АААК Санкт-Петербург ашIыпIа хъвшара йгьи Санкт-Петербург ауагIахъаква ртдзы январь а 22 атшын мачвы зцIарцIаз ангIалра апкъ йтата рацынхара джвыквырцIатI.
Барганджиа Саид
АААК Санкт-Петербург ашIыпIа хъвшара асовет аунашвачпагIв Реквава Тимур йгьи Санкт-Петербург акъральыгIва уысхарта «Санкт-Петербург ауагIахъаква ртдзы» аунашвачпагIв Кузнецова Елена агIваша, январь а 22 атшын, ацынхара ауысла ангIалра мачвы ацIарцIатI.
Реквава Тимур йшихIвазла, ацынхара анархара хъадаква йрыуазакIыпI – Санкт-Петербург акультура бзазара. Айззараква, анйараква агьиква йырхъазымкIва ауи йгIацIанакIитI апсыуа-абаза диаспора Санкт-Петербург акультура гIаншараква йрыдкIылра.
«АуагIахъаква ртдзи хIари хIангIалра апкъ йтата йхIзацырхъйуш уыс щарда хачIвыта хIпахь йхIыргыл йауаштI: ауагIахъа гвыргъьахъвква, асеминарква, анаука-практика конференцияква, айшва гьажьква, аршIыйара анйараква, аконцертаква, датшагьи щарда. Ауи шабгу аргваныта хIрабадырдыруаштI Санкт-Петербург апны джьгарта йынхауа анахьанат адиаспораква руагIа», – йгIаликIгIатI Реквава Тимур.
Датшагьи ахъатаква джьгарта йацынхуштI ажвлара рыхъазла магIны зму, ауагIахъаква рангIалри адиннкъвгагIвчва рангIалалри знархару ауысква ргIаджвыквцIари рырхъйари апны. Ауи акIвымкIва, ангIалра апны йгIарбапI адкIылараква йацынхарныс йшхIазыру Санкт-Петербург йтабзазауа ауагIахъаква рцри бызшваква, рхабзаква, рцIасква ргIахчара, ртшауацIнарыхра ауысла.
АААК Санкт-Петербург ашIыпIа хъвшара асовет асквш 2018 июль а 2 йгIашIарышвта йынхитI. АшIыпIа совет рмурад хъадаква йрыуазакIыпI – Россия алагъь къала хъада йтабзазауа апсыуа-абаза диаспора радкIылра.
швталра йа тшаншвцIара атахъыпI.