи даунашвачпагIвпI – аредакция ррытаразга) хIызшIашваз абаргвыраква йрыуан ахачIвлыхра амагIны гIагвнымгIвра, ауи йгIалцIла йапшым агIаджвыквцIараква ацIыхъвадза йгьхIзынамырдзузтI. ХIара йгIахIгвынгIвытI апроектква абзазара йалажьра щардала йызпщылу йучпуш ауысква цкIы-цкIы йлыхра шакIву. УахьчIва АААК агIаджвыквцIарипхьпдзп злагIалагауа хъара йпшуа хачIвлыхрапI», – йхIватI Эгьзакь Мусса.
Ажурналистква йзаджвымкIва-йгIвыджьымкIва йазцIгIатI абаза уагIа йрыуата агIвыма къральква йырту рпсадгьыл агIайхра ауыс. Эгьзакь Мусса дшхъвыцуала, ари ахачIвы йащатахара атахъыпI абашталагIвчва хъызкъьалуаш аъаща гIаныршарала акъральыгIва программа. Ауи йгIацицIахтI ауидъа абашталагIвчва ргIайхра ауыс гIащтIухуашта йшаъам.
«ХIайщчви хIахщчви дара Апсны йгIайхырныс шыртахъхуш апш аъащаква гIаныршара атахъыпI. Йшбзазуш лырхырныс аъащаква гIаныршара атьахъыпI. ЙатахъыпI анхарта тыпква, инвестиция климат. Ари ауыс йащтацауата, цIолата уадымгылкIва йгьауашым», – йхъвыцща гIайырбатI амеценат йгьи йгIацицIахтI ауи ауыс апны «адуней апны пышва бзита йдырхIахьаз уашIпшра шатахъу».
Апсны Республика аинвестицияква гIатазгуш алшараква дрызхъвыцуата Эгьзакь Мусса йгIаликIгIатI адуней акъральква ршвапха йгIаунарбауа: ахча уызгIазгуаш урызпшитIхIва магIны шамам, агалагьи рыцIа йшсабапхуш ахIаракьатчпагIвчва зхчуш, агIвыма къральква рахча агIатагара йацхърагIуш агIаджвыквцIараква гIануыршата хабзалагьи йщаквуыргылырквын.
«Лшара аъапI, ауаса апсуакви абазакви рахча Апсны йаналарцIуш уазпшуашта йгьаъам. Инвестицияла программа лыхра, ахIаракьатра хабзала йхчара атахъыпI», –йгIаргвынйыргIвытI ауи.
АААК ЙхIаракIу асовет аунашвачпагIв йшипхьадзауала, акъральыгIва аэкономика тшауацIыхра тшазынауырхата ауыс ахъатаква зымгIвала уадгылырквын адемография аъащагьи узагъьчIвуаштI. АуагIа саби гIадрийырныс йаквзыргвышхвуш зэкономика мчу акъраль апны йбзазауа, гIари зщарду атгIачва ршвапха пшдза акIвта йбитI ауи.
АААК апсуа йгьи абаза жвлара хабарргагаква йшрыцынхауа даквчважвауата а-Конгресс ЙхIаракIу асовет аунашвачпагIв йгIаликIгIатI АААК йацынхарныс зтахъу зымгIва йшырзыхътIу.
Ауи ауысла Апсны Ажурналистква радкIылара аунашвачпагIв Хашиг Руслан йара дыздиректор хъаду «Абаза-ТВ» апны ахабар шIыцква гIазхIвауа абаза сюжетква шгIадырбалауа гIайхIватI. Ауи йшипхьадзауала, ари швапха бзита ухIва ауаштI.
«Сара (аканал дадиректор хъадата – аредакция ррытаразга) щардала «Абазашта» апрограммаква гIасырбун – ауаъа «абаза олимп хъвмарраква» анакIвшуз, хIапхьахьаква анайззуз йа а-Президент Къарча-Черкес данцарыз», – йхIватI ажурналист, апсуа йгьи абаза жвлара хабарргагаква азаджв йчIвы азаджв йшгIатайцIахлуш ацынхара щаквдыргылнысгьи ажва гIайгтI.
«ХIара хIхIазырпI хIэфир заман йалахIырхIата абаза редакция йхъырхуа гIахIырбаларныс», – йхIватI Хашиг Руслан.
Ауи апсуа йгьи абаза жвлара хабарргагаква рхабарква амдара апсуакви абазакви шбзазауа адиаспора рыцIа бзита йдзырдыруаш амальта йпхьадзитI.
АААК ЙхIаракIу асовет аунашвачпагIв, йбергьльу ажвлара йгьи акъральыгIва уыснкъвгагIв, абзихагIв Эгьзакь Мусса ари асахIат Апсны даъапI, Адуней апсуа-абаза конгресс VIII Айззара ду йапщылу ауысква дрылапI. Ауат ауысква йрыуапI йапшым акъральыгIва, ажвлара уыснкъвгагIвчва, ауагIа гвыпква рынйараква. Айззараду СогIвым апны декабрь а 7-8 агIан йакIвшуштI.
Адуней апсуа-абаза конгресс VIII Айззараду ахабар дыргауата йацынхитI: Апсны акъральыгIва телерадиуакомпания (АГТРК), «Абаза-ТВ» телеканал, Sputnik Апсны хабарргарта агентства.
швталра йа тшаншвцIара атахъыпI.