Нотала йгIву апсуа уагIахъа макъымкIва ракIвымкIва азкIкIра йаншвалтI ауи адызгалыз йалайцIаз амакъымквагьи. Акнига апрезентация Апсны асаби йгьи ашIара ргIахIвчва гвыпква ХХV рреспублика анкъвакъвра «Аӡыхь» апкъ йтата йакIвдыршатI.

Ауи Гвымба Рожден йыхьыз зхъу акъральыгIва филармония апны йадыргалтI. Анкъвакъвра хореографти макъымршIыйагIвти йалаз зымгIва акнига согIата йрырттI.

«АзкIкIра агIацIщтра асквш 1994 йгIашIарышвта ацIыхъва хIтагылан. Ауи агIан напIылагIвырата йгIанхаз азкIкIра аэкземплярзаджвыкI гIараухныс хIылшатI», – йхIватI апшыгIвчва рпахь дгIачважвауата Апсны Республика ауагIа рыршIыйара Аквта адиректор, АААК ЙхIаракIу асовет йалу Къварча Нури.

АнапIылагIвыра ауи «КIавкIаз» гIахIвчва гвып йырсолистыз, адуней зхIваджьыз йпа Инал йхIапчыпква йрылата йгIайаутI. Ауи йара автор йгIайыйтта йаъан.

«Ансагьи арсагьи щарда хIапшыта ауыс ангIахIыдамхIв амщтахь хIара азкIкIра уагIа щардагIв йрызгIарысабапныс ахъаз йхIызгIацIызщтуашыз гIвычIвгIвыс дгIахIаутI. Ауи АААК ЙхIаракIу асовет аунашвачпагIв Эгьзакь Мусса йакIвпI. Ари хIуагIахъа рыхъаз хвы зквцIауачву согIапI», – йхIватI Къварча Нури.

Ауи «Алашара» жвлара адкIылара агвып дрыцта анапIылагIвыра агIацIщтра йаздрыхIазыртI. АзкIкIра Эгьзакь Мусса йгIалайгаз, «Алашари» АААКи алата йдырхъйауа апсуа-абаза уагIахъа ргвбайара тынха гIащаквыжьра знархару апроект «Амазара» апкъ йтата йгIацIырщттI.

Акнига нотала агIвыраква ргIацIщтра нархара хъадата йызму Питер йаъу «Композитор» гIвырагIацIщтырта апны йгIацIцIтI. Атираж экземпляр 350 йнадзитI.

«Ари «Алашара» агвып агIацIщтра йаздрыхIазырыз агIахIвыга макъымква рнотаква йапхъахауа йразкIкIрата йгьамылтI», – йхIватI апрезентация агIан «Алашара» адкIылара ахъвшара аунашвачпагIв Мыква Мурат.

Асквш 2015 агIан «Алашара» ацхърагIарала акомпозитор Гваджьа Галина йадылгалыз абаза уагIахъа макъымква разкIкIра «Ауарадква – сгвы гIазырпхауа» гIацIцIхьан.

«Ари анхара апсуа музыка культура гIащаквыжьра ахъазла магIныта йаму гIахIгвынгIвуата акнига агIацIщтра хIхачIвква йрылахIцIатI. Хвынцариа Отар йынхара агIацIщтра анхъатаркIы «Алашара» агвыпи Нури Еремей йпи йацыта адгалра уыста йатахъыз зымгIва дырхъйан агIвыра агIацIщтырта йрырттI», – ауыс шакIвшаз гIайхIватI Мыква Мурат.

СогIвым йаъу АААК ауысхарта аунашвачпагIв Реквава Темур а-Конгресс анхагIвчва гвып рыхьызла Къварча Нуригьи ари ауыс йадгIапсалыз зымгIвагьи апсуа-абаза уагIахъа ргвбайара тынха агIащаквыжьра ркъару ъаларцIаз ахъаз дшырзыразу йхIватI.

«АгIахIвыга макъымква нотала йгIвыта йхIымазларныс щарда цIуата йхIтахъын: ауи акультура атыдзква, агIахIвчва гвыпква, амузыка апхьартаква рпны йазыбжапI. Ужвы, амакъымква ашвъабгъьы йананшвал, ауат зынгьи йгьхIчвыдзхуашым», – йгIаликIгIатI Реквава.