Асабша январь а 26 атшын Пискарёв чвахъабага нышвынтара апны Ленинград аблокада асквшква рагIан йаладзыз ауагIа рджьабауата ахIвралапакви ахIврапшдзакви щтIарцIатI
Барганджиа Саид
Ленинград афашист блокада йачвгIадырхвитхищтара йцIуа асквш 75 йадахIвуата Пискарёв чвахъабага нышвынтара апны йакIвшуз аджьабара айззара йалан Санкт-Петербург апсыуа-абаза диаспора ащтийыгIвчва АААК ЙхIаракIу асовет аунашвачпагIв Эгьзакь Мусса рапхъа дгылата. Айззара йалаз ачвахъабага апны ахIвралапакви ахIврапшдзакви щтIарцIатI.
АхIвралапаква январь а 26 атшын йщтIарцIатI. Йара ари атшын айззара йалакваз ахIврапшдзаква щтIарцIатI Къарча-Черкес йгьи Апсны йауата Абашта айсра Ду йаладзыз йырчвахъабагата араъа йгылу асинква рпынгьи.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса йшгIаликIгIазла, швабыж магIны ду амапI утурых уаргьи йудырырныс, ауи йгIадзынгылуа абанпараквагьи йдуырдырныс.
«Ауи хIара йхIгвбайарапI, йхIхъардурапI, хIара йхIкъарупI, ауи хIхъмаштылуа хIымгIвайсуазтын анцIралагьи хIымчхъазлуштI, хIымчхъазтын ауи атлахан йгIаншаз гьатагIаншахуашым», – йхIватI Эгьзакь Мусса.
Аджьабара айззара далан ажурналист, азъазарадырыгIв йгьи агIвгIвы Аджинджал Боча. Ауи асквш 2004 агIан Апсны йауата Ленинград аблокада йаладзкваз рчвахъабага плита агIахътIра дагIаджвыквцIагIвын.
Аджинджал АААК ахабарргарта портал йшгIарайхIвызла, сквшы 30 рурала ансисквша ари атшын йтгIачвагьи йыцта аблокада йаладзыз ауагIа йджьабарныс дгIайлитI.
«Петербург сара йгIвбахауа унагIвата, йгIвбахауа Псадгьылта йсзалтI. Ауат (аблокада йалашвакваз – аредакция ррытаразга) рбзазара швабыж йхьантан. Зынгьи йгIанымшахыргIатI айсра. ЗапхъанчIвиква зхъаштылхуа агIвычIвгIвыс йаргьи дгьырдырхуашым. Абанпара шIаква руагIахъа турых рдырра атахъыпI. ЙахьчIва йапшу амшква ауралагьи йыртлапIара атахъыпI», – йгIаликIгIатI Аджинджал Боча.
Пискарёв нышвынтара ЙгIвбахауа адуней айсра йаладзкваз рнышвынтараква рквтала адуней апны зымгIва рацкIыс йдупI. Асквшква 1941-1944 рагIан ари анышвынтара апны акIвын йъацIарцIуз Абашта айсра Ду йаладзуаз. Айщчвара нышвынтараква рпны Ленинград аблокада йаладзквази Ленинград фронт апны йырщыз айсыгIвчви рнышвхъв раутI – зымгIва шалу йапшым агIарбараквала уагIа зыкь 470-гIв йгIашIарышвта зыкь 520-гIв раъара йнадзауата.
Апсны йауата блокадала йкIвыршаз Ленинград йазгылата йаладзыз айсыгIвчва рчвахъабага плита асквш 2004 май мыз агIан йгIахъыртIытI, Къарча-Черкес республика йауаз рчвахъабага – асквш 2008 сентябрь мыз агIан. Ауи Пискарёв ачвахъабага комплекс апны йапшым ашIыпIаква йрыуаз Ленинград ахчагIвчва рчвахъабагаква рквтала й-101-хауата йдыргылтI.
швталра йа тшаншвцIара атахъыпI.