АААКи Ростов шта йаланакIуа Каменск-Шахтинский къала йауу хъахIара гIагра мурад змам «Асоциал гIаджвыквцIараква рыжвлара квта» адкIылари Россия Федерация апрезидент грантква р-Фонд ацхърагIарала йацдырхъйуз йауацIыхыз апроект шакIвшаз йалачважватI.
Базба Селма
А-Конгресс агвып йгьи «Асоциал гIаджвыквцIараква рыжвлара квта» АНО йауацIыхыз рацынхара ацIыхъва йазгIайтI. Анхара йащатахатI Адуней апсуа-абаза конгресс хысквша цIуата йыздынхалуа жвлара проектлыхрала апроект. Ауи йаланакIитI дырра гIаура йгьи ауат адырраква абзазара апны йгIарысабапхра йырзынарху атшыбжьараква. АгIвгвыпкI ацынхауаа йаналага апроект ужвыгьи хачIвыкI аларцIатI: Апсны апщкыткI рапхьартаква рпны ажвлара гьагьараква раъаща агъьчIвра.
АгIахъвыцра уалагата архъйарадза
АгIвадкIыларакI рацынхара злагIаджвыквылыз Апсны Республика Ажвлара палата апны рабадырра акIвпI.
««Асоциал гIаджвыквцIараква рыжвлара квта» АНО апрезидент Моисеева Светлана Апсны апны йынхауа хъахIара гIагра мурад змам адкIылараква драбадырныс йгьи ауат здынхалуа апроектква тшрыхалыргIвазата Россия Федерация апрезидент грантква р-Фонд йаднагалыз анкъвакъвра йацалалырныс лтахъыта Ажвлара палата тшазыналырхатI. Абауаъа хIара хIабадыртI. Афонд ахчала йангIахIцхърагIа апроект хIырхъйауа хIалагатI», – лхIватI жвлара тшауацIыхрала, арыпхьарала йгьи згIвадарахчарала АААК ахъвшара аунашвахъцIагIв Хагба Изольда.
Ацынхара ауыс джьгарта йацикIтI АААК ЙхIаракIу асовет аунашвачпагIв Эгьзакь Мусса.
«Россия апрезидент грантква р-Фонд апсуа кытква рпны чкIвыныргIа ргIаджвыквцIараква тшауацIдрыхрала хIпроект йъацхърагIаз а-Конгресс агвып шабгу рынхара дахIвра шаму йаквшахIатпI. Ауи хIынхара амаль кIара шгIанацIгIауа, Апсны апны абзазара апсахра бзиква гIалажьра йащатата йал йшауаш йаквшахIатхитI. МагIын ду амапI ауи апроект хIъацадынхалуаз абзирала России Апсни ркъральгIв джьгарква ацынхауа йъалагазгьи, ауи йайщчву агIвкъралькI рацынхара анархара шIыцква гIахънатIытI», – йгIаликIгIатI Эгьзакь Мусса.
Апроект асквш 2025 мартI йгIашIарышвта октябрьдза йакIвшатI, йаргьи йапшым нархараквакIла йалан. РахIа йхъадаз чкIвыныргIа ргIаджвыквцIараква тшауацIдрыхра акIвын. АуыжвгIанчIви жвлара гьагьараква гIандыршатI ЩащикIвар, Уаквым, ПакIващ йгьи Мгвыдзырхва кытква рапхьартаква рпны.
ЧкIвыныргIи спорти тшауацIдрыхрала АААК ахъвшара аъачIвагIагIв Квициниа Есма апхьагIвчви адгалагIвчви рацынхара йгIалыланацIаз алахIвараква хIыцагIвылшатI.
«Адуней апсуа-абаза конгресс гIвысквша цIуата жвлара проектлыхрала атшыбжьараква акIвнаршитI. Ауи азаман ауацIа хIара агIапхьартакI рпны хIаъан. Асквш 2025 агIан «Асоциал гIаджвыквцIараква рыжвлара квта» АНО гIахIыцылын апроект рыцIагьи йауацIыхIхырныс лшара хIаутI. Жвлара проектлыхрала атшыбжьараква рыщатала апхьагIвчва йанампхьауа сабапкI ъарзыхуш замангартата йалуаш ажвлара гьагьараква гIанхIыршарныс щаквхIыргылтI», – лхIватI Квициниа.
