АгвчIагIвчпара акция «Агвы апхара» йгIвбахауа ахъвы акIвшауата цхърагIара йазыбжу Апсны асабитгIачваква гъын чгIвыча комплектта 383 рзыршатI.
Барганжиа Саид
АААК агвчIагIвчпара акция «Агвы апхара» Согъвым апны йатаджвыквырцIахтI – апщаша, февраль а 7 атшын, цхърагIара йазыбжу Апсны атгIачваква агъын чгIвыча шIыцкви ахъыза пхакви рзыршатI. Ари атшын а-Конгресс ауысхагIвчва агъын курткаква, акIвохвтаква, ащапIхъацIаква рзыршатI саби 383-гIв.
А-Конгресс апхIвыс советква рунашвачпагIв Ардзынба Гета йшгIалылкIгIазла, агвчIагIвчпара акция «Агвы апхара» йашымтата йакIвшитI.
«ЙахчIва хIара Согъвым апны агъын чгIвыча шIыц комплектква ршарта тып гIахъхIтIытI, ауи мчыбжьыкI аурала йынхуштI. Ари атшын щымта йгIашIарышвта хъвлапныдза ранчва рыцта саби 220-гIв раъара хIызгIайтI, ауат ачгIвычаквагьи ащапIхъацIаквагьи ршвырцIумцара йрызбзихуз гIалырхтI», – лхIватI ауи.
А-Конгресс репатриация ауысла Апсны Республика аминистерства йыршарныс йрырттI гъын чгIвыча, щапIхъацIа комплектта 72, ажвлара адкIылара «Джьуар къапщы» - комплектта – 30, Согъвым асаби реабилитация квта асабиква йгьи Очамчыра район апны цхърагIара йазыбжу асабиква рыхъазла – комплект 31-31 кIьыда-кIьыдата йгIахвта.
Ардзынба Гета йшгIацылцIахызла, акция анхара йгIалалтI Апсны апны цхърагIара йазыбжу атгIачваква рыхъазла згвы цхIауа уагIа щардагIв.
«Ауи йаццауата хIара хIыгIвзачви хIдыркви хIрыхIватI ргьагьара дырхъвыхырныс, йнапшыгIапшырныс, зуыс баргву, цхърагIара йазыбжу асабитгIачваква аджвырагIв аъазтын рхабар шхIдырдыруашла. Акция «Агвы апхара» йгIацIанакIуа ауысква анхIырхъйауа агIан ауи ахьыз амагIны гIахIырцIабыргхырныс ахъазла йхIылшауа зымгIва хIчпитI», – лхIватI ауи лажва далгауата.
Репатриация ауысла Апсны Республика аминистерства ауысхагIв Гицба Шамиль йшгIаликIгIазла, йгIарыртыз агвчIагIвчпара цхърагIара гIамта айшысдзала ауи йазыбжу арепатриантква йрыларшуштI.
«ЙахьчIва АААК ауысхагIвчва йгIахIыртыз агъын чгIвыча комплектква арепатриантква йрыуата тгIачва 25 рысабичва 72-гIв йрылахIшуштI. Ауат Апсны арайонква зымгIва рпынгьи йбзазитI, рыцIа йъащарду Гульрыпш, Согъвым, Гвдауыт районква рпны акIвпI. ХIара швабыж хIырзыразпI ари акция йгIалалыз зымгIвагьи», – йхIватI Гицба Шамиль.
Хвахва-Бигвава Алиса хвгIвы сабичва дранпI, ахIба 10 сквша дыртапI, айцIба мыш 20 ракIвпI йхъыцIуа. АтгIачва Очамчыра район йаланакIуа Гвып кыт йтабзазитI, ауат рыхъазла йзачIв цхърагIаразлакIгьи магIны ду амапI.
«Анчва зымгIвагьи дшвзыразхатI. Ари хIара хIыхъазла пстакIыга дупI. ХIсабичва ауи швабыж йайгвыргъьитI», – лхIватI Хвахва-Бигвава Алиса.
Адуней апсуа-абаза конгресс лразыра ажваква рзыналырхатI датшагьи сабитгIачвакI ран – Гвып кыт йауу Айба Алёна. Ауи пщгIвы сабичва лымапI – хыгIв пачви пхIакIи. АтгIачва ужвы Согъвым апны уагIарата йгIарахвыз абзазарта йыгIвнабзазитI. Алёна йгьцIалкIуам асабичва рахIа йыззыбжадзу ачгIвычаквала йадылгалырныс швабыж йшылчвхIатлу. Ауи йшылхIвауала, агвчIагIвчпара акция «Агвы апхара» апкъ йтата йгIаддрайдзауа ацхърагIара асабитгIачваква швабыж йазыбжапI.
«ХIара чгIвыча шIыц гIахIырттI: акурткаква, акIвохвтаква, аколготкаква, атлапад айшысква. Ауи ацхърагIара швабыж хIазыбжан. Сшразу зласхIвуш ажваква абгата йгьсауам», – араса лгвыргъьара хIыцагIвылшатI Айба Алёна.
ЦхърагIара йазыбжу атгIачваква рыхьызква ашIыпхьадзата йызну ашвъаква ацдрыхIазыртI АААК, репатриация ауысла Апсны Республика аминистерства, анхара, анхара адкIылазлара йгьи ажвлара адгалра рминистерства арайон хъвшараква, «Киараз» адкIылара, «Алашара» адкIылара, «Джьуар къапщы» жвлара йгьи адиннкъвгагIвчва рыжвлара адкIылараква.
АгвчIагIвчпара акция «Агвы апхара» йгIацIанакIуата Апсны йгIаргтI гъын чгIвычата комплект 1120 (акурткакви акIвохвтакви), щапIхъацIата – 1060, аколготкакви атлапад
айшыскви рпхьадзара шалу – 1008, гъын хъызата – 200. РыцIа паса, асквш 2018 сентябрь агIан, Трыквшта йтабзазауа хIабашталагIвчва йадыркIылын Апсны йгIарщтитI хъацIа йгьи пхIвыс чгIвычата комплект 1200.
швталра йа тшаншвцIара атахъыпI.