Адуней апсуа-абаза конгресс ауысхагIвчви Очамчыра район абзазагIвчви ранйара анакIвшуз АААК ашIыпIа хъвшара асовет гIандыршатI.
Барганджиа Саид
Адуней апсуа-абаза конгресс ауысхагIвчва Очамчыра район абзазагIвчва йрынйатI агIваша, февраль а 5 атшын. Анйара амщтахь а-Конгресс ашIыпIа хъвшара асовет гIандыршатI, ауи дахъадахатI Очамчыра абзазагIв Цвижба Дауыр.
Асовет йаларцIатI: Габелия-Делба Екатерина, Цвижба Лика, Чагава Сельма, Делба Бадри, Кортава Ахра, Шоуа Мадина, Микая Нора, Пачулия Тимур йгьи Чилачава Мадина.
АААК архъйагIв секретарь Гицба Инар анйара йалакваз йрайхIвтI а-Конгресс нхарата йакIвдыршауа, йаргвану агIамта апны ауат хачIвыта рпахь йдыргылуа. Ауи йгIаликIгIатI ари йапшу анйараква рпны мурад хъадата рпахь йдыргылуа йшрыуазакIу ашIыпIа хъвшараква рсоветква ргIаныршара.
«ХIара йхIтахъыпI атачIв бзазагIвчва дара-дара йапшым ауысква гIащтIырхларныс, ауат дахIврала йдырхъйарныс ахъазла хъвдаквыщт зму амальква гIанхIыршарныс. АААК ашIыпIа хъвшараква рсоветква гIандыршахьатI Гал йгьи Ткъварчал районква рпны, ауат хIынхара джьгарта йгIалалхьатI», – йхIватI Инар.
АААК ЙхIаракIу асовет йалу Чирикба Вячеслав Очамчыра абзазагIвчва рпахь дгIачважвауата а-Конгресс анхара амагIны шдуу йхIватI, зымгIва йрапхъата, апсыуа-абаза уагIа ргIахчари ртшауацIыхри рпны.
«Сара схъатала йшспхьадзауала, ари хIуагIахъа адызкIылуа лшарапI, йшпакIву ухIварыквын хIара хIдиаспора ду адунейла йхъылапсапI. Мурад хъадата йгылапI хIэтнос аглобализация йачвхъыхIхчарныс, йхIрыбагъьарныс. Сшгвыгъауала, шваргьи адунейла апсыуа-абаза уагIа адзыргылуа ари адкIылара ду асатырква швгIарылалуаштI», – йгIацицIахтI Вячеслав.
ЙгIайззакваз рпахь датшагьи дгIачважватI Апсуа-абаза уагIа рдуней ассоциация (Адуней апсуа-абаза конгресс асквш 1992 агIан араса йапхьун – аредакция ррытаразга) агIаныршара джьгарта йалаз Очамчыра абзазагIв Думааа Апполон. Ауи асквш 1992 октябрь агIан Лыхны апны АААК йапхъахуз асъезд шакIвшуз ауысла йгIагвалашвахраква йгIайззаз йрыцагIвишатI.
«Очамчыра район сквшкъомкI цIитIта Абазашта йтабзазауа хIайщчва йрабадыритI. ХIара хIатгIачвакIпI. Айсра апхъалагьи (Апсны ауагIа р-Абашта айсра – аредакция ррытаразга) хIара аргваныта хIащтаныкъвун. Сара йызнымкIва Черкесск саъан, ауаъа хIайщчва йанакIвызлакIгьи швабыж пхата йгIахIпылуан. Кьангьаш гьазгIазгуам Эгьзакь Мусса а-Конгресс унашва ахъицIауата ауи анхара агалагьи хъвдаквыщт шамазлуш», – йгIаликIгIатI ауи.
Айззара апны йгIачважватI датшагьи а-Конгресс апхIвысква йгьи чкIвынргIа рсоветква рунашвачпагIвчва Ардзынба Гета йгьи Торчуа Леван. Ауат дара унашва зхъырцIауа анархартаквала а-Конгресс нхарата йакIвдыршауа гIархIватI.
«УахьчIвала хIара йапхъахауа хачIвыта хIпахь йгылапI Апсны арайонква зымгIва рпынгьи а-Конгресс ахъвшараква рсоветква ргIаныршара, ауи уыста йырхъйачIву гIазырбауа йауацIыху акарта адынхалра йащатапI. Ауи акарта кытипхьадза, къалипхьадза баргвырата, тахъырата йзынйауа знархару ажвлара проектквала йалазлуштI. Ужвы мурад хъадата йгылапI лшара зму, джьгарта йынхуш агIвычIвгIвысква ргIарыбергьыльра», – йгIалылкIгIатI Гета.
Ардзынба Гета йшылхIвазла, апхIвысква рсоветква рхачIв хъадаква йрыуазакIыпI ахIаракьатра тшадызкIылуаш, зхъатачIв уыс гIаджвыквызцIарныс зтахъу, ауаса гвы ззымчпауа апхIвысква рыргвышхвара, йрыцкIра.
«ХIара апхIвысква ркытква рпны йшыртанхуш, хъахIара шрымазлуш апшта хIырцхърагIарныс хIтахъыпI. Апсны арайонипхьадза апхIвысква ргIаджвыквцIара гIахIыршIыхарныс, ауат хIыргвышхварныс, ркъару йазхъадхIырцIарныс хIтахъыпI», – йхIацылцIахтI ауи.
Анйара апны бызшва щардала йынхауа, а-Конгресс анхара, апсыуа-абаза уагIа рэтнография йгьи хIэтнос агIвычIвгIвыс дуква йауацIыхта йгIарыквчважвауа ахабарргарта портал гIадырбатI.
Айззара йалакваз йддырбатI Адуней апсуа-абаза конгресс йрыцынхауа «Алашара» адкIылара анхара йгIаквчважвауата ашвъаква йгIархъыху афильм. «Алашара» абазаква рбзазара уысква рырхъйара, ауат джьгарта рыдынхалра апны хвысквша рурала йшвапха бзипI, йхIаракIу агIарбараква рымапI абаза кытква рпны аспорт йгьи акультура ртшауацIыхрала, йакIвдыршитI йалачпу анаука нхарагьи.
Адуней апсуа-абаза конгресс ауысхагIвчви Очамчыра район абзазагIвчви ранйара хпахитI, ари йапшу анйараква акIвшуштI Апсны Республика анахьанат арайонква, акъалаква зымгIва рпынгьи. Анйараква рпны Апсны абзазагIвчва а-Конгресс йалалырныс, ауи анхара тшадыркIылырныс йаквгIазшIыртуата, йаквдыргвышхвауата йрачважвуштI.
швталра йа тшаншвцIара атахъыпI.