Ажвлара гьагьараква рпны апхьагIвчва атшыбжьараква шакIвдыршуш, ртшпсщара гIамта шыргуш апшта йадгалапI. Апещ рыхьшвашвагаква, айшваква, арымдзаква, акIарышвтаква, айшва хъвмаргаква, проектор, ноутбук, аквчIарта тIатIаква рхвгIатI. АпхьагIвчва ауатква зымгIва гIадрысабапуа йалагахьатI.
«Асоциал гIаджвыквцIараква рыжвлара квта» АНО апрезидент Моисеева Светлана анхараква шакIвшуз йалыргата йгIалхIватI. Ауи йшылхIвазла, апроект йалкIгIара хъадахатI агьагьараква радгалра джыпхакI йгIаквхта йъадымгылыз.
«Анхара анджвыквхIцIуз хIара апещква зладыгIгалуаш йацапшыта йлыххьата йхIыман. Ауаса апхьагIвчви арыпхьагIвчви хIанрайкьангьаш ауат ззыбжу мачIкI рыцIа йшдатшаз гIахIгвынгIвытI. ХIаргьи йлыхта йхIымаз хIгIадцIтI, апрезидент грантква р-Фонд апны йгIахIхъпшылуаз апсахраква руысла хIйангIалтI. Йаргьи апхьартаква дара йыртахъыз раутI: ажвапIта, асплит-ргIапсраква, асабиква зхIвуз акъыль зрыпшгIауа йапшым ахъвмаргаква», – лхIватI Моисеева.
Агьагьараква радгалра йаццауата апхьартаква рпны жвлара проектлыхрала атшыбжьараква акIвшун. ЙайгIайуаз агвыпква ргIаджвыквцIараква шырзырхъйуш апшта цхърагIара рауан. АйхIара йыртахъыз спорт ъамапсыма хвгIара акIвын. Ауатква йгIарыцылтI сабап злаз датшагьи агIаджвыквцIараква.
Ауи апшта, Аацы кыт дауата апроект йгIалалыз пхIвыспакI лахIварала апхьарта абиблиотека книга шIыц азгIаргтI. Дурыпщ апхьарта афутболасыгIвчва гвып акыт ахьызгьи дара рдамыгъагьи зну фаша рырттI.
ГвыцхIара злу аджьгарра
Ацынхара апкъ йтата датшагьи ауысква адыргалтI. Ауи апшта, Апсни Ростов шти рпны йынхауа хъахIара гIагра мурад змам адкIылараква ранйараква акIвшатI, ауат йрылакваз грант гIапшцIгарала анкъвакъвраква ушрылалуаш ауысла рдырраква амырдатI. Анйараква ъакIвшаз СогIвым йаъу АААК ауысхарта апресс-квта акIвпI.
«ХIара йгIахIыдахIвтI апсуа жвлара адкIылараквакI дара рнархараквала йынхауа Ростов шта йауу а-НКО-ква йрабахIырдырырныс. ХIгвыгъитI ауат рабадырра сабап злу ацынхара ауыра гIанарыцIсуашта», – йгIацылцIатI «Асоциал гIаджвыквцIараква рыжвлара квта» АНО апрезидент Моисеева Светлана.
Анхара йанархаракIта йалтI Асабиква рхчара амш йадахIвуата Цандрыпщ кыти СогIвым къали йаъу ареабилитация квтаква рпны йызхьпшуа асабиква агвыргъьахъвква рзадгалрагьи. АдгалагIвчва Ткъварчалгьи йцатI.
Ахызджьарагьи аниматорква алата аларпшраква акIвшатI, ауат аналгуз асабиква асогIа хъагIаква рыртуан.
ОСАЗ АААК аъачIвагIагIв Хьышба Науыр йрыцынхаз рыгIвзачва йразыра ажваква рзынайырхатI.
«АпхьагIвчва апроект нхара йангIаланакIра рхъвыцща, рылшараква йрызхIитI, ауат хачIвы лырхта ажвлара зшIашвауа баргвыраквакI шдрыдзуаш тшадрыщцитI. А-Конгресс агвып йгьи «Асоциал гIаджвыквцIараква рыжвлара квта» АНО асквш ауацIа «НКО азхIара атып: Апсны» проект дырхъйауата йацынхатI. Ауи абзирала АААК апроект тшауацIнахтI. ХIъадзацынхаз агIамта ауацIа сабап злу уыс бзи щарда хIчпатI. ХIыгIвзачва ргвы хътIыта йъагIахIпыллуз ахъазла сырзыразпI. Ауат «абари швчпа» – хIва хIазыр рымата йгьхIызгIамитI, хIара йхIтахъу йазцIгIунта ауи шхIауаш ацIыхъва йтагылуан», – йхIватI Хьышба.
Апсны Республика Ажвлара палата апны алачIвара: ацынхара ацIыхъвагIарбараква
Рацынхара ацIыхъва йнадырдзауата агIвадкIыларакI рынхагIвчва гIвымшкI руацIа апхьартаква дырхъвыхуан. Ауи архъвыхра агIарбараква Апсны Ажвлара палата – ацынхара ахъа ъаджвыквлыз апны – йрылачважвахтI.
Моисеева лъачIвагIалагIвчва пхата йъадрайгваз, апроект анджвыквырцIуз ацынхара ъагвындыргIвыз ахъазла дшырзыразу лхIватI. Ауи дацIачIвагъватI анкъвакъвра апны рдахIвра збзиру абагвынгIвра зыщатаз ацынхара шакIву.
«ХIара хIабаркIыта ауыс джвыквхIцIан хIайгIайтI! Анкъвакъвра адкIылара 63 алан, ауат йрыуата 8 ракIвпI ахча гIазыртыз, хIаргьи ауат хIрылашватI. Сара кьангьаш гьазгIазгуам хIайгIайра щардала йызбзиру йзызхъауцIуш гIвза бзи дъахIымаз шакIву – акомиссия ауи гватра ду азалнахитI» – йгIалылкIгIатI ауи.
Анйара ацIыхъва агIвзачва азаджв азаджв йзыразта агвы йгIатыцIуаз ажва пхаква абархIвтI. ЗымгIвагьи йгIалыркIгIатI рдахIвра йащату йъабагвынгIвуаз, рмурадква ъазакIыз йгьи рынхара сабапра ъалаз шакIву. Анатгьи аратгьи рацынхара ауыла йшIымчIвушта, ауырахушта, ажвлара рыхъазла магIны зму апроектква дырхъйарныс алшара шIыцквагьи гIахънатIуашта йшгвыгъауа рхIватI.
Жвлара проектлыхра ащатаквала атшыбжьараква АААК апроект хъадаква йрыуазакIыпI. Асквш 2024 агIан апроект чкIвыныргIи спорти руысквала АкъральыгIва комитет алата йдырхъйун. Асквш 2025 агIан а-Конгресс агвып Ростов шта йаланакIуа Каменск-Шахтинский къала йауу «Асоциал гIаджвыквцIараква рыжвлара квта» АНО ангIалра рыдырчпалын ацынхара йгIацIанакIуа аштаквагьи аргIапсщагьи йрыланархIатI. Ацынхара апкъ йтата адкIылараква руысхагIвчва йзакIымкIва-йгIвбамкIва акытква рпны атшыбжьараква акIвдыршатI. Анхара йагIарбара хъадахатI пщкыт апхьартакI рпны атшпсщарта квтаква гIаныршара йгьи йадгалра. Ауи акIвымкIвагьи шIыпIаквакI рпны чкIвыныргIа датшагьи ргIаджвыквцIараквакI дырхъйатI.
швталра йа тшаншвцIара атахъыпI.