АААК йалакву йгьи Санкт-Петербург йту апсуа-абаза диаспора Россия алагъь къала хъада апны АйгIайра Амш артлапIара йалан.
АААК йалакву а-Конгресс ЙхIаракIу асовет аунашвачпагIв Эгьзакь Муссагьи рапхъа дгылата йгьи Санкт-Петербург йту апсуа-абаза диаспора Россия алагъь къала хъада апны АйгIайра Амш май а 9 артлапIара йалан.
«ХIара хIдуней лашарата хIбзазарныс ахъазла зхъа щтIазцIаз хIахIбачва, хIайщчва, хIахщчва, рсин апны ахIврапшдзалачпаква щтIахIцIатI. Ауат хIгвы йтазара, хIрыладухара атахъыпI, рейшата хIымгIвайсырныс ахъазла «хIбзазаща ауат шгIабзазаз йашIхIырпшра» атахъыпI. ЙаъалахIта йдуу ахъахьла ацIисква ауарадква йырхIвауа ракIвымкIва датша быжь гвымха хIумыргIан», – йхIватI Эгьзакь Мусса Пискарёв мемориал нышвынтара апны ахъмаштылра айззара анакIвшуз АААК ахабарргарта портал тшгIазынайырхауата.
ЙатахIхIвахпI, асквш 2000-ква рагIан Санкт-Петербург йаъу Пискарёв нышвынтара апны апсуа-абаза диаспора йырпщылата гIвмемориалкI гIаншатI: асквш 2004 май агIан Апсны йауата блокадала йкIвыршаз Ленинград ахчагIвчва йрылаз айсыгIвчва рчвахъабага хIахъв къьакъьа гIахъыртIытI, асквш 2018 сентябрь агIан йара ауи апш чвахъабага син гIахъыртIытI Къарча-Черкес йауаз айсыгIвчва йырхъмаштылгата. Май а 9 атшын хIхаквлагIвчва агвыргъьахъв дыртлапIауата арат амемориалква рпны йщтIарцIатI ахIврапшдзакви ахIврапшдзалапакви.
Санкт-Петербург апны йаныргIалу АААК чкIвынргIа рымгIвайсра йалу ачкIвынчви ахIвсси тшырзынайырхауата Мусса ХIабальа йпа йгIацицIахтI хIуагIа ауат рхъа рыладухауата йгIадзынгылырныс ахъазла «йамайчуата йапхьара, адырракви агвыбзыгъари рыларкIра шатахъу».
«Абаза уагIа ртурах шаъула, паштахIыгIвата ари дуней йыквыз йрыуата йгIахIгвыквымсыз гьаъам. Ауаса уахьчIва йъагIадзазгьи хIбзазитI, хIыбызшвагьи гьхIымрыдзтI. Ауи аъарала хIхабзаква, хIцIасква мчыпIта. Швабыж зджьара йгIанымхауата хIща йаныпI ауаса – хIбагъьахарныс, хIгвыбзыгъахарныс. Айсра апны йнахIмырдзауата ауи аъара хIгвыбзыгъахара атахъыпI, хIбагъьахара атахъыпI, зымгIвадзугьи пшдзата йхIыщтаныкъварныс, йхIапшхарныс гIартахъхауата», – абари йаквгIазшIиттI Мусса ХIабальа йпа чкIвынргIа, рцриква, раргванква зымгIвагьи дшрызцIгIахуа, сальам ду шритхуа рархIвхырныс дахIватI.
АйгIайра Амш май а 9 атшын Петербург абзазагIвчва анахьанат акъалакви акъралькви рбзазагIвчва йрпашта аурам йгIабжьалын Абашта айсра Ду йалаз рсуратква рымата йауацIыху акция «Аджьаль змам аполк» тшадыркIылтI. ЙнаскIьапхьадза ансисквша ари акция йгIалалуа ауагIа рыцIа-рыцIа йщардахитI. Ауи акция йалаз Санкт-Петербург апны а-Конгресс чкIвынргIа рымгIвайсра йалу, Можайский Александр йыхьыз зхьзу Арра-Ауапчахв академия йпщбахауа акурс йапхьауа, Апсны апны ййыз Тарба Исмет йгвгIанаграква хIыцагIвишатI.
«Сабаду Пкьын Иван Мурат йпа йсурат сымата йызгитI. Акция «Аджьаль змам аполк» съалу схъа аладухитI. ХIара хIабадучва, ауат рабачва, рабадучва, Абашта айсра Ду йпшцIата йайсыз зымгIвагьи йхIаракIдзу ахъацIарала, акърарла, хI-Псадгьыл йазрымаз абзибарала швапха пшдза гIадырбата йспхьадзитI», – йхIватI Исмет.
Ауи йшгIаликIгIазла, Апсны апны ари йапшу акция зынгьи дгьаламызтI, ауаса йцришта данцахра дшалалуаш багъьата йхIватI.
Абашта айсра Ду агIан йгIатыргаз АйгIайра Амш – май а 9 – ансисквша Россия йахъазымкIва Совет Союз йаланакIуаз анахьанат аштаква рпынгьи датша къраль щарда рпынгьи йдыртлапIитI. Абашта айсра асквшква рагIан Апсны йауата афронт йпшцIалтI зкьы 55-гIв райхIа, ауат йрыуата 15500-гIв апсыуан. Абашта айсра Ду афронтква рпны йайсытI абазатагьи 3000-гIв райхIа.
швталра йа тшаншвцIара атахъыпI.