Хвитта абакIрала аклуб «Абаза» абжьамата Кварандзиа Денис Санкт-Петербург апны асабиква дырбжьагIвхатI.
Амичба Амра
Хвитта абакIрала аклуб «Абаза» абжьамата, сквшы гIважва йырту Кварандзиа Денис щарда мцIуата Санкт-Петербург апны асабиква йбжьауа далагатI. Абжьара дшазцази аспортсмен шIаква рбжьара дшапшуи ауи АААК ахабарргарта портал акорреспондент йгIайайхIвтI.
ЙыгIвза дгIайцхърагIан дбжьагIвхатI
Кварандзиа Денис Апсны апны йынхауа хвитта абакIрала аклуб «Абаза» апхьарта апны тшибжьун, асквш 2016 агIан Санкт-Петербург апны аолимпиецква ъадрыхIазыруа 2-хауа аучилища днарахвтI. СынчIва июнь ауи ауаъа йапхьара далгитI, ужвы йдиплом нхара йгIвитI.
Асквш 2021 адзын аспортсмен шIа йапхьари Union Wrestling SPB апны йынхари ацйырцауа далагатI, ауаъа ауи хвитта абакIрала асекция апны асабиква дрыдынхалитI.
БжьагIвыта дынхарныс дызшIызтыз курскI апны дызцапхьауа йыгIвза, хвитта абакIрала Россия аспорт амастер, России Санкт-Петербурги йалакIу ркомандаква йрылу Исаев Максим йакIвпI.
«Максими сари аучилища апны хвысквша цIуата хIацапхьитI йгьи тшацыгIбжьитI. Ауи гIвысквша цIуата асабиква йбжьитI, саргьи нхара сызшIиттI», – дукI йайымрыхьдзакIва йхIвитI Денис асекция абакIыгIв шIата 150-гIвы раъара шгIайуа, йыгIвзагьи цхърагIагIв – «йгIвыджьхауа абжьагIвы йцхърагIара» шитахъхаз гIахIгвынйыргIвуа.
АбжьагIв шIа уыздынхалквауа ргIатгараква абжьагIвы йынхара йгIаларцIауа ахъагIара шйылайхIвахьаз хIыцагIвишатI.
«Йучпаз закI шгIанацIгIауа анубауа, асабиква гIатгараквакI йанырзынадзауа йгIаугвынгIвитI угIапсара ахъазгIваца йшымдзуа, ауи гвыргъьарапI», – йхIвитI Кварандзиа.
Union Wrestling SPB апны хвитта абакIрала асекция 4-14 сквша йырту ацIайква цитI.
«ЙаъапI «абагъьачкIвынква» – хIва хIызпхьауа агвып, ауи рахIа йхвыцкву, 4-6 сквшы ахIа йыртам ракIвпI. ХIара ауат абакIра йгьазыгIбжьум – йазхIрыхIазыритI, йхIрыбагъьитI. Агвып хъада цысквша йгIашIарышвта 14 сквшадза йырту ракIвпI. МшкIы ауацIа пщгвыпкI хIызгIайитI, агIвба са йызбжьитI – ахвыцква мчыбжьыкI апны хын, рыцIа йахIбакву – ансимшы», – йынхаща хIйырдыртI апсуа бжьагIвы.
Йынхара даквчважвауата Кварандзиа Денис йара йыхъаз мгIан ду змаз анйаракI гIайгвалашвахитI. «Абаза» клуб аюбилей йазынархаз афильм анхъырхуаз ауат ртшыбжьарта дрызнашылтI АААК ЙхIаракIу асовет аунашвачпагIв Эгьзакь Мусса – хвитта абакIра бзи йызбауа, СССР аспорт амастер, хвитта абакIрала Ленинград щардала йачемпионыз.
«Мусса Хабальа йпа сйабадыртI. Схъа йгIатахатI ауи йгIадзынгылуа ашIара бзира шырзыйтахъу. ЙгIадзынгылуа апсуа, абаза шIаква – абакIыгIвчва йырхъазымкIва зымгIва рыхъазла щарда йчпитI. ХIара хIайчважватI. Ауи ауысла хIхъвыцща аквшвауата йгIацIцIын ауи анйара сгвы йгIатахатI. Саргьи Эгьзакь Мусса йбзирала Апсны апны йгIандыршаз хвитта абакIрала аклуб «Абаза» апны тшызбжьакваз срыуапI. Ауи ареспублика апны спорт тшадукIылра ахъазла аъаща бзиква гIанйыршатI», – йхIватI Кварандзиа.
Ауи йшипхьадзауала, спорт чкIвыныргIа «йхъзырчIвауа» агаджетква йгIаркъвызгуш къарута йалитI. Уахъгьи тшынгьи ателефон знапIыцIакIу, дхъвмаруа интернет йтачву ацIай дкъарусызта дгIадзынгылитI, дашшитI Денис.
«Ауаса ауат ахъазгIваца йгьузашIакIуашым, заман зларгуш – дара ауат аспорт секцияква ракIвызтI – датша закIы дуырбара атахъыпI. Асаби спорт ахIауа даланархIвара магIын ду амапI. Ужвы йгIадзынгылуа чкIвыныргIа къару гьрылам. Ауи йашвхIаусыгIвакIу ан-абачва рсаби рыцIа дагъьхара, къару йылазара ахIатырла тшдрыгIапсара гьыртахъым. Спорт агIвычIвгIвыс дарыбагъьитI, апхъагылагIв хIаль гIайыланацIитI. УацIыхъван ауи абзазара агалагьи рыцIа йзымайрахитI, йъадаб щаквнаргылитI, ауи дандухара швабыж йгIайыхъвахитI», – йбзазара дзызнабжьаз хIыцагIвишитI Денис.
Абжьамата йыхъазла абжьагIвы ужвыгьи абакIта далитI, йпхьадзитI Кварандзиа. Ркъару йазйырхIауа йацта абжьагIвы асабиква абзазара апны хвы змугьи гIаргвынйыргIвитI. Швапхата йгIаг йауаштI асабиква агаджетква йгIаркъвыргара ахIатырла ауат азарарчква «йшрабакIуа».
«Агаджетква, асоцсетьква, аблогерква – ауатква зымгIва асаби кIара йгвы йазгIамихуа дырчпитIта махъа-щахъала дынхарныс гьйымагIальаматхым. ХIара йхIборчпI асаби абзийи агвымхи йзалыргара, мгIва тамам дыквыргылра, аны-абата уизалра. Спорт квпшырата тшыздикIылуаш гьакIвым йхъаду, абзазара апны йгIалихуашгьи – ддипломатхушма момкIва дспортсменхушма – магIын дукI гьамам. МагIны зму асаби дшхвыцу абзазаща згIвада дхънарыхра акIвпI», – йгIаликIгIитI абжьагIвы.
Спорт апны йымгIва
Асабиква йбжьауата дыззынадзауа адахIвраква йырхъазымкIва Кварандзиа Денис йхъаталагьи анкъвакъвраква рпны йгIатгараква гьмачIым. Ауи апшта, сынчIва апрель агIан сквш 24-дза йырту чкIвыныргIа рквта Санкт-Петербургла апхъагылара азабакIрала анкъвакъвраква рпны йапхъахауа агылта йкIын спорт амастерра норматив йырхъйатI.
Йара данкъвакъвлушма момкIва бжьагIвыта дынхарныс рыцIа йгIалихуашма – Денис ужвыгьи тамамта йгьидырам.
«Азаман йгIахIнарбапI. Апхын мачIкI тшпсщуштI. Спорт салищтара удын, хьыгIа щарда сыквшватI, йырбзихахра атахъыпI. Ужвы тIакIв тшгIащаквсыргыхта апхын ацIыхъва йгIалсхуаш здыруаштI», – йаргвану агIамта йгвы йтакву хIыцагIвишатI аспортсмен йгьи йгIацицIахтI уыжвгьи дыззычпу йхъмаштылра ахъазла йара йхъаталагьи штшибжьалауа.
Ужвы аолимпиецква ъадрыхIазыруа аучилища апны ауи дызбжьауа Россия аспорт амастер, Санкт-Петербург апны сквш 24-дза йырту аспортсменква рбжьвгIвы хъада Чураев Адександри 18 сквшадза йырту аспортсменква рбжьагIвы ахIба Николаев Сармати ракIвпI. Денис дырзыразта йгIайгвалашвахитI Апсны апны данцIайыз дзызцалуз абжьагIвчвагьи.
«СогIвым апны йапхъахауата сызбжьуз ДжопIуа Тимур йакIвын, ауи йымщтахь – Алабян Навик, уацIыхъван Бащыр-оглы Манучар сйыквшватI. Амтшашаква ракIвмызтын ансимшы атшыбжьарта сцалун. Щарда мцIуата адуней зхIваджьыз Манучар хIйыцта щардала Швача, Краснодар, Ростов, Ставрополь анкъвакъвра хIцалун. Ауи йакIвпI Санкт-Петербург аучилища снарахвырныс сыхьаз разхIвыз», – йбжьагIвчва гIашIипхьадзатI Денис.
Кварандзиа йгIаликIгIатI Апсны апны «абжьагIвчва шбзийу, руыс бзидздзата йшырдыруа», ацIайква рызхъауцIушта йшаъу. Ауи кьангьаш гьазгIайгуам ауат асабиква спорт йшхънадрыхуаш, чIыдала йдрыгIапсауамцара ргвы шачвтрымкъьуш, дасузлакIгьи кIьыда-кIьыда йшйыдгылуаш.
«Заджв дбжьысщтпI-хIва сшвитIта рыхьызква гьсхIвушым. Ан-абачва зымгIва ргIариква руачIвымш шцуш йазхъвыцырныс йаквгIазшIыститI», – йажва найырдзатI аспортсмен.
Йгвалагьи хIзыгIахъитIтI – знымзара-зны Апсны апны йара йчIвыта спорт пещ гIахъитIра йтахъыпI.
«Апсны сгIайхырнысгьи сазхъвыцитI. Апхынла сангIайлара СогIвым атшыбжьартаква сцалитIта тшызбжьитI. Ауаса, ацIабырг схIвапIта, сара йсчIвыта закI сыргылра стахъыпI – йатахъу зымгIвала йадгалата. Ауи ахIатырла ужвы швапха сырхIата бжьагIв хIазырта сшгIайхуаш сащтапI. Асабиквагьи збжьауа салагатI», – йхIватI Кварандзиа Денис.
Апсны апны йапхъахауа, уахьчIвалагьи йзакIзаджвыкIу хвитта абакIрала аклуб «Абаза» асквш 2009 июль агIан йгIаншатI. Ауи гIанзыршаз йгьи ахъа угIалагата ргвышхвагIвта йазалуа Эгьзакь Мусса уыс хъадата йпхьадзуз Апсны апны асабиква аспорти абзазаща згIвади йхънарыхра акIвын. Аклуб анырхара, ареспублика апны хвитта абакIра тшауацIнарыхра 13 сквша руацIа ауи сом мильуан 70 алайцIатI.
Асквш 2022 йадахIвуата Апсны шабгула йырдыруа зымгIва аспортсменква йрыртуата йынхитI бжьагIвы 36-гIв. 13 сквша руацIа «Абаза» апны тшызбжьаз рпхьадзара 3500 айхIа йнадзитI. УахьчIва ауаъа тшырбжьитI 5 угIалагата 16 сквшадза йырту цIай 648-гIвы. Апсны арайонква зымгIва рпны аклуб асекцияква гIахъыртIын йынхитI. Апсны утыцIта йаъапI 16-гIв бжьаматакI. Асквш 2011 йгIашIарышвта аклуби Апсны Республика хвитта абакIрала а-Федерации ацыта анкъвакъвра дуква – Адуней апсуа-абаза конгресс ЙхIаракIу асовет аунашвачпагIв Эгьзакь Мусса йсогIа азабакIра – адыргаллитI. Ауат асквшква руацIа анкъвакъвра Апсны утыцIтагьи ахабар гатI – ансисквша ауи йалазларныс Лагъь КIавкIаз датшагьи Россия аштаква йгIартыцIуа агвыпква гIайлитI, ауи абзирала аспорт гвыргъьахъв ду йгIадгылуа зымгIвагьи айщчва уагIахъаква рацзакIыра ахIауала йпсыпнкъвгитI.
швталра йа тшаншвцIара атахъыпI.