Апсны апны 18.11.2020 21:55 14049

Адуней апсуа-абаза конгресс Гвдауыта район йаланакIуа Джьырхва кыт апны хъвшара шIыц гIаннаршан ашIыпIа хъвшараква йрыланархIатI.

Барганджиа Саид

АААК ужвыгьи ашIыпIа хъвшаракI гIаншатI ноябрь а 17 апсуа кыт Джьырхва абзазагIвчва йанрынйа амщтахь. Ауи акIвпIта, Апсны апны а-Конгресс ашIыпIа хъвшараква рпхьадзара 31 йнадзатI.

Анйара апны АААК архъйагIв секретарь Гицба Инар акыт абзазагIвчва адкIылара нхарата йакIвнаршахьаз, йаргвану азаман ауацIа йырчпарныс йыргвыгъу райхIвтI, ашIыпIа хъвшараква рахIа йыззыгIандыршауагьи гIайырбатI: агIвычIвгIвыс джьгарква йрыцта ашIыпIаква рпны абзазаща агъьызчIвуаш апроектква дырхъйарныс ахъаз.

Анйара даквчважвауата Гицба Инар ауи пхата йшакIвшаз, АААК ашIыпIа хъвшара 20-гIвы алалырныс шыртахъхаз, абзазагIвчва дара рыхъаз магIны змата йырпхьадзауа ауысквала а-Конгресс йацынхарныс йшхIазыру шгIадырбаз гIаликIгIатI. Акыт абзазагIвчва АААК ЙхIаракIу асовет аунашвачпагIв Эгьзакь Мусса Джьырхва кыт абзазаща агъьчIвра йкъару алайцIарныс дъахIазыру ахъазла рразыра ажваква йзынадырхатI.

"ХIара [ари] акыт хIрыцынхахьатI – апхьарта ксерокс, спорт хъвмарга, апхьара апны йатахъхауа ъамапсыма, спортзал зларчпушыз уыхвага пкъыгIва рыхIттI. Апхъахьылагьи ауи азал ауыхвара хIасабапхушта хIгвыгъитI. Ауаъа ауагIахъа гIахIвыщаква, ауагIахъа макъым ъамапсымаква рысра, хвитта абакIра йырзырбжьуштI", – йхIватI АААК архъйагIв секретарь.

Джьырхва кыт аунашвахъцIарта ахъада Мыквба Аслан акыт рыхъазла АААК ахъвшара агIахътIра магIны зму гIаншарата йпхьадзитI.

"Сара кьангьаш гьазгIазгуам хIкыт абзазагIвчва Адуней апсуа-абаза конгресс ашIыпIа хъвшара анхара джьгарта йшалалуаш. ЗымгIвагьи бзидздзата йгIаргвынгIвитI а-Конгресс анхара магIныта йаму", – йхIватI аунашвахъцIарта ахъада йгьи йгIацицIахтI "дзачIвапсыуазлакIгьи йтурых йдырра, адуней шабгу акъральква рпны йбзазауа йабашталагIвчва дшрабадыруаш дащтазлара шатахъу". Ауат амурадква ракIвпI йаргьи АААК йархъйауа.

Джьырхва кыт йнархъам аквтанай апхьарта адиректор Еныкь Гвында Эгьзакь Мусса запхъа дгылу а-Конгресс агвып аспортзал ауыхвара апны йъагIарцхърагIаз, апхъахьылагьи йгIарцхърагIарныс ъаргвыгъу ахъазла дшырзыразу лхIватI.

"Сара анйара шакIвшаз швабыж сазыразпI. Акытква рпны абаргвыраква щардапI. СгвыгъитI ужвыгьи йызнымкIва хIанйата ауат зымгIва хIрыквчважвушта", – йгIацылцIахтI Еныкь Гвында.

АшIыпIа хъвшара шIыц дахъадзгылтI Джьырхва кыт ахьыла Гвдауыта район айззара йадепутату Гицба Дауыр. Ауи АААК ашIыпIа хъвшара анхара джьгарта далазарныс дшхIазыру йхIватI.

"Уаларпата уанацынхауа йанакIвызлакIгьи абзираква урызцитI. А-Конгресс амурадкви ахачIвкви Апсны ауагIа зымгIва йырзынардзара атахъыпI. Йшабгу йгIауахвырквын, хIара а-Конгресси хIари хIацынхара щардала хIайгвгъитI", – йхIватI Гицба Дауыр.

Джьырхва апны йакIвшаз йапшта анйараква Апсны шабгу акытква рпны йакIвшитI йгьи йакIвшуштI. Ауат ззынарху а-Конгресс уагIа шIыц гIалажьра йгьи адкIылара анхара джьгарта йгIаланаркIра акIвпI.