Зхабар дута йгаз абалетмейстер йгIайыквчважвауа абзазара йгIахъыху афильм Гвымба Ражден йыхьыз зхъу Апсны акъральыгIва филармония апны йгIадырбатI.
Хутаба Алиса
Ари – зхабар хъара йгаз агIахIвгIвы, абалетмейстер, РСФСР апны гIатгара змаз артист Дзыба Георгий, артистква йзакIымкIва-йгIвбамкIва рабанпараква ргвышхвагIвта йырзалыз агIвычIвгIвыс йгIайыквчважвауа турыхпI. Афильм апсуа-абаза уагIахъа ргвбайара тынха йазынарху «Амазара» проект апкъ йтата йхъырхтI. Ауи гIандыршатI Эгьзакь й-Фонди абаза-апсуа уагIахъа ртшауацIыхра ацхърагIара знархару «Алашара» Дуней адкIылари.
Афильм агIаныршара ргвышхвагIвта дазалтI Эгьзакь Мусса, апроект лрыхIазыртI Джьмакъвыл Нателла, йхъызхта йабызтхыз Шармат Динислам йакIвпI, асценарий ЧкIала Георгий йгIвытI, амакъым Муратыкъва Мадина дгIастI, атурасы хъадала КъЧР апны гIатгара зму артист Къараль Рустам дгIахъвмартI. Ауат ргIапсара абзирала апшыгIвчва йырбаз йгьахъазфильмым – ужвы йъагIадзазгьи згIахIвыща ауагIа ргвква мцахIвацата йалазыршвауа агIвычIвгIвыс дгIазырбауа йбзу турыхпI.
Акино йащатахатI Дзыба Георгий йыцынхаз, йбжьаз ауагIа ргIагвалашвахраква, ашвъащтIацIартаква йгIарылху акадр мачIква йгьи ауыжвгIанчIви артистква йгIадырбауа агIахIвра шIчIвараква. Ауат азыркIкIра ахъазла аршIыйагIвчва гвып Апсны, Чачаншта, Асатиншта, Дагъстан, Къабард-Балкъар гIамырдатI.
Адуней апсуа-абаза конгресс аунашвачпагIв Эгьзакь Мусса йыхьызла айззара йгIадгылкваз сальам райхуата дгIачважватI СогIвым йаъу АААК ауысхарта аунашвахъцIагIв Реквава Темур. Ауи асачва дрызхIвахIвтI, афильм апшыгIвчва ргвква рпны закI гIанарыцIсуашта дшайгвгъауагьи йхIватI.
«УахьчIва хIара «Амазара» проект апкъ йтата йхъырхыз ужвыгьи фильмкI гIахIырбитI. ХIара йгIахIырбахьатI ауагIахъа хъвмарщаква, ахIваспачпара, апсуа айсыгIв йкIвалдзы йгIарыквчважвауа афильмква. УахьчIва хIара агIахIвыгIв дудздза Дзыба Георгий йгIайыквчважвауа абзазара йгIахъыху афильм шIыц агIарбара адыгIгалтI. Ауи йалкIгIару – ари апроект апны ауи агIвычIвгIвыс йбзазара гIазырбауа йапхъахауа фильмпI. Йапхъахауата ауи сынчIва июль агIан КъЧР акъральыгIва филармония апны йгIадырбатI. Сара сгвыгъитI апсуа пшыгIвчвагьи ауи пхата йрылархIвушта», – йхIватI ауи.
Ауатыкв дтагылата асасчва тшырзынайырхауата «Алашара» Дуней адкIылара аунашвахъцIагIв Гьадыгв Мурат ари йапшу апроектква магIныта йрыму гIаликIгIатI.
«Йапхъадзахауата йхIвара атахъыпI афильм афыр КIавкIаз шабгу апны йхабар шгаз, йгьи ауи агIвычIвгIвыс абаза уагIахъа дшгIарылцIыз. Ага йгвасразтынгьи, хIыуа щардагIвы, йалкIгIата йгIадзынгылуа чкIвыныргIа, Дзыба Георгий йунашва дукI йгьхIымгIатI. Ари акинола хIара ауи агIвщтра гIахIыррайшахра хIтахъыпI. Афильм магIны заму – ауи агIвычIвгIвыс ду ахъмаштылра дгIаланажьуаштI, КIавкIаз ауагIахъаква ргIахIвра культура апны йалацIарагьи зымгIва йднардыруаштI», – йгIаликIгIатI «Алашара» Дуней адкIылара аунашвахъцIагIв Гьадыгв Мурат.
Апроект унашва ахъызцIуз Джьмакъвыл Нателла акино хъырхныс сквшквакI цIуата лхъа йшгIаташваз йгьи ауи ауыс шдырхъйаз дгIаквчважватI.
«СквшквакI рапхъала АААК асайт апны Дзыба Георгий йунашва гIанахIвауата гIвыракI сапхьатI. Ауищтара ауи йгIалхIву агIвычIвгIвыс йыхъазла кино хъыхра шатахъу ахъвыцра сгьамыртынчуазтI. ХIара КъЧР, Апсны, Дагъстан, Чачаншта, Къабар-Балкъар, Асатиншта рпны кIара хъыхIхтI. Абзазара йгIахъыху афильм хIъадзадынхауаз агIахIвгIвы дыздыруаз аршIыйара йапщылу уагIата 22-джь ргIачважвараква анхIцIатI. Презентация анакIвхIыршуз Дзыба йыцынхакваз, йыгIвзачва, йъахIыльчва гIачважватI. ГвлахIарапI Дзыба Георгий йапшу агIвычIвгIвыс ду хIара зымгIва ужвыгьи зны хIъазиддаз. ХIадкIылари ауи апрезидент Эгьзакь Мусси рыхьызла ари агвыргъьара хIыцагIвызшарныс йгIайыз дзачIвызлакIгьи сальам атанашвасхIвхитI», – лхIватI Джьмакъвыл Нателла.
Апремьера агIахIвгIвы йзаъачва, йъачIвагIалагIвчва, йбжьаматаква, ауи йхабари агIахIвра йазйымаз йлахIвари здыруаз ауагIа азнакIкIытI. Дакъикъа 45 йнайуа алента Дзыба ймагIныз гIахънатIитI. Ауи аналга апшыгIвчва Дзыба йылаз Анчва йхъвы, йхIаль, йымч, азъазара азцIабыргра гIалыркIгIауа рлахIвараква абархIвуан.
«Ауи запш даъамыз дгIвычIвгIвысын йгьи дартист дууын. КIавкIаз апны ауи йыдзхъа заджвгьи дгьузыргылуашым. Ауи данаъахмызгьи хIара заман ауыра аджв аджв – «Дзыба йапш угIахIвы!» – хIва йахIхIвуа хIабаргвышхвун!» – лгIагвалашвахраква хIыцагIвылшатI Апсны ауагIа рартистка Герзмава Майа.
АтурыхдырыгIв, АбИГИ анаука нхагIвы Гваджьба Руслан асцена дгIаквгылын агIарбара адызгалыз йразыра ажваква рзыйхIватI.
«ХIфырква гIдырра, йхIхъхIымраштылра, пIатIу рыквхIцIара, швапха гIархъыхIхра атахъыпI. Анчва дырзыразхатI афильм гIанзыршаз ари апш уыс ъархаз, дъархъмаштылыз, уахьчIва ари ауахъ ъагIахIыртыз ахъаз!» – йгIаликIгIатI ауи.
Анйара ацIыхъва Джьмакъвыл Нателла датшагьи йгIалылкIгIатI:
«ХIара йхIтахъыпI ари афильм хIыгIвычIвгIвыс ду йыхьыз гIанахчара йахъазымкIва чкIвыныргIа лашарбагата йырзалырнысгьи. ХIычкIвынчва Дзыба йшвапха йаргвышхвауамца ахIагIара дуква йырзынадзаргIатI, абаза уагIа йырхъардугата йалргIатI. ЙахьчIва хIара акино апсуа пшыгIвчва йдхIырбатI, йаргвану агIвымызкI руацIа хIъатанхаз анахьанат акъалаква рпынгьи йгIахIырбара хIгвыгъапI. Ауат апрезентацияква рымщтахь афильм АААКи «Алашари» рсайтква йгIартахIцIуштIта зымгIвагьи запшуаштI».
швталра йа тшаншвцIара атахъыпI.