КъБР йауаз, ауаъа йгIаныршу АААК ашта хъвшара аунашвачпагIв, ЙхIаракIу асовет йалу Пшенокъва Владимир дзахIбаз агвып сентябрь а 28 а-Конгресс ауысхарта йаъан. КъБР йгIатыцIыз асасчва йрылан Къабард-Балкъар апны йаъу «Асквшква 1992-1993 рагIан йакIвшаз Апсны ауагIа р-Абашта айсра аветеранква» жвлара адкIылара аунашвачпагIв Шардан Тимур, апсуа-абаза диаспора йрыуу Чегем Аслани ХвытI Альихани. Анйара йалан АААК архъйагIв секретарь Гьыцба Инар, ашIыпIа хъвшараква рыцынхарала ахъвшара аунашвахъцIагIв Жьыба Дмитрийи ауи ахъвшара анхагIвчва Горзолиа Дамири Симониа Херсони.

Къабард-Балкъар Республика йгIатыцIыз агвып сальам райхуата АААК асекретарь Гьыцба Инар ауат Апсны ауагIа р-Абашта айсра апны йгIатыргаз айгIайра сквш 29 ъахъыцIуа ахъазла драйхIвахIвтI. Ауи айсра агIан цхърагIара йгIайыз айсчва йырхаз ауыс магIныта йаму швабыж йгIаликIгIатI йгьи Апсны Республика хъахвитра айаура апны Къабард-Балкъар йауу айсра аветеранква ралацIара хвы шаквцIауачву, ауи ахъазла дшырзыразу йхIватI. Ауи амщтахь Гьыцба асасчва а-Конгресс анхара агIарбараква йрыхайыргIвазатI, АААК асквш 30 йаквшвауа айззараду штшазадыргалуагьи райхIвтI.

«УахьчIвала хIара Апсны шабгу апны а-Конгресс йашIыпIа хъвшарата 60 йнаднацалуата йшхIыму хIхIва йауаштI. Ауат ахъвшараква рынхара апкъ йтата хIара хIэтнокультура байараква гIащаквыжьра йгьи тшауацIдрыхрала, апсуа бызшва хчара, ауагIа рквта ауи ахв йалархIарала, датшагьи анархара хъадаквала йапшым апроектква хIырхъйитI. АуагIа абзазара уысква рпны цхърагIара рзыгIанхIыршауатагьи джьгарта хIынхитI. Ужвы ари асахIат хIара а-Конгресс аюбилей йаквшвауа айззараду тшазхIрыхIазыритI. Ауи гIаргванхапхьадза адуней шабгу йбзазауа адиаспора рыцIа-рыцIа джьгарра шгIадырбауа хIаквшахIатпI. Ауи апшта, щарда мцIуата Трыквшта йауата 250-гIвы райхIа АААК йалалырныс ахIвара швъа ргIвытI», – йгIаликIгIатI Гьыцба.

ДрыквчважватI ауи а-Конгресс анхара ахабар аргаща агъьчIвра йазынарху апроект шIыцквагьи.

«АААК ахабарргарта порталзаджвыкI акIвпI Апсны апны цбызшвакIла йынхауа хабарргагата йаъу. Апхъахьыла хIара йхIгвыгъапI апортал агIарысабапыгIвчва йара ауаъа пырасдъа, рыцIа йырзымайру абызшвала ргвгIанаграква абархIвлауата лшара рзыгIанхIыршарныс», – амурадква гIахъитIытI Гьыцба Инар.

КъБР йгIатыцIыз агвып йрахIбаз, ауаъа йгIаныршу АААК ашта хъвшара аунашвачпагIв Пшенокъва Владимир а-Конгресс пхата йъарпылыз ахъазла дщырзыразу йхIватI, ауи анхагIвчва йлырхыз апроектква дахIврала йдырхъйарныс дрызхIвахIвтI, йацынха йъауаш агIаджвыквцIараквагьи рзырхъйушта дшгвыгъауагьи йхIватI.

«ЙахьчIва хIанйара пхата йакIвшатI. СогIвым йаъу а-Конгресс ауысхарта анхагIвчваквакI йапхъахауата хIрабадыртI, хIъабабаз швабыж йхIгвапапI. Къабар-Балкъар апны апсуа-абаза диаспора рыцIа джьгарта йрылакву гвщтIыхра рылубгIитI. Сшхъвыцуала, апхъахьыла анхара рыцIа-рыцIа йымчхалуштI. ХIара швабыж йхIтахъыпI Апсны ахъаз, адиаспора рыхъаз бзиракI хIхарныс», – йхIватI Пшенокъва.

«Асквшква 1992-1993 рагIан йакIвшаз Апсны ауагIа р-Абашта айсра аветеранква» жвлара адкIылара аунашвачпагIв Шардан Тимур йкьазу ангIадза АААК анхара асабапра рыцIагьи йалахIара ахъазла а-Конгресс ашта хъвшараква йашIамсуа йайчважвалара, йацынхалара шатахъу дацIачIвагъватI.

«ХIанйалара, хIайчважвалара атахъыпI. ЙацыхIчIву ауысква хIацыта йхIхарныс рыцIа ймайразлуштI», – йгIаликIгIатI Шардан Тимур.

Анйара ъадзакIвшуз уыс щарда гIащтIырхтI, ашта йгьи ашIыпIа уысхартаква зынгьи йызшIамшвас уысквакI йрынйарыквын ауат ралыргарала швапхата йдырхIахьаз абархIвтI, уахьчIвала хачIвыта рпахь йгылу, ауат шдырхъйауа йаквчважватI, хвгIахвтрала ауысхартаква гIаныршара, датшагьи экономикала ацынхара анархараква щаквдыргылтI.