«Ирӡтәым» проект шIыц анхара джвыквылтI Гвдауыта йапхъахауа аквтанай апхьарта апны Адуней апсуа-абаза конгресси апсуа бызшвала арыпхьагIв Джугелиа Инни ркъарула.
Адуней апсуа-абаза конгресс агвып Апсны акъральыгIва университет апсуа базшва акафедра арыпхьагIв Джугелиа Инна дрыцта апроект шIыц «Ирӡтәым» (апсуа бызшвала – йрыдзчIвым, йрыдз йамуаш) джвыкврыжьтI. «Ирӡтәым» проект ЛакIоба Нестор йыхьыз зхъу Гвдауыта йапхъахауа аквтанай апхьарта апны ахаша, мартI а 1 йауырщттI.
Апроект асабиква ргвква рпны рцри адгьыл ахьыла бзибара гIаршIыхара, ауат гIвыцкьара, пхащара йрапшу апсуа хIальква рыладыркIра, апсуара йгIацIанакIуа агвбайара дырдырра йырзынархапI.
Апроект йапхъахауа ахъвы апны Гвдауыта района апхьартаква рапхьагIвчва ахIбачва апсуаква йырцIасу акультура йазынарху 10 лекциякI йрызгIапхьуштI. Ауат акIвдыршарныс атурыхдырыгIвчва, абызшвадырыгIвчва, аэтнографква, аэтнологква гIазшIыртлуштI.
Апроект лызхыз Джугелиа Инна ауагIахъа культура йазынарху ауи йапшу ауысква магIын ду шрыму гIалылкIгIатI.
«Адуней апсуа-абаза конгресс съарыцынхауа абзирала йахьчIва «Ирӡтәым» проект апкъ йтата йапхъахуз алекция акIвшатI. Йара ахьыз йгIаунахIвитI ауи ззынарху – «йурыдз йамуаш». Ауи акIвпI апроект амурад хъада: хIара апсыуата хIызчпауа закIгьи хIрыдзта амаль гьамам – хIыбызшва, хIгвбайара, хIтурых, хIуагIахъа лкIгIараква», – лхIватI Джугелиа.
Ауи йшылхIвауала, йгIадзынгылуа абанпара руагIахъа ртурых, ргвбайара, рхабзакви рцIаскви ъарархIвуа апроектква рыцIа йщардазара атахъыпI.
«Ласыта тшызпсахуа уыжвгIанчIви дуней апны ауагIахъара мажаква ныцIуата йанаъазара ауагIахъа мачIква рылкIгIараква шгIархчуш йащтазара атахъыпI», – йгIацылцIатI ауи.
Йапхъахуз алекция акIвлыршарныс дгIадрайгватI Апсны акъральыгIва музей этнологияла ахъвшара анхагIв ахIба Шамба Инга. Ауи апхьагIвчва апсуа пшцIа ацIаскви ахабзакви ралхIвтI.
«Йапхъахуз алекция ахъаз темата йгIалхIхтI «Апсуа пшцIа: ацIаскви ахабзакви». АпшцIа апны гьакIвымма щта апсуаква ркультура ъагIаджвыквылуа. ЙхIвара атахъыпI ари атема щарда шгIацIанакIуа, хIара ауи ахъатаквакI ракIвпI хIызквчважварныс хIызхадзаз», – лхIватI Шамба Инга.
Ауи йгIалылкIгIатI апхьагIвчва рыхъазла апсуа культурала алекцияква абараса йапхъахауата йшакIвшауа, ашIаквагьи ари агIаджвыквцIара гвышхвара ду шгIарыланацIа.
«Сара йахьчIва багъьата йсыласхIватI хIара хIшIара рцри культура швабыж йшрымагIальамату. ЧкIвыныргIа азцIгIараква гIасыртуан, амакIыраква джьгарта йгIарылалуан, дара йырдыруа апсуа цIаскви ахабзакви йрыквчважвун», – йапхъахуз анйара йгIалылкIгIаз гIалхIватI Шамба Инга.
Йапхъахуз алекция йаздзыргIвытI Тарба Борис йыхьыз зхъу Бамбора аквтанай апхьарта апхьагIвчва ахIбачвагьи.
Бамбора апхьарта апхьагIв ЧквакIв Никита йгIадзынгылуа абанпара ацIаскви ъадаб-намыси ахIбачва йгIаршIыркIгIара атахъыта йпхьадзитI.
«ЙахьчIва Адуней апсуа-абаза конгресс йаднагалыз алалра хIалан. Сшапшызла, алекция зымгIвагьи йыргвапхатI. ХIара шIыцра щарда гIдыртI. Ари анйара хIзадызгалыз зымгIва сшырзыразу расхIвра стахъыпI. Апсуаква йырцIасу акультура зджьара йгIанымхауата йалачпапI, йгIауарымхIвкIва йгIаугвнымгIвуаш щардапI. ХIара ашIаквагьи ауатква зымгIва хIзалыргауата хIгьаъам», – йхIватI ЧквакIв.
Датшагьи ауи йгIаликIгIатI ари йапшу апроектква рбзирала апсуа культура ууырдырныс рыцIагьи йшуымагIальаматхауа, ауат адырраква ухъа ду йшудырбахуа.
Адуней апсуа-абаза конгресс ахьыла «Ирӡтәым» проект дахъпшылитI чкIвыныргIа ртшауацIыхрали физкультурали ахъвшара аъачIвагIагIв Квициниа Есма.
Ауи йгIалылкIгIатI апроект йамурад хъаду йгIадзынгылуа абанпара йапхъанчIвийу апсуа уагIа рхъа ъагIаджвыквылуа рдырныс рыцIагьи йшрымагIальаматхуш, рцри чIвыла рхъа аладухауата йшаъазлуш шакIву.
«ЗымгIвагьи йгIаргвынгIвитI утурых, укультура, уыбызшва уымдыруата ухъа абгата хвы шузаквымцIуш. Ргвбайара дзырдыруа ари йапшу алекцияква апхьагIвчва ауагIахъа цIасква рыцIа йырзаргванхарныс йацхърагIуштI. Апроект апкъ йтата хIара интерактив амаль гIахIрысабапуамцара ауат йапхъанчIвийу апсуа уагIахъа ргвбайара дхIырдыруаштI. ХIгвыгъитI алекцияква йырквнагу хвы рзырбушта, даргьи сабап гIаргуашта», – лхIватI Квициниа Есма.
Апроект аныргIалыгIв йгIацылцIахтI ужвы ари асахIат апроект йгIвбахауа ахъвгьи йшазхъвыцуа – ауи ауацIа Очамчыра район апхьартаква рыхъазгьи арат рапш лекция адыргалуаштI.
«Ирӡтәым» проект йапхъахауа ахъвы лекция квпшыра амата Гвдауыта район аквтанай апхьартаква рапхьагIвчва ахIбачва рыхъазла асквш 2023 мартI йгIашIарышвта майдза йакIвшуштI.
швталра йа тшаншвцIара атахъыпI.