Ансисквша йакIвшалауа «Абаза» фестиваль йцIасхаз ахъвмарраквала йалгатI. Анкъвакъвраква адыргалтI Эгьзакь й-Фонд, «Алашара» Дуней адкIылара йгьи Абаза уагIа рспорт академия.
Базба Селма
Июль а 26 атшын КъЧР, Адыгьа-ХIабльа район йаланакIуа Хъвыжвду кыт апны Йжвабахуз Абаза уагIахъа рхъвмарраква тшауацIырхтI. Анкъвакъвра пхатшаква Къарча-Черкес абаза кыткви Апсни йадыркIылыз 12 командакI рылан. Аспорт квпшыра кIьыдаквакI рпны йанкъвакъвтI Москва йту абазакви апсуакви йгIадыргылыз агвыпгьи. Ауат йрыцыркIырныс, агвыргъьахъв ахIауалагьи йпсыпнкъвгарныс араъа йгIадгылтI ауагIа зкьыгIвпхьадзара.
Ахъвмарраква рсогIа хъада – аджьаз йгIалху, ауагIахъа дамыгъаквала йрыпшдзу акубок – йшцIасхаз апш, цIыпх ахъвмарраква рпны йайгIайыз акыт сынчIва анкъвакъвраква рыпшвымаква – ахъвыжвква йрырттI.
Атурнир йапшым агвып йгьи ахъатачIв анкъвакъвраквала йалан: футбол, волейбол, апхъанысра, пара, хIахъваущтра, хысра – зымгIва шалу 11 спорт квпшыракI йнадзитI. Аспортсменква йырхъазымкIва асасчвагьи араъа йырчпуш рауашын – ауат рыхъаз дартс, петанк, аквагрим, айшва хъвмарраква датшагьи щарда адыргалтI.
ЙгIалкIгIара атахъыпI адгалра уысква рпны Хъвыжвду абзазагIвчва ХъвыжвчкIвын йауу райщчвагьи бзита йшгIарыцIагылыз, ауат ркъаруква адыркIылын сынчIва гIвфутболасыртакI агвындыргIвытI. ЙазхъвыцтI асабиква рыла шдырпшуашызгьи, ауат швахъаущтга рызгIаргын ахвыцква ргвы чIвандзыкIьа ауи йацIагылан, даргьи ргвы йгIатахуш замангагата йырзалтI. Амшква шшуару гIарпхьадзауата адгалагIвчва асасчва амара тшъачвырхчушыз ажьораквагьи рзырчпатI.
«ЙалкIгIата ажва пхаква рзынасырхара стахъыпI Хъвыжвдуи ХъвыжвчкIвыни рбзазагIвчва – йацIагылта нхара ду ъакIвдыршаз, араса пхата йгIадгылыз зымгIва йъагIарпылыз ахъаз. Ауат йырбзирапI ахъвмарраква зджьара йгIанымхауата бзита йъадгалаз: ахъвмарыртаквагьи агвындыргIвытI, ахчагьи азыркIкIытI. Адуней апсуа-абаза конгресс аунашвачпагIв Эгьзакь Мусса ХIабальа йпа йанакIвызлакIгьи йхIвитI ари йапшу алалраква мурад хъадата йрыму физкультура тшауацIнарыхра йшахъазым – ауагIа адкIылра, йшабабуш, йшайчважвуш, йшабагвынгIвуаш, штшадыркIылуаш апш лшара рзыгIаныршара шатахъу. Йаргьи арат йюбилейыз анкъвакъвраква рпны уагIата йаъаз, ауат рнашхква шаъазла йгIауахвырквын ауи амурад шгIахIыдахIвуа убитI. Ауаса йанаъазара – мгIва тамам хIыквгылапI, йаргьи хIгIашIамсуа апхъала хIцара атахъыпI», – йхIватI Абаза уагIа рспорт академия апрезидент Тльыс Мурат.
АхъатачIв анкъвакъвраква аналга аспортсменквагьи апшыгIвчвагьи асцена хъада агьагьара йайззатI – ауаъа амш агвы ахъвмарраква гвыргъьахъвыта йгIахъыртIытI. ЖвыгIвтшчва абаракъква рыма, ацзакIыра рхъа шаладухауа убауа апшыгIвчва йрыгIвсын йгIалагылтI. Ауат рцIыхъва йтагыла ауатыкв йгIаталтI ахъвмарраква йрылаз, згIатгараквала амш зрыпшдзарныс йхIазырыз агвыпква. Йайззаз зымгIва тшырзынайырхатI АААК ЙхIаракIу асовет аунашвачпагIв, «Алашара» Дуней адкIылара апрезидент Эгьзакь Мусса.
«Сара сгвы йгIатыцIдзауата хIайщчви хIахщчви ацзакIыра ахIауа ъарылархIвауа ари агвыргъьахъв гIальамат апны сальам швасхитI. Угвы йалахIитI ага араъа апхъагылара мчыта йазабакIыргьи – амакIыра гIалымпшуата айщчвара рыцIа хъара шакIуа анубауа. Ари ауыс адгалра йадгIапсалыз зымгIва сгвы йгIатыцIуа аразыра ажваква рзынасырхитI. Азаджв азаджв рыцIагьи хIъайзаргванхауа арат ахъвмарраква рпны йгIалахаз заджвгьи дгьаъазлум, араъа дзачIвызлакIгьи дайгIайитI», – йгIаликIгIатI Эгьзакь Мусса.
Ахъвмарраква ргIахътIра йалан пIатIу зкву асасчвагьи – а-Правительства йалакву, КъЧР АуагIа Райззара адепутатква, абаза кытква рунашвахъцIартаква рхъадаква. Апсны йгIатыцIыз агвып драхIбан репатриацияла АкъральыгIва комитет аунашвачпагIв йтарагылыгIв Агрба Бастакуа.
Ахъвмарраква ангIахъыртIы амщтахь агвып анкъвакъвраква надырдзахтI. АпшыгIвчва йхъвмарквуз рбыжьквали рнапIасрали йдыргвышхвун.
Апсны ркоманда акапитан, чкIвыныргIи физкультури тшауацIдрыхрала АААК ахъвшара аунашвахъцIагIв Берзениа Валерий апсуаква шгIахъвмарыз даквчважватI.
«СквшигIадзагьи арат ахъвмарраква йгIайырныс зтахъу рпхьадзара йалахIитI. СынчIва хIгвып 40-гIв райхIа йнадзитI. Ага йшуаразтынгьи, ачкIвынчви ахIвсси ргIарбараква бзипI. Анкъвакъвыртипхьадза апны адреналин уылаухIвитI. Ауи зджьара йгIанымхауа лахIварапI!» – йхIватI ауи.
Апсуаква ркоманда волейбол апны апхъагылара гIатыргатI. Ари хвынхауата Апсны йауу ахIвссаква раргван заджвгьи дгьгIадрыскIьум.
«Швабыж йацIагылу хIгвып быжьгIвы хIнадзитI. КъЧР апны ахъвмарраква хIара йанакIвызлакIгьи бзита тшрызхIрыхIазыритI. Ансисквшагьи арат ахъвмарраква хIгIайлитI. ХIыззгIайуагьи айгIайрапI!» – йгIалылкIгIатI аволейболасчва ргвып йалу Шамба Яна.
СогIа гIатыргатI Апсны йауу датшагьи ачкIвынчва. Метр 100 рпны йъапхъанысуаз йхпахауа агыларта йкIытI КIвакIваскьыр Амал, махъвшIала абакIралагьи аджьаз медаль гIатигатI Махариа Рамир.
СогIвым йаъу АААК ауысхарта унашва ахъызцIауа Реквава Темур ахъвмарраква швабыж бзита йшадгалаз гIаликIгIатI, ауи зкъару алазцIаз зымгIва йразыра ажваква рзыйхIватI.
«Швабыж сшырзыразу схIвара стахъыпI анкъвакъвраква йрылазгьи, адгалагIвчвагьи, апшыгIвчвагьи ари аъара йпшдзу, хIадызкIылуа спорт фестиваль ъакIвшаз ахъазла. Абаза уагIахъа рхъвмарраква ари жваныта йакIвшитI, ауат ужвыгьи зны йгIадырбатI спорт – йшанкъвакъврагIвацам. Ауи гвыпла ацIагылрапI, ацацхърагIарапI, тшадкIылрапI».
Хъвлапны надзауата зымгIвагьи рахIа йзызпшлауа анкъвакъвраква – аркъан ахъра – джвыквылтI. АпшыгIвчва зкьыгIвпхьадзара асцена хъада адзхъа тшазыркIкIын ркытква дыргвышхвауа йырпшуан.
Анкъвакъвраква зымгIва ргIарбараквала апхъагылара ЙынджьыгьчкIвын ргвып йыргатI. Анкъвакъвра кIьыдаква рпны хвызджьара акъвбинаква айгIайтI, айынджьыгьква пщызджьара айгIайра тыргатI, Къарапагва, Дарыкъвакт, Гвым гIвба-гIвба хьапщ согIа гIарынхатI, Хъвыжвдуи Апсни – закIы-закI.
ХIапхъа аспорт гвыргъьахъв акIвыршара акьазу Къазма йрырттI. Акультура-спорт фестиваль ашIасга пшдзата йазалтI Абазашта агIахIвыгIвчви ашвахIвагIвчви йгIадырбаз аконцерт.
швталра йа тшаншвцIара атахъыпI.