Трыквшта апсыуа культура квтаква рфедерация Туфанбейли кыт апны йгIахънатIытI квта шIыц.
Барганджиа Саид
Трыкв кыт Туфанбейли апны йгIахъыртIытI апсыуа культура квта шIыц – Трыквшта апны арат йрапшу аквтаква «дернек» – хIва йрыпхьитI. Ари ахабар АААК апортал йгIарайхIвтI Трыквшта апсыуа культура квтаква рфедерация ахъада Аквысба Атанур.
Ауи йшгIацицIахызла, аквта гIахътIхатI Трыквшта Адана шIыпIа йтабазазауа апсыуа-абаза жвлара ргIаджвыквцIарала йгьи афедерация ацхърагIарала.
Аквысба йшихIвазла, уыжвласыла акультура квта ауысхарта йалакву райззара апны ауи апсыуа культура квтаква рфедерация йшалалуала щаквыргылра нахвхуштI. Ауи акIвпIта, Туфанбейли аквта йжвипщхауа квтата йалалуаштI Абхазфед (апсыуа культура квтаква рфедерация айшыста йапхьитI араса – аредакция ррытаразга).
«Ари акультура квта хачIвыта апахь йгылапI йаднакIылырныс араъа йагвлачву ахкыткI – Игдебель, Болатпынар йгьи Акпынар – йыртабзазауа апсуа-абаза диаспора. Арат ахкыткI ауралагьи йыртабзазитI апсыуа-абаза уагIа йгIарыцIанакIуата 3500 раъарагIв», – йрытамамитI Аквысба Атанур.
Ауи йшихIвазла, адернек аэтнокультура тшдырра агIахчара уысква йрыдынхалуаштI, апхъанчIви псадгьыли адиаспори ращтаныкъвара йгьи апсыуа-абаза культура гIвынаква ртшауацIыхра йацхърагIуштI, Аквта анхара датшагьи нархарата йамазлуштI апсыуа бызшва ауагIа йраргванчIвра, бзи йдырбара йгьи Трыкв Республика апны Апсны Республика апIатIу пшдза арыбагъьара, апхъанчIви цIас пшдзаква ргIахчара йгьи ашIаква рапхъанчIви псадгьыл абзазара шакIвшауа цIолата йырдыруата ргIадзныргылра.
Афедерация ахъада йгIайхIватI Туфанбейли акультура квта даунашвачпагIвта дшалырхыз ХIапIатI Дауыт.
Трыквшта апсыуа культура квтаква рфедерация уахьчIвала йаднакIылитI 13 дернеккI, ауат йыртабзазитI квтанайта йгIахвхарквын зпхьаздзара мильуанкIи бжакIи райхIа йнадзауа апсыуа-абаза уагIа.
А-Конгресс аустав йшгIанахIвауала, абгата йщаквгылапI Трыквшта апсыуа культура квтаква рфедерации ажвлари рацацхърагIара.
швталра йа тшаншвцIара атахъыпI.