Йбергьльу Адыгейшта ауагIа гIахIвра академия ансамбль «Нальмэс» Апсны акъалакви акыткви йгIарыкIвшауамцара рпрограмма шIыц гIадырбитI.
Барганджиа Саид
Апсыуа пшыгIвчва бзи йырбауа йбергьльу Адыгейшта ауагIа гIахIвра академия ансамбль «Нальмэс» Апсны йгIайтI. Ансамбль Согъвым апынгьи Ткъварчал апынгьи концерт гIадырбахьатI. Артистква Очамчыра апни Гвдаута апни йгIахъвмаруаштI – апрель а 11 йгьи апрель а 12 рагIан.
Ткъварчал апны аконцерт акъала Амш йадахIвуата апрель а 9 атшын йакIвшатI. ЙащтагIайуаз атшын ашоу дудздза гIадырбатI ансамбль бзи йызбауа Акъва абзазагIвчва рыхъазла.
Ари агIаншара асуратлента апшра >>
«Нальмэс» аршIыйара унашвачпагIв Хаджаев Аслан йшихIвазла, аконцерт программа 16 гIахIвракIла йалапI, агIахIвыгIвчва уагIа 80-гIвы йнадзитI.
«АгIахIвра йаквыргIапста асцена апны зынла йацгIаквлитI гIахIвыгIвчва 50-гIв йа 30-гIв. АгIахIвраква хIрыдгIапсалтI, ауаса апшыгIвчва йшыргвапхуш апшта йадгалапI. ХIара уахьчIвала апрограмма хIпсахтI, Апсны апны йрымбас агIахIвра шIыцква хIыцгIагIгтI. Апрограмма йалапI сквшы 25 раъара «Нальмэс» йгIадмырбахуаз агIахIвраквагьи, ауат шIыц-шIыц йгIащаквхIыргылхтI», – йхIватI Хаджаев.
Ауи апсыуа пшыгIвчва пIатIу рыквицIауата «ръадаб ахIагIари ргвапари» гIаликIгIауата дрыквчважватI.
«Швабыж гвапата йгIахIпылитI, агъь гьгIанымшауазапI. ХIара йанакIвызлакIгьи Апсны Адыгейшта йашIхIырпшитI, йауа ухIварыквын араъа зымгIвагьи хIцриква йыргIвызапI. ХIцришта йагIвызата акIвпI Апсны хIангIайлауа йанакIвызлакIгьи йшыгIбауа. Апсны хIара йхIбзибарапI. Щала, гвыла хIазакIыпI», – йгIацицIахтI агвып рыршIыйара унашвачпагIв.
Апсны апшыгIвчва дшырзыразу йхIватI ансамбль рбалетмейстер – Адыгейшта ауагIа рартист Шагуж Батурайгьи.
«ХIара адунейла къраль щарда хIгIарыкIвшахьатI, ауаса араъа апшыгIвчва йалкIгIата йгвапапI. ЙанакIвызлакIгьи алахIвараква рщардапI, йалкIгIата апсыуа гIахIвра ангIахIырбауа асхъан», – йхIватI ауи.
АААК ахабарргарта портал ужвы йакIвшауа «Нальмэс» ансамбль рконцертква дрыквчважвауата Апсны акультура йгьи атурых-культура тынха агIахчара рминистр Арсалиа Эльвира йшгIалылкIгIазла, «Нальмэс» гвыргъьахъв гIаншаракI дрыпшдзарныс ахъазла Апсны йангIадрайгвара ауралагьи йгвыргъьауа йгIайитI.
«Ансамбль рунашвачпагIв, агIахIвчва щарда цIуата хIапсыуа артистква пхата йрыщтаныкъвитI. «Нальмэс» Апсны ргIайра йанакIвызлакIгьи магIны зму культура гIаншарапI», – йгIалылкIгIатI Арсалиа Эльвира.
Адыгейшта ауагIа гIахIвра акъральыгIва академия ансамбль «Нальмэс» асквш 1936 агIан йгIаншатI. Асквшква 1941-1945 рагIан Абашта айсра Ду анакIвшуз ауи анхара ашIадрыстI, айсра алгата жвасквша анцIы анхара атаджвыквырцIахтI. Асквш 1996 агIан ансамбль йырквнадыргатI Адыгей Республика артшхъвага «Адыгейшта а-ЧIахIра». «Нальмэс» – адыгьа культура знархарата Къабард-Балкъар акъала хъада Нальчик апны йакIвшуз I Адуней фестиваль йалауреатпI. Йапшым асквшква рагIан ансамбль йарауаса Трыквшта, ЙадкIылу АгIарып Эмиратква, Сирия, Бельгия рпны йакIвшуз фольклор гIахIврала адуней анкъвакъвраква йырлауреатхатI
швталра йа тшаншвцIара атахъыпI.