Гвыдауыта къала аурамква рпны АААК ашта совет ауысхагIвчва ркъарула амышвкъваратара шIыцква дыргылтI.
Барганджиа Саид
Адуней апсуа-абаза конгресс ашта хъвшара асовет ауысхагIвчва Апсны акъала Гвыдауыта йапшым ахъатаква рпны 15 йнадзауата амышвкъваратара шIыцква дыргылтI.
Асовет аунашвачпагIв Лакоя Амра йшылхIвазла, ауат амышвкъваратараква дыргылырныс уыста йанырчпа ашта совет анщаквгылуаз йапхъахуз амшква рагIан акIвпI, «йара ауи агIан йщаквхIыргылтI турник шIыц хIхвгIата акъала апны йхIыргылырныс».
ЙгIашвхIыргвалашвахпI, рыцIа паса, сынчIва октябрь мыз агIан, абзазагIвчва аурам фитнес тшадыркIылырныс ахъазла АААК ауысхагIвчва Гвыдауыта апны воркаутхIва йызпхьауа атурникква шдыргылыз.
«Атурникква анхIыргыл амщтахь зынла йщаквхIыргылтI йащтагIайуа апроект хIадынхалырныс – уахьчIва акъала апны йгьаъам ззыхIва йауаш амышвкъваратараква рыргылра. Амышвкъваратараква рдизайн ауысла дискуссия, ажванахъа щарда аъан. Ауи йгIаныцIитI ауагIа хIунашва (Гвыдауыта апны АААК ашта хъвшара асовет – аредакция ррытаразга) шырдыруа, хIынхара ргвы шазыцхIауа. Ауи швабыж йхIгвапапI», – лхIватI Лакоя.
Амышвкъваратараква ррыхIаззырри рыргылри йырзынархата ахча азхIкIкIуа хIалагатI. «ХIпроектква йгIарылалуа ауагIа рпхьадзара рыцIа-рыцIа йалахIарквын ауи магIны ду амазлуштI. ЙгIахIахвырквын, ари азынгьи йхIыцызкIыз апхъа акция апны йгIахIцхърагIаз абзазагIвчва ракIвпI. Ари апроект ахча ащарда алазцIаз гIвыджь йнадзитI, ауат рыхьызква хIхIварныс гьрымуытI. МчбжьыкI ауацIа сом зыкь 37 аъара адхIкIылтI, ауи ахчала 15 мышвкъваратаракI хIхвгIарныс хIылшатI», – лхIватI Лакоя Амра.
Амышвкъваратара шIыцква йара араъа йаъу архарджьырта апны знадзара хIагIу апкъыгIваква йгIарылырхын йырчпатI, ауи йгIалцIла гIамта ауыра йгIарысабап йауашта йаъапI. Ауат акъала аквта урам – а-Фырква рпроспект – апны йандыргIалитI.
«Заджвымзаразаджвы 15 мышвкъваратаракI йымамачIхарныс ауаштI, ауаса зырхъйара уалагара атахъу йузынамырдзахуата йгIанхахуа йахърыкъьару ажваква, агIаргвыгъара дуква гьракIвым, укъару зквхъуш йдууым ауысква ракIвпI», – араса йылпхьадзитI Лакоя.
Ауи йшылхIвауала, АААК ашта совет агIаджвыквцIара Гвыдауыта район аунашвачпагIвчвагьи йацыркIын акъала апны амышвкъваратараква рпхьадзара йаладырхIатI, йауа ухIварыквын ауат ужвыгьи йгьнахъум. Амышвкъваратара шIыцква зымгIвагьи АААК йдыргылкваз йрапшызлуштI.
«Швабыж хIайгвыргъьатI хIакция арайон аунашвачпагIвчва йацыркIта йшнадырдзуш аныгIдыр, йалкIгIата йхIрыхIазырыз амышвкъваратараква йрапшта йддрычпата йъадыргылуаш», – лхIватI Лакоя лгвгIанаграква хIыцагIвылшауата.
АААК апроект шIыц акъала абзазагIвчвагьи йазыразта, йацыркIуата йалачважватI.
Смыр Элизбар Гвыдауыта апны дйытI, дгIадзынгылтI, Согъвым дталхызтынгьи ауралагьи йцри къала абзазара джьгарта далапI. Ауи Лакоя Амра длабадыритI йгьи йдыритI асовет ауысхагIвчва йгIакIвзыршауа ауагIа рбзазара агъьчIвра йазынарху йзачIвуысызлакIгьи магIны ду шазырбауа. АчкIвын шIа йшгIаликIгIауала, АААК ашта совет щарда мцIуата йгIандыршазтынгьи ауыс бзиквала рыхьыз ддырхIвахьатI.
«Ари ауыс швабыж амагIны дупI, йшпакIву ухIварыквын бзира щарда апщылапI. АчкIвынчви ахIвсси гвнымгIвара йашIашварыгьи ргвы дымрыдзырныс рзыстахъпI. Сара схъатала сырцхърагIарныс йанакIвызлакIгьи схIазырпI – ргвышхваралагьи, уыслагьи, ахчалагьи», – йхIватI Смыр.
Гвыдауыта абзазагIв Ажьиба Мадинагьи хвду аквылцIатI АААК ашта совет ауысхагIвчва ргIаджвыквцIара.
«Ауат ралацIара амагIны дупI хIыкъала ахъазлагьи хIкъраль ахъазлагьи. ХIкъраль акъалаква зымгIва рпынгьи йгIаншазарквын ауат рапш чкIвынчва гвып, абжараква здыруа, абзазара агъьчIвра ахъазла къаругьи амальгьи гIазауырныс йхIазыру, ауи, ажва аламкIва, уыла йгIащтIнахуата бзира щарда гIанарыцIсуашын», – лхIватI ауи.
Абзазара йаларжьыз апроект шIыцгьи ашта советква ркъарула йакIвшауа АААК анхарагьи гIайрахауата Адуней апсуа-абаза конгресс архъйагIв секретарь Гицба Инар йшгIаликIгIазла, ашта советква «АААК адгалра алаща йахъвыпI», ауи тшадызкIылуа «ажвлара рпны джьгарта тшгIазырбауа, згьагьара аъаща агъьызчIвырныс йащту абзазагIвчва ракIвпI».
«ЙгIауахвырквын, Гвыдауыта ашта совет анхара швапхата йуыргыл йауаштI. ХIара йхIщардапI згвы цхIауа чкIвынргIа, зкыт, зрайон, зыкъала, акъраль шабгу сабап азгIазгырныс йхIазыру. Ауат йрапшу ачкIвынчва къайматква ргIарыбергьыльра, радкIылра акIвпI хIара хIпахь хачIвыта йхIыргылуа. Гвыдауыта йауу ачкIвынчви ахIвсси кьангьаш аламкIва швапхата йалитI, згвы цхIауа абзазагIвчва зымгIвагьи ауат йыршIпшуашта йаъапI», – йхIватI Гицба.
Гвыдауыта апны Адуней апсуа-абаза конгресс ашта хъвшара асовет асквш 2019 октябрь а 3 агIан йгIандыршатI. Асовет йауысхагIвчвапI Анкваб Инал, Джениа Алмасхан, Гицба Хамида, ауи даунашвачпагIвпI Лакоя Амра.
швталра йа тшаншвцIара атахъыпI.