Хвитта абакIрала аклуб «Абаза» жвасквша ъахъыцIуа дыртлапIауата АААК ахабарргарта портал ауи йгIаквчважвауа абзазара йгIахъыху фильм арыхIазыртI.
Адуней апсуа-абаза конгресс асквш 2021 агIан жвасквша зхъыцIыз «Абаза» хвитта абакIрала клуб йгIаквчважвауа абзазара йгIахъыху фильм ахънахтI.
Афильм АААК ЙхIаракIу асовет аунашвачпагIв, Апсны апынгьи ауи утыцIтагьи йбергьльу абзихагIв Эгьзакь Мусса йгIанйыршаз аклуб атурых, ауи шгIаншаз, хIапхъахьыла хачIвыта йаргылуа йгIарыквчважвитI.
Афильм аклуб ъанхауа, ауи гIанзыршаз, йапщылу ауагIи аспортсмен щардагIви ъабзазауа, уыс ъархауа ашIыпIаква рпны йхъырхтI. Ауат йрыуапI Москва, Наро-Фоминск, Санкт-Петербург, СогIвым, Гвдауыта. Афильм апсуа спортсменква йырпщылу турых щардала йалапI. Ауи аспортсмен йымгIва шбаргвызлауа, ауи йбзазара апны абжьагIви тшъайбжьауа аклуби магIныта йрыму гIанарбитI.
Аклуб гIанзыршаз йгьи йапрезиденту Эгьзакь Мусса аспорт асаби йхIаль шщаквнаргылуа, ймурад даззырцуш йагъьу амгIва йызгIалхуа дшабжьауа гIаликIгIатI. Ауатква ауи уацIыхъван абзазара апны дзынйауа абаргвыраква дырчвымшвауата дырхъысырныс йгIайцхърагIитI.
«АбакIрала асекцияква рпны абжьагIви абжьамати разазаъащаква аби апи разазаъащаква йрапшпI. Асекцияква рпны ачкIвынчва рхъагвы аквыта, айгIайра йазгIашыкъта, азаджв азаджв хвы йзыйбахуата, ъадаб рымата, рпсадгьыли рцIаскви бзи йырбауата йырбжьитI. Йгьи, ажва аламкIва, рзгIвадара дрыбагъьитI», – йхIватI Эгьзакь Мусса.
Аклуб апрезидент йгIаликIгIатI агIвычIвгIвыс аспорт тшанадикIылуа дымшвауата йпахьла дшпшуа, датша зджьакIы ргIапсарагьи ргIатгараквагьи дшрызсакъызлауа. Ауи йшипхьадзауала, спортла йапымшвтуата ухъа уадынхалуазтын «убзазара апны зымгIва ртара йтагылитI», зымгIвалагьи йуызхIитI – угвбайарагьи алата.
«Ауатква зымгIва рбзирала аспортсмен атшыбжьарта пещ данджвылцIхрагьи йхъауысквагьи гIайыдахIвитI, тгIачва згIвада гIанйыршитI, акъраль атшауацIыхрагьи йкъару алайцIитI», – йажва найырдзатI Эгьзакь Мусса.
Ауи АААК ари абзазара йгIахъыху афильмла апшыгIвчва адахIвра амгIва днарбарныс алшата дгвыгъитI.
«ХIара ансимшы шIыцракI тшазыгIбжьитI йгьи багъьата йхъахIцIитI йащтагIайуата йхъыхIхуаш афильм рыцIа йшагъьхуш», – йхIватI ауи.
Эгьзакь Мусса йшихIвауала, афильм йадынхалуаз агвып рахIа йыззпшуа ауи йанапшра зсабиква спорт йадызкIылуаш ан-абачва рыцIа йшщардагIвхуш акIвпI. Мусса ХIабальа йпа кьангьаш гьазгIайгуам зсаби йызхIара, йуачIвымш пшдзахара, лашарахара зтахъу дзачIвызлакIгьи афильм йгIанарбауа «адахIвра амгIва» дштайыргылуаш.
«ХIара абакIра швапхата йгIахIахвын абзазара апны дахIвракI дазынадзарныс зтахъу агIвычIвгIвыс йхъа дшадынхалуаш гIахIырбатI, дасу йара рыцIа йгвапхауа аспорт квпшыра шгIалихуаш даквгIазшIыхIтитI», – йхIватI ауи.
Хвитта абакIрала аклуб «Абаза» даквчважвауата аунашвачпагIв йгIаликIгIатI ауи ъадзанхауа ажвасквша руацIа ауаъа тшызбжьаз аспортсменква адуней, Европа, Россия, Апсны рпны йакIвшуз анкъвакъвраква йрылата адахIвра дуква шгIатыргаз.
«ЩардагIвы аспорт йамастерхатI, дуней класс зму спорт йамастерхатI, ужвы йгIадзынгылуа ашIаква швапхата йдуырбуш, йызшIпшуаш аспортсменква гIаншатI. ЗкьыгIвпхьадзара йнадзауа ачкIвынчва хвыцква аурам йыкву ацкIыс зымгIвалагьи йрызхIауата рхъа йадынхалырныс рыцIа йгIалырхтI. Ажва гьалам, дахIвра йазынадзаз аспортсменква ауат нбжьагIвта йзабадыруаш рызгIалхуа йырбжьитI, збзазара зпсахырныс гвы ззымчпас ачкIвынчвагьи ауи амаль амамкIва йшырчпуш йаквдыргвышхвитI», – йпхьадзитI Эгьзакь Мусса.
Афильм йадынхалуан Лазба Амина унашва зхъылцIауа Адуней апсуа-абаза конгресс ахабарргарта портал агвып.
Афильм дарежиссерпI ахабарргарта портал авидеограф Хварцкиа Илона.
Ауи йшылхIвазла, анхара асквш 2021 август агIан йалаган мызквакIла, декабрь ацIыхъваква рагIан, йалдыргатI.
«Ауи азаман ауацIа хIара Апсны, Санкт-Петербург, Москва, [Москва область йаланакIуа] Наро-Фоминск рпны абжьагIвчви абжьаматакви ргIачважвараква анхIцIатI. ХIара хачIвыта хIпахь йгылан апшыгIвчва аклуб атурых йахахIыргIвазарныс, абжьагIвчви абжьаматакви рхабарква рахIхIвырныс, хвитта абакIра апхъахьыла йшгIауыхъвуш гIахIырбарныс», – лхIватI Хварцкиа.
Арежиссер йгIалылкIгIатI афильм дара афырква ргIахIвахраквала йшалу – ауат турых 20 райхIа йшнадзаз.
«ХIара йдучвам гвыпта хIынхун. ЗымгIва хIыхъазлагьи ари тшыззыгIбжьуз уыс шIыцын. Сара йджьасщун аклуб йалакву, йалкIгIата – асабиква, йыркIыз амурад шаурымщтуа, ргвква шбагъьу, рхъагвы шакву», – лхIватI Хварцкиа.
Афильм йгIанарбауа гIазхIвауа АААК ахабарргарта портал ажурналист Барганджиа Саид йакIвпI.
«Сара насыпрата йызбитI хIредактор хъада Лазба Амина лунашва хIацIата йхъыхIхыз «Абаза» клуб йгIаквчважвауа афильм адынхалра съалаз», – йлахIвараква хIыцагIвишатI ажурналист.
Ауи йшибауала, АААК агвып йгIарыдахIвтI «апсуа хвитта абакIра ахIауа рылархIварныс», збзазара гIальамату гIвычIвгIвыс джьащахъва щардагIв йрабадырырныс.
«ХIара йхIтахъын аспортсмен кIьыдаква рхабарквала Апсны апны хвитта абакIра штшауацIнахуа гIахIырбарныс. Аспорт йахъазымкIва дасу йбзазарагьи хIаквчважвун. Ауыла йгIауахвырквын, хIара хIшгвыпу хвитта абакIра датшата хIапшуа хIцатI. Апсуа абакIыгIвчва – йаларпу тгIачва дукIпI, ауи зджьара йгIанымхауата тшалауырдухушта йаъапI», – йгвгIанаграква йхIватI Барганджиа.
Ауи йгIацицIахтI йалкIгIата йшйымаджьащахъваз АААК ЙхIаракIу асовет аунашвачпагIв, «Абаза» клуб агIаныршагIвы йгьи апрезидент Эгьзакь Мусса дгIайырчважварныс.
«Ажва гьалам, сара сгвы йалахIун Эгьзакь Мусса дъагIасырчважвуз. ХIара гIвымшкI хIыманта знархараквала йапшым азцIгIара щарда йыстырныс сынасып йгIанакIытI. Сара йапхъахауата ари апш форматла Мусса ХIабальа йпа сйачважвун, йаргьи ауи амщтахь сгвы рыцIагьи тшгIащтIнахтI, сдырраква йрыласырхIата закI гIасдахIвырныс рыцIагьи йстахъхатI», – йгIаликIгIатI ажурналист.
Афильм операторта йхъызхуаз АААК ахабарргарта портал асуратхъыхыгIв йгьи сурат аныргIалрала аредактор АгIвдза Наала лакIвпI.
«Сара афильм ахъыхра сгвапхатI. ХIара кино – гвацчпазтынгьи, абзазара йгIахъыхта акIвызтынгьи, публицистиказтынгьи, рекламазтынгьи – хъыхIхлауата хIгьаъам. Ауи йгIалцIла ари йапшу анхара йанакIвызлакIгьи йджьащахъвапI, сабапгьи алапI. ХIара [уыжвгIандзара] кино зынгьи йацхъызымхсыз гвып шIыцта хIацынхатI. ХIгвып шадкIылу сыласхIватI. ДзачIвызлакIгьи ауыс йымагIальаматын, анхара зджьара йгIанымхауата йгвлахIаран», – ллахIвараква хIыцагIвылшатI АгIвдза Наала.
ЗымгIва рацкIыс лгвы йгIатахаз ауи «дыздсылыз адуней шдатшу шлылалхIваз» акIвпI.
«Сара йапхъахауата спорт адуней араса цIолата салалтI, ауи йапщылата адахIвра дуква гIатызгаз ауагIа срабадыртI», – йылхIвара лтахъыз гIахIгвынлыргIвытI Наала.
Хвитта абакIрала аклуб «Абаза» йъадзанхауа ажвасквша руацIа уыс ду архъйатI. УахьчIвала Апсны шабгу апны аклуб йауата аспортсменква йрыдынхалитI бжьагIвчва 32-гIв. Ажвасквша руацIа аклуб бжьамата 3000-гIв райхIа гIацIнащттI. УахьчIвала ауаъа хвысквша йгIашIарышвта жвицсквшадза йырту цIайта 648-гIвы тшырбжьитI. Аклуб асекцияква Апсны арайонква зымгIва рпны йгIахъыртIын йынхитI. Ауаъа тшызбжьаз йрыуата жвицыгIв ужвы Апсны утыцIта йаъапI. Жвасквша руацIа аклуб анхари Апсны апны абакIра тшауацIнарыхри сом мильуан 70 раъара аларцIатI.
швталра йа тшаншвцIара атахъыпI